༄༅༎།ནགས་སྲུང་བ་བཀྲ་ཤིས་ཆོས་འཕེལ་གྱིས་ལོ་བཅུ་གསུམ་རིང་ལྷོ་རིར་བརྩེ་བ་བཅངས་ནས་ལྕང་འཛུགས་ལས་ལ་གཞོལ་བ།

    ཞོགས་པ་སྔ་པོར། ལྷ་ས་ལྷོ་རིའི་སྤྱི་གླིང་དུ་ནགས་སྲུང་བ་བཀྲ་ཤིས་ཆོས་འཕེལ་ལྟ་སྐུལ་ཚོད་འཛིན་ཁང་དུ་སླེབས་ཟིན་པ་དང་། ཁོང་གིས་ལྟ་སྐུལ་ཚོད་འཛིན་གྱི་བརྙན་ལམ་བཅུ་གྲངས་ཁ་ཤས་ནས་ལོ་13ལྟ་སྲུང་ལས་ལ་གཞོལ་བའི་ནགས་རིའི་འདབས་ཀྱི་རྩི་ཤིང་སྐྱེ་ཚུལ་ལ་ཞིབ་ལྟ་བྱེད་དགོས་པ་མ་ཟད། ལྕང་མ་འཛུགས་པ་དང་། ཆུ་རྒྱག་པ། ནད་འབུ་འགོག་བཅོས་སོགས་ཀྱི་ལས་དོན་སྒྲིག་འཛུགས་བྱས་ནས་ལྗོན་ཤིང་གི་སྐྱེ་ཚུལ་ཡག་པོ་ཡོང་བའི་འགན་ལེན་ཡང་བྱེད་དགོས་ཀྱི་ཡོད།

    ལྷ་ས་འདི་ཉིད་ལུང་ཤུར་རིང་པོར་གནས་པ་དང་། སྐྱིད་ཆུ་ཀྱག་ཀྱོག་ངང་དལ་གྱིས་རྒྱུག་པ། ངོགས་གཉིས་སུ་ལྷོ་རི་དང་བྱང་རི་མུ་ཁྱུད་འབྲེལ་ནས་གནས་ཡོད། ཕོ་བྲང་པོ་ཏ་ལའི་ལྷོ་ཕྱོགས་ཀྱི་དྲང་ཐད་དུ་སྔོ་ལྗང་གིས་བཀླུབས་པའི་ལྷོ་རི་དང་གྲོང་ཁུལ་ཆུ་བོས་བཅད་པ་དང་། རི་ལྡེབས་ཀྱི་སྡོང་ཐུང་དང་སྡོང་རིང་བསྣོལ་ཡང་གོ་རིམ་ལྡན་ལ་སྔོ་ཐིང་ངེར་གནས་ཡོད།

    “ལོ་བཅུ་གྲངས་གོང་། སྐྱ་ཐེར་ཐེར་ཡིན་པའི་རི་སྟེང་དང་། རླུང་བུ་ལྡང་ཚེ་གང་སར་ཐལ་རྡུལ་འཚུབ་པ་མ་ཟད། བྱ་བྱིའུ་ཡང་མཐོང་རྒྱུ་མེད”ཅེས་བཀྲ་ཤིས་ཆོས་འཕེལ་གྱིས་ཕྱིར་དྲན་བྱེད་བཞིན་དུ་བཤད། ཁོང་གིས“ད་ཆ་ནགས་གསེབ་ཏུ་སྐྱོད་སྐབས། ཤུ་ཞིག་བརྒྱབ་ཀྱང་བྱ་བྱིའུ་སྣ་ཚོགས་ཀྱིས་སྐད་སྙན་འབྱིན་གྱི་ཡོད”ཅེས་བཤད།

    རྩྭ་ས་ཉམས་ཞན་དང་། ས་རྒྱུ་བྱེ་འགྱུར་བཀག་འགོག་བྱས་ནས་གྲོང་མིའི་འཚོ་བའི་ཁོར་ཡུག་ལེགས་སུ་གཏོང་ཆེད། 2012ལོར་ལྷ་ས་གྲོང་ཁྱེར་གྱིས་ལྷོ་རིའི་སྔོ་འགྱུར་ལས་གྲྭ་ལག་ལེན་བསྟར་འགོ་ཚུགས་ཤིང་། ལྕང་འཛུགས་སྔོ་འགྱུར་བྱས་པ་བརྒྱུད། ལོ་ལྔ་ཡི་ནང་སྔོན་མའི་སྐྱ་ཐེར་ཐེར་གྱི་རི་དེ་ལྷ་ས་ལྷོ་རིའི་སྤྱི་གླིང་དུ་གྱུར་ཞིང་། ལྕང་འཛུགས་ཟམ་མི་ཆད་པར་བྱས་མཐར་ད་ཆ་ལྷོ་རིའི་སྤྱི་གླིང་ལ་སྡོང་རྐང་ཁྲི་80ལྷག་ཙམ་འདེབས་འཛུགས་བྱས་པ་དང་། ནགས་བཟོ་བྱེད་ཁྱོན་མུའུ་4350ལྷག་ཙམ་ཟིན་ཡོད། 2021 ལོར་ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭ་དངོས་སུ་ལག་ལེན་བསྟར་བ་དང་། ལས་གྲྭའི་ཆ་ཤས་ཤིག་ཡིན་པའི་ལྷོ་རིའི་སྤྱི་གླིང་དེ་བོད་ཀྱི་ལུང་ཤུར་ས་ཁུལ་གྱི་གཞི་ཁྱོན་ལྡན་པའི་སྐྱེ་ཁམས་འཛུགས་སྐྲུན་དང་སླར་གསོའི་ཚབ་བྱེད་རང་བཞིན་གྱི་ལས་གྲྭ་ཐོག་མར་གྱུར་ཡོད།

    རི་མཐོ་ཞིང་གཡང་གཟར་བའི་རྐྱེན་གྱིས་ཐོག་མར་དྲེལ་ལ་བརྟེན་ནས་ས་བབ་མཐོ་ཚད་སྨི་3700ཟིན་པའི་རི་གཤམ་ནས་རི་སྟེང་གི་ས་ཆ་གང་སར་ལྕང་སོན་དབོར་དགོས་པ་དང་། ས་བབ་མཐོ་ཤོས་ལ་སྨི་4100ལྷག་ཙམ་ཟིན་གྱི་ཡོད་པས། དུས་ཚོད་རིང་པོ་འགོར་ལ་ངལ་ནུས་ཀྱང་ཆེན་པོ་འདོན་དགོས་སྟབས། ཉིན་རེར་སྡོང་ཕྲུག་མང་པོ་དབོར་ཐུབ་ཀྱི་མེད། སྡོང་ཕྲུག་གསོན་ཚད་འགན་ལེན་བྱ་རྒྱུ་ཡང་དཀའ་གནད་ཆེན་པོ་ཞིག་ཏུ་གྱུར་ཡོད། “དེ་དུས་ང་ཚོས་སྦུ་གུ་ཁྲིད་ནས་ཆུ་རྒྱག་པ་དང་། དགུན་ཁ་སྦུ་གུར་འཁྱགས་པ་ཐེབས་ནས་སྡོང་ཕྲུག་གསོན་ཐུབ་ཀྱི་མེད”ཅེས་བཀྲ་ཤིས་ཆོས་འཕེལ་གྱིས་བཤད།

    ད་ཆ། ཚན་རྩལ་གྱིས་ལྷོ་རིའི་སྤྱི་གླིང་གི་སྐྱེ་ཁམས་འཛུགས་སྐྲུན་ལ་གསོན་ཤུགས་སྦྱིན་ཞིང་། མི་མེད་གནམ་གྲུའི་སྐྱེལ་འདྲེན་དེ་ལྕང་སོན་དབོར་བའི་བྱེད་ཐབས་གྲས་སུ་གྱུར་ཡོད། ན་ནིང་བཀྲ་ཤིས་ཆོས་འཕེལ་ཆེད་ལས་ཀྱི་ཞིང་སྤྱོད་མི་མེད་གནམ་གྲུའི་བཀོལ་སྤྱོད་ལག་ཁྱེར་གྱི་རྒྱུགས་འཕྲོད་དེ་མི་མེད་གནམ་གྲུ་ཆེ་གྲས་བཀོལ་སྤྱོད་བྱང་ཆུབ་པོ་བྱས་ནས་རི་མཐོ་གཡང་གཟར་གྱི་ལྕང་འཛུགས་བྱ་ཡུལ་ལ་ལྕང་སོན་རྒྱ་མ་བདུན་ཅུ་བརྒྱད་ཅུ་ཐད་ཀར་དབོར་ཐུབ་ཀྱི་ཡོད་པས་ལས་ཕྱོད་ཀྱང་ཧ་ཅང་ཆེ་རུ་ཕྱིན་ཡོད།

     དེང་རབས་ཅན་གྱི་ཆུ་འདྲེན་སྒྲིག་ཆས་ཀྱིས་ལྗོན་ཤིང་བདག་སྐྱོང་བྱེད་པར་ཕན་ཐོགས་ཆེན་པོ་བྱུང་ཡོད། “ད་ཆ་རི་སྟེང་གི་ལྕང་མ་འཛུགས་ཡུལ་སོ་སོར་རང་འགུལ་ཅན་གྱི་འཕྲུལ་ཆས་ཀྱིས་ཆུ་གཏོར་ཐུབ་པ་མ་ཟད། ང་ཚོས་ཀྱང་ཆུ་གཏོར་རླངས་འཁོར་བཏང་ནས་ཆུ་རྒྱག་གི་ཡོད། ཉིན་གཅིག་ལ་སྡོང་རྐང་1000ལྷག་ཙམ་ལ་ཆུ་བརྒྱབ་པར། ལྗོན་ཤིང་གི་སྐྱེ་འཚར་ཇེ་ཡག་ཏུ་འགྲོ་བཞིན་ཡོད”ཅེས་བཀྲ་ཤིས་ཆོས་འཕེལ་གྱིས་འཛུམ་དམུལ་དམུལ་ངང་བཤད།

    གྲངས་གཞི་ལས་མངོན་པར་གཞིགས་ན། 2024 ལོར་ལྷ་སའི་ལྷོ་རི་བྱང་རིའི་སྔོ་འགྱུར་ལ་ལྕང་མ་ཁེབས་ཚད་མུའུ་ཁྲི་17.72དང་། ནགས་བཟོ་ཁུལ་38ལ་ལྕང་མ་གསོན་ཚད་92%ཡན། སྒོ་རའི་སྔོ་ཁེབས་ཐུབ་ཚད་སྨི་ངོས་གྲུ་ཁྲི་130ལྷག་ཙམ། གྲོང་ཁྱེར་དུ་སྔོ་ཁེབས་ཐུབ་ཚད་སྨི་ངོས་གྲུ་ཁྲི་180ལྷག་ཙམ་བཅས་ཟིན་ནས། གྲོང་ཁྱེར་ཡོངས་ཀྱི་མཁའ་རླུང་སྤུས་ཚད་རབ་འབྲིང་ཟིན་ཚད་རྒྱལ་ཡོངས་ཀྱི་གཙོ་གནད་གྲོང་ཁྱེར་གྱི་མདུན་གྲལ་དུ་སླེབས་ཡོད་པ་རེད།