༄༅།།མཚོ་སྔོན་གྱི་འབོག་སན་ལུས་རྩལ་པར་འཛམ་གླིང་ལེགས་སྐྱེས་འགྲན་བསྡུར་གྱི་ཨང་དང་པོ་ཐོག་མར་ཐོབ་པ།

འདི་ནི་ཀྲན་དབྱི་ལེན(དཀྱིལ)དང་རུ་མིས་བྱ་དགའ་ཐོབ་རྗེས་མཉམ་དུ་པར་རྒྱག་བཞིན་པ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཟླ་3ཚེས་17ཉིན། མཚོ་སྔོན་ཞིང་ཆེན་ལུས་རྩལ་ཅུས་ནས་གཏམ་བཟང་བསྒྲགས་པ་སྟེ། ཀྲུང་གོའི་རུ་ཁག་གི་ཚབ་བྱས་ནས་2025ལོའི་རྒྱལ་སྤྱིའི་འབོག་སན་མཉམ་འབྲེལ་ལྷན་ཚོགས་ཀྱི་བུད་མེད་འབོག་སན་གྱི་འཛམ་གླིང་ལེགས་སྐྱེས་འགྲན་བསྡུར་ལ་ཞུགས་མཁན་མཚོ་སྔོན་ལུས་རྩལ་ལས་དོན་རུ་ཆེན་གཉིས་པའི་ལུས་རྩལ་པ་ཀྲན་དབྱི་ལེན་ལ་སྤྱི་རྒྱ་81ཡན་རིམ་པའི་ཨང་དང་པོ་ཐོབ་ཅིང་། དེ་ནི་མཚོ་སྔོན་ཞིང་ཆེན་གྱི་འབོག་སན་ལུས་རྩལ་ལ་འཛམ་གླིང་ལེགས་སྐྱེས་འགྲན་བསྡུར་གྱི་གསེར་གྱི་རྟགས་མ་ཐོབ་ཐེངས་ཐོག་མ་དེ་རེད།

2025ལོའི་བུད་མེད་འབོག་སན་གྱི་འཛམ་གླིང་ལེགས་སྐྱེས་འགྲན་བསྡུར་སེར་པི་ཡར་གཉེར་བ་དང་། ཁྱོན་རིམ་པ་12ཀྱི་འགྲན་བསྡུར་བཀོད་སྒྲིག་བྱས་ཡོད་ལ་རྒྱལ་ཁབ་དང་ས་ཁུལ་51ནས་ཡོང་བའི་ལུས་རྩལ་པ་230ལྷག་ཙམ་ཞུགས་ཡོད། ཀྲུང་གོའི་རུ་ཁག་གིས་བདམས་ཐོན་པ་12མངགས་ནས་རིམ་པ་ཚང་མའི་འགྲན་རྩོད་ནང་ཞུགས་པ་དང་མི་12ལ་རྒྱལ་ཡོངས་ཀྱི་ཨང་དང་པོ་ཐོབ་ཡོད་ཅིང་། དེའི་ནང་མཚོ་སྔོན་ཞིང་ཆེན་ལུས་རྩལ་ལས་དོན་རུ་ཆེན་གཉིས་པའི་ཝེ་སི་ཐུང་དང་། ཀྲའོ་ཧྲུའོ་ཡུས། ཀྲན་དབྱི་ལེན་བཅས་ལུས་རྩལ་པ་3གྱིས་རྒྱལ་ཁབ་རུ་ཁག་གི་ཚབ་བྱས་ནས་ཞུགས་ཡོད་པ་རེད།

འགྲན་བསྡུར་ཉིན་འགའ་བྱས་པ་བརྒྱུད། ཀྲུང་གོའི་རུ་ཁག་གི་ཁྱོན་མི་3རྩེ་གྲ་བརྒྱད་ཀྱི་གྲས་སུ་སླེབས་པ་དང་གཞན་ཡང་བདམས་ཐོན་པ་གཉིས་ཐད་ཀར་རྩེ་གྲ་བརྒྱད་དུ་ཚུད་ཡོད། མཚོ་སྔོན་གྱི་ལུས་རྩལ་པ་ཀྲན་དབྱི་ལེན་གྱིས་རྩེ་གྲ་བརྒྱད་ནས་འགྲན་བསྡུར་བྱས་ཏེ་བཞི་ཆ་གཅིག་གི་མཐའ་བསྡུར་ནང་ཨུ་རུ་སུའི་བདམས་ཐོན་པ་ལས་རྒྱལ་བ་དང་། ཕྱེད་མཐའ་བསྡུར་ནང་5བསྡུར་0གྱི་ཐོག་ནས་ཐུར་ཁེའི་བདམས་ཐོན་པ་ལས་རྒྱལ་ནས་མཐའ་བསྡུར་ནང་ཚུད་ཡོད། མཐའ་བསྡུར་ནང་ཀྲན་དབྱི་ལེན་གྱི་འགྲན་ཡ་ནི་ན་ནིང་2024ASBCཨེ་ཤེ་ཡའི་རྩེར་སོན་འགྲན་བསྡུར་གྱི་ཨང་དང་པོ་ཧ་སག་སི་ཐན་གྱི་གྲགས་ཅན་ལུས་རྩལ་པ་ཐ་ལི་པོ་ཝ་ཡིན་པ་དེའི་ཁྱད་ཆོས་ནི་ཁུ་ཚུར་ལྕི་ཞིང་ཕར་རྒོལ་དྲག་པོ་ཡོད་པ་དེ་རེད། འགྲན་བསྡུར་འགོ་ཚུགས་མ་ཐག་ཀྲན་དབྱི་ལེན་གྱིས་རྩལ་ཡག་པོ་བཏོན་ཐུབ་ནས་མཐར་རེས་སྐོར་ལྔ་འགྲན་རྗེས་4བསྡུར་1གི་ཐོག་ནས་རྣམ་པར་རྒྱལ་ཏེ་སྤྱི་རྒྱ་81ཡན་རིམ་པའི་གསེར་གྱི་རྟགས་མ་བླངས་པ་རེད། （གནམ་ཕྱུག་རྒྱལ་གྱིས་བསྒྱུར། བདེ་སྐྱིད་ཀྱིས་ཞུས）