༄༅།།བདེ་ཆེན་བོད་རིགས་རང་སྐྱོང་ཁུལ་གྱི་དེ་སྔའི་ཁུལ་དཔོན་ཆི་ཅན་ཤིན་ཏང་དང་ལས་གནས་གཉིས་ཀ་ནས་ཕུད་འདུག

    ཡུན་ནན་ཞིང་ཆེན་སྒྲིག་བཤེར་ལྟ་ཞིབ་ཨུ་ལྷན་གྱི་གནས་འཕྲིན་ལ་གཞིགས་ན། ཉིན་ཤས་གོང་ཡུན་ནན་ཞིང་ཆེན་ཨུ་ལྷན་གྱི་ཆོག་མཆན་བརྒྱུད་ཡུན་ནན་ཞིང་ཆེན་སྒྲིག་བཤེར་ལྟ་ཞིབ་ཨུ་ལྷན་གྱིས་བདེ་ཆེན་བོད་རིགས་རང་སྐྱོང་ཁུལ་སྲིད་གཞུང་གི་དེ་སྔའི་ཁུལ་དཔོན་ཆི་ཅན་ཤིན་གྱི་སྒྲིག་འགལ་ཁྲིམས་འགལ་ཚབས་ཆེན་གྱི་གནད་དོན་ལ་གྱོད་དོན་ཐོ་འགོད་ཞིབ་བཤེར་བརྟག་དཔྱད་བྱས་པ་རེད།

    བརྟག་དཔྱད་བྱས་པ་བརྒྱུད། ཆི་ཅན་ཤིན་གྱི་ཕུགས་བསམ་དང་དད་སེམས་ཤོར་བ་དང་། ཐོག་མའི་བསམ་འདུན་དང་འགན་འཁྲི་རྒྱབ་འགལ་བྱས་པ། ཏང་ལ་ལྷག་བསམ་རྣམ་དག་དང་གཞུང་དྲང་མིན་པ། རྩ་འཛུགས་ཀྱི་ཞིབ་བཤེར་ལ་འགོག་རྒོལ་བྱས་པ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་སྣང་མེད་དུ་བཞག་པ། གཞུང་དོན་དྲང་བདེན་ལག་བསྟར་བྱེད་པར་ཤུགས་རྐྱེན་ཐེབས་སྲིད་པའི་དངུལ་རྫས་དང་ལེན་བྱེད་པ། རྩ་འཛུགས་ཀྱི་རྩ་དོན་དང་རྒྱབ་འགལ་བྱས་ནས་ཁྱིམ་ཚང་གི་ཁང་ཁོངས་སྦས་ནས་སྙན་སེང་ཞུ་མི་བྱེད་པ་དང་། རྩ་འཛུགས་ཀྱིས་འཕྲིན་ཡིག་འདྲི་རྩད་བྱེད་སྐབས་གནད་དོན་ཇི་མ་ཇི་བཞིན་གསལ་བཤད་མི་བྱེད་པ། ལས་བྱེད་པའི་གོ་གནས་རིམ་སྤར་ལས་དོན་ཁྲོད་འགན་དབང་ངམ་གོ་གནས་ཀྱི་ཤུགས་རྐྱེན་སྤྱད་དེ་མི་གཞན་ལ་ཁེ་ཕན་གཉེར་བ། སྤྱོད་གཙང་གི་མ་མཐའི་རྩ་དོན་ཤོར་བ། རང་ཉིད་དང་གཉེན་ཉེ། དམིགས་བསལ་གྱི་འབྲེལ་བ་ཡོད་པའི་མི་བཅས་ཀྱིས་སྤྲོད་དགོས་པའི་གྲོན་དངུལ་མི་གཞན་ལ་སྤྲད་དུ་ཆུགས་པ། ལས་གནས་ཀྱི་ཤུགས་རྐྱེན་བེད་སྤྱད་དེ་གཉེན་ཉེས་ལས་གྲྭའི་རྣམ་གྲངས་བསྒྲུབ་ཏུ་ཆུགས་ནས་སྒེར་གྱི་ཁེ་ཕན་གཉེར་བ། ཁྲིམས་འཛིན་བྱེད་སྒོར་སྒྲིག་འགལ་གྱིས་ཐེ་གཏོགས་བྱས་པ། གོ་གནས་ཀྱི་སྟབས་བདེ་སྤྱད་དེ་མི་གཞན་ལ་ལས་གྲྭའི་རྣམ་གྲངས་བསྒྲུབ་ཏུ་ཆུགས་ནས་ཁེ་ཕན་གཉེར་བ། ཁྲིམས་འགལ་གྱིས་རྒྱུ་ནོར་འབོར་ཆེན་བླངས་པ་རེད།

   ཆི་ཅན་ཤིན་གྱིས་ཏང་གི་ཆབ་སྲིད་སྒྲིག་ཁྲིམས་དང་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་། རྩ་འཛུགས་སྒྲིག་སྲོལ། སྤྱོད་གཙང་སྒྲིག་སྲོལ། ལས་ཀའི་སྒྲིག་སྲོལ། འཚོ་བའི་སྒྲིག་ཁྲིམས་བཅས་ལས་ཚབས་ཆེན་འགལ་ནས་ལས་འགན་ཁྲིམས་འགལ་ཚབས་ཆེན་བྱས་པར་མ་ཟད། ལྐོག་རྔན་ལེན་པའི་བྱས་ཉེས་ལ་དོགས་པ་ཡོད་པར་མ་ཟད། ཏང་གི་ཚོགས་ཆེན་བཅོ་བརྒྱད་པའི་རྗེས་སུ་ཚོད་མི་འཛིན་པ་དང་མཚམས་མི་བཞག་པ། ངོ་བོ་ཚབས་ཆེན་དང་ཤུགས་རྐྱེན་ངན་པ་ཡིན་པས་ཐག་གཅོད་ནན་པོ་བྱ་དགོས། 《ཀྲུང་གོའི་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་བཅའ་ཁྲིམས》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་དོན་མི་སྣའི་སྲིད་དོན་ཆད་གཅོད་བཅའ་ཁྲིམས》སོགས་འབྲེལ་ཡོད་གཏན་འབེབས་གཞིར་བཟུང་། ཡུན་ནན་ཞིང་ཆེན་སྒྲིག་ཁྲིམས་ཞིབ་བཤེར་ཨུ་ལྷན་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཐོག་ཞིབ་འཇུག་བྱས་པ་དང་འབྲེལ་ཡུན་ནན་ཞིང་ཆེན་ཨུ་ལྷན་ལ་ཆོག་མཆན་སྤྲད་པ་བརྒྱུད། ཆི་ཅན་ཤིན་ལ་ཏང་ཁོངས་ནས་ཕྱིར་འབུད་བྱེད་པའི་ཆད་པ་གཅོད་རྒྱུའི་གཏན་འབེབས་བྱས་པ་དང་། ཡུན་ནན་ཞིང་ཆེན་ལྟ་སྐུལ་ཨུ་ལྷན་གྱིས་ཁོང་ལ་གཞུང་ལས་ཕྱིར་འབུད་བྱེད་པའི་ཆད་པ་བཅད། དེའི་སྒྲིག་ཁྲིམས་དང་ཁྲིམས་འགལ་གྱི་ཐོབ་ཆ་བསྡུ་ལེན་བྱས། ཉེས་གསོག་དོགས་ཡོད་ཀྱི་གནད་དོན་དེ་ཞིབ་དཔྱོད་ལས་ཁུངས་ལ་ཁྲིམས་ལྟར་ཞིབ་བཤེར་དང་ཞི་གཏུག་བྱ་རྒྱུར་སྤྲོད་རྒྱུ་དང་འབྲེལ་ཡོད་ཀྱི་རྒྱུ་ནོར་མཉམ་དུ་སྐྱེལ་དགོས།