༄༅།།ད་ལོའི་དྲ་ཐོག་གི་ལོ་གསར་མཁོ་ཆས་དུས་ཆེན་གྱི་ཉིན་རེའི་ཆ་སྙོམས་སིལ་འཚོང་དངུལ་འབོར་དུས་མཚུངས་ལས་6.2%འཕར་བ།

ཚེས་13ཉིན། གསར་འགོད་པས་ཚོང་དོན་པུའི་འཆར་ཅན་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱས་པར་གཞིགས་ན། ཚོང་དོན་གྲངས་གཞི་ཆེན་པོས་དྲ་ཐོག་ཚོང་དོན་གྱི་ལས་སྟེགས་གཙོ་བོར་ལྟ་ཞིབ་ཚད་ལེན་བྱས་པ་ལྟར་ན།“2025ལོའི་རྒྱལ་ཡོངས་དྲ་ཐོག་གི་ལོ་གསར་མཁོ་ཆས་དུས་ཆེན”གྱི་བྱེད་སྒོ་སྤེལ་རིང་། རྒྱལ་ཡོངས་ཀྱི་དྲ་ཐོག་གི་ཉིན་རེའི་ཆ་སྙོམས་སིལ་འཚོང་དངུལ་འབོར་དུས་མཚུངས་ལས་6.2%འཕར་ནས་2025ལོའི་དྲ་ཐོག་འཛད་སྤྱོད་ཀྱི་འགོ་ཡག་པོ་བཙུགས་ཡོད།

ངོ་སྤྲོད་བྱས་པར་གཞིགས་ན། ད་ལོའི་དྲ་ཐོག་གི་ལོ་གསར་མཁོ་ཆས་དུས་ཆེན་ལ་བཀྲག་མདངས་འཚེར་ས་མང་པོ་ལྡན་པ་སྟེ།

གཅིག་ནས་སྲིད་ཇུས་ཀྱིས་འཕར་སྣེ་གསར་པ་ཐོན་པར་སྐུལ་ཁྲིད་བྱས་ཤིང་། རྙིང་པ་གསར་བརྗེས་ལ་བརྟེན་ནས་མཐའ་སྐོར་གྱི་འཛད་སྤྱོད་རྒྱ་སྐྱེད་གཏོང་ཤུགས་ཆེ་རུ་གཏོང་བའི་སྲིད་ཇུས་ཀྱི་ཕན་པ་མགྱོགས་མྱུར་མངོན་ཡོད། ཕོར་ཁྲུས་འཕྲུལ་འཁོར་དང་ཆུ་དྭངས་འཕྲུལ་ཆས་ཀྱི་དྲ་ཐོག་ཕྱིར་ཚོང་དངུལ་འབོར་71.8%དང་47.4%སོ་སོར་འཕར་ཡོད། ཐོངས་མཆན་མི་དགོས་པའི“གྲོགས་ཚོགས”རྒྱ་སྐྱེད་པ་སོགས་དགེ་མཚན་ལྡན་པའི་སྲིད་ཇུས་ཀྱིས་རྒྱལ་མཚམས་སྒྲོལ་བའི་ཡུལ་སྐོར་མགྱོགས་མྱུར་འཕར་བར་སྐུལ་འདེད་བཏང་ཡོད། དྲ་ཐོག་ཡུལ་སྐོར་གྱི་ཕྱིར་ཚོང་དངུལ་འབོར་35.2%འཕར་བའི་ནང་ཕྱི་རྒྱལ་དུ་ཡུལ་སྐོར་བྱེད་ཚད་72.3%འཕར་ཡོད།

གཉིས་ནས་མངོན་མིན་རིག་གནས་ཤུལ་བཞག་གིས་དར་སྲོལ་གསར་པ་ཆགས་པར་སྐུལ་ཁྲིད་བྱས་ཤིང་། མངོན་མིན་རིག་གནས་ཤུལ་བཞག་གི་འཁྲབ་སྟོན་དང་དམངས་སྲོལ་ཡུལ་སྐོར་གླིང་སོགས་ཡུལ་སྐོར་ཐོན་རྫས་ཧ་ཅང་བྲིན་པོ་བྱུང་ནས་དཔྱིད་གསར་དུས་ཆེན་གྱི་གུང་གསེང་རིང་། དྲ་ཐོག་ཕྱིར་ཚོང་དངུལ་འབོར་407.7%དང་109.8%སོ་སོར་འཕར་ཡོད།

གསུམ་ནས་སྤུས་ཚད་ཀྱིས་མཁོ་སྤྲོད་གསར་པ་ལེགས་སུ་གཏོང་བར་སྐུལ་ཁྲིད་བྱས་ཤིང་། དཔྱིད་གསར་དུས་ཆེན་གྱི་གུང་གསེང་རིང་སྐྱེ་ལྡན་བྲོ་རྫས་དང་སྐྱེ་ལྡན་འོ་མའི་ཕྱིར་ཚོང་དངུལ་འབོར་81.5%དང་44.4%སོ་སོར་འཕར་ཡོད། གོ་ལ་ཧྲིལ་པོའི་ཅ་དངོས་སྤུས་ལེགས་ལ་དགའ་བསུ་ཐོབ་པ་དང་ཨེ་ཤེ་ཡ་ཤར་ལྷོའི་མནའ་འབྲེལ་དང་ཨེ་ཤེ་ཡ་དབུས་མ་སོགས་ཀྱི་ཐོན་རྫས་སྤུས་ལེགས་ཀྲུང་གོའི་ཁྲོམ་ར་དང་སྦྲེལ་མཐུད་བྱས་ཏེ། དབྱི་ཐ་ལིའི་ཁྲོག་ལེའི་བྱི་རིལ་དང་མ་ལེ་ཞི་ཡའི་ཏན་ཞིམ་སོགས་ཁྱད་ལྡན་ཚོང་ཟོག་ལོ་གསར་གྱི་མཁོ་ཆས་གསར་པར་གྱུར་ཡོད།

བཞི་ནས་དྲ་ཐོག་ནས་ཉམས་ལེན་གསར་པ་མཐོར་འདེགས་ལ་སྐུལ་ཁྲིད་བྱས་ཤིང་། དྲ་ཐོག་བཟའ་བཏུང་གི་ཕྱིར་ཚོང་དངུལ་འབོར་11.8%འཕར་བ་དང་། དཔྱིད་གསར་དུས་ཆེན་གྱི་གློག་བརྙན་ཁྲོམ་ར་འཁྲུག་ཏུ་ཕྱིན་ནས“དྲ་ཐོག་ནས་སྤ་སེ་ཉོས་ཏེ་དྲ་ཕྱི་ནས་གློག་བརྙན་ལྟ་བ”དེས་དྲ་ཐོག་རིག་གནས་རོལ་རྩེད་ཀྱི་ཕྱིར་ཚོང་དངུལ་འབོར་55.5%འཕར་བར་སྐུལ་ཁྲིད་བྱས་ཡོད།