༄༅།།ཀྲུང་དབྱང་བསམ་པའི་དཔལ་ཡོན་སྲོལ་གཏོད་གཞུང་དོན་ཁང་གིས་རྒྱལ་ཡོངས་ཀྱི་ཀུན་སྤྱོད་དཔེ་བཟང་བར་འཚམས་འདྲི་དང་རོགས་སྐྱོར་བྱས་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་23ཉིན་གློག་འཕྲིན་འབྱོར་གསལ། 2025ལོའི་དཔྱིད་གསར་དུས་ཆེན་འཆར་ཉེར་ཡོད་པའི་མཚམས་འདིར་ཀྲུང་དབྱང་བསམ་པའི་དཔལ་ཡོན་སྲོལ་གཏོད་གཞུང་དོན་ཁང་གིས་རྒྱལ་ཡོངས་ཀྱི་ཀུན་སྤྱོད་དཔེ་བཟང་བར་འཚམས་འདྲི་དང་རོགས་སྐྱོར་བྱེད་པའི་བྱེད་སྒོ་སྤེལ་ཏེ་དཔའ་བོ་དཔེ་བཟང་བར་གཅེས་སྐྱོང་དང་གུས་ལུགས་གང་ལེགས་མཚོན་པ་དང་དཔེ་བཟང་བར་བརྩི་བཀུར་དང་སློབ་སྦྱོང་བྱེད་པའི་ཡ་རབ་གོམས་སྲོལ་དར་སྤེལ་བཏང་ཡོད།

    ད་ཐེངས་ཀྱི་གཅིག་སྡུད་འཚམས་འདྲིའི་རོགས་སྐྱོར་བྱེད་སྒོའི་ཁྲོད། ཀྲུང་དབྱང་བསམ་པའི་དཔལ་ཡོན་སྲོལ་གཏོད་གཞུང་དོན་ཁང་གིས་འཚམས་འདྲི་ཚོགས་ཆུང་འགའ་ས་གནས་ཁག་ཏུ་འཚོ་བར་དཀའ་ངལ་ཡོད་པའི་རྒྱལ་ཡོངས་ཀྱི་ཀུན་སྤྱོད་དཔེ་བཟང་བ་47དང་དེ་དག་གི་ནང་མིར་འཚམས་འདྲི་བྱེད་པར་མངགས་ཡོད། འཚམས་འདྲི་ཚོགས་ཆུང་ཁག་ལེ་དབར་སྟོང་ཕྲག་བརྒལ་ནས་ཐག་རིང་གི་གྲོང་གསེབ་དང་སྲང་ལམ་དང་སྡེ་ཁུལ་དུ་དཔེ་བཟང་བའི་ཁྱིམ་དུ་བསྐྱོད་ཡོད།

    འཚམས་འདྲི་ཚོགས་ཆུང་གིས་ཁོང་ཚོའི་འཚོ་བ་དང་གཟུགས་པོའི་གནས་ཚུལ་ཤེས་རྟོགས་ཞིབ་ཕྲ་བྱས་ནས་འཚམས་འདྲིའི་རོགས་སྐྱོར་དངུལ་སྤྲད་པ་དང་། དཔྱིད་གསར་དུས་ཆེན་གྱི་སྨོན་འདུན་ཞུས་པ། ཁོང་ཚོར་གཟུགས་པོར་བདག་གཅེས་ཡག་པོ་བྱེད་དགོས་པའི་མངགས་བཅོལ་ཡང་བྱས་པ་མ་ཟད། ད་དུང་དཔེ་བཟང་བ་ཚོར་མུ་མཐུད་མིག་དཔེ་དང་སྣེ་ཁྲིད་ཀྱི་ནུས་པ་བཏོན་ཏེ་སྤྱི་ཚོགས་ལ་དྲང་ནུས་དེ་བས་མང་བ་འདོན་རྒྱུར་ལྕག་སྐུལ་བྱས་པ་རེད། ཀུན་སྤྱོད་དཔེ་བཟང་བར་སེམས་འགུལ་ཚད་མེད་ཐེབས་ནས་ཏང་དང་རྒྱལ་ཁབ་ཀྱིས་སེམས་ཁུར་དང་གཅེས་སྐྱོང་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་མ་ཟད། ཚང་མས་བདེན་ལེགས་མཛེས་གསུམ་ལག་ལེན་བསྟར་མཁན་དང་བརྒྱུད་བསྒྲགས་བྱེད་མཁན་མུ་མཐུད་བྱས་ཏེ། ཀྲུང་ཧྭའི་སྤྱོད་བཟང་རྒྱུན་འཛིན་དང་དུས་རབས་ཀྱི་སྤྱོད་ཚུལ་གསར་པ་སྐྱེད་སྲིང་བྱ་ཆེད་ལེགས་སྐྱེས་གསར་པ་འབུལ་གྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད།