༄༅།།ཀུན་ཕན་དངུལ་བུན་ལྷག་གྲངས་སྒོར་དུང་ཕྱུར་ཁྲི་སུམ་ཅུ་སོ་གསུམ་ཙམ་ཟིན་པ།

འདི་ག་ཚགས་པར་ཁང་དུ་པེ་ཅིང་ནས་ཟླ་1ཚེས་22ཉིན་གློག་འཕྲིན་འབྱོར་གསལ། ཀྲུང་གོ་མི་དམངས་དངུལ་ཁང་གིས་ཁྱབ་བསྒྲགས་བྱས་པའི་བསྡོམས་རྩིས་གྲངས་གཞི་ལས་མངོན་པར། རང་རྒྱལ་གྱི་ཀུན་ཕན་དངུལ་རྩའི་ཁྱབ་ཁོངས་ཀྱི་དངུལ་བུན་རྒྱུན་མཐུད་ཅུང་མགྱོགས་པོ་འཕར་གྱི་ཡོད་པ་དང་། 2024ལོའི་ལོ་མཇུག་བར། ཀུན་ཕན་གྲངས་ཉུང་དངུལ་བུན་གྱི་ལྷག་གྲངས་སྒོར་དུང་ཕྱུར་ཁྲི་32.93ཟིན་པ་དེ་དུས་མཚུངས་ལས་14.6%འཕར་ནས་དངུལ་བུན་འཕར་ཚད་དུས་མཚུངས་ཀྱི་དངུལ་བུན་ཁག་གི་ཆ་སྙོམས་འཕར་ཚད་ལས་མཐོ་བ་ཡོད་པ་རེད། ཀུན་ཕན་གྲངས་ཉུང་ཡིད་རྟོན་བྱེད་པོ་ཁྲི་6000ལས་བརྒལ་ནས་གཉེར་སྐྱོང་བྱེད་པོ་གསུམ་ཆ་གཅིག་ཙམ་ལ་ཁྱབ་ཡོད་པ་རེད།

2024ལོར། རང་རྒྱལ་གྱིས་བྱེད་ཐབས་མང་པོ་བཏོན་ནས་ཀུན་ཕན་དངུལ་རྩའི་གྲངས་འབོར་འཕར་ཚད་དང་། ཁྱབ་ཁྱོན་སྐྱེད་ཚད། རིན་གོང་ཆག་ཚད་བཅས་ལ་སྐུལ་འདེད་བཏང་ཡོད། ཀྲུང་གོ་མི་དམངས་དངུལ་ཁང་གིས་ཀུན་ཕན་གྲངས་ཉུང་དངུལ་བུན་གྱི་རྒྱབ་སྐྱོར་ཁྱབ་ཁོངས་དེ་བྱེད་པོ་རྐྱང་པའི་ཡིད་རྟོན་དངུལ་བུན་སྒོར་ཁྲི་1000ལས་མི་བརྒལ་བ་ནས་སྒོར་ཁྲི་2000བར་མང་དུ་བཏང་བ་དང་། ཀུན་ཕན་རྒན་གསོའི་ཆེད་དོན་དངུལ་བུན་བསྐྱར་མ་མུ་མཐུད་ལག་བསྟར་བྱས་པ། ཞིང་གསུམ་དང་ཕྲན་ཚེགས་ཁེ་ལས་ལ་རྒྱབ་སྐྱོར་བྱེད་པའི་དངུལ་བུན་བསྐྱར་མ་དང་དངུལ་འབབ་སྔ་སློག་བསྐྱར་མའི་གྲངས་བཅད་མང་དུ་འོས་འཚམ་བཏང་བ་བཅས་རེད། དངུལ་རྩ་ལྟ་འདོམས་སྤྱི་ཁྱབ་ཅུས་དང་རྒྱལ་ཁབ་འཕེལ་སྒྱུར་ཨུ་ལྷན་གྱིས་སྣེ་ཁྲིད་དེ་ཕྲན་ཚེགས་ཁེ་ལས་ཀྱི་མ་དངུལ་གྲབས་གསོག་ལ་རྒྱབ་སྐྱོར་བྱེད་པའི་མཐུན་སྦྱོར་ལས་ཀའི་ལམ་སྲོལ་བཙུགས་པ་དང་ས་གནས་ཀྱིས་དེ་མཚུངས་ཀྱི་ལས་ཀའི་ལམ་སྲོལ་བཙུགས་ཐོག་མཁོ་སྤྲོད་ཕྱོགས་གཉིས་ནས་ཤུགས་བརྒྱབ་སྟེ། ཕྲན་ཚེགས་ཁེ་ལས་ཀྱི་མ་དངུལ་གྲབས་གསོག་དཀའ་བ་དང་དངུལ་ཁང་གིས་དངུལ་བུན་གཏོང་དཀའ་བའི་གནད་དོན་སྤྱི་འདོམས་ཐག་གཅོད་བྱས་པ་རེད།

ཀུན་ཕན་དངུལ་རྩའི་སྤྱི་འབོར་རྒྱུན་ཆད་མེད་པར་འཕར་བ་དང་དུས་མཚུངས་རང་རྒྱལ་གྱིས་ཐབས་མང་མཉམ་སྤྱོད་བྱས་ནས་ཁེ་ལས་ཀྱི་མ་དངུལ་གྲབས་གསོག་བྱེད་པའི་མ་གནས་དམའ་རུ་བཏང་ཡོད། 2024ལོར། ཀྲུང་གོ་མི་དམངས་དངུལ་ཁང་གིས་ཁྲིམས་གཏན་འཁེལ་བའི་བཅོལ་དངུལ་གྲབས་གསོག་བྱེད་ཚད་ཐེངས་གཉིས་དམའ་རུ་གཏོང་བར་ཁྱོན་བརྒྱ་ཆའི་གྲངས་1བཅག་པ་དང་། ཀྲུང་དབྱང་དངུལ་ཁང་གི་སྲིད་ཇུས་སྐྱེད་ཚད་ཐེངས་གཉིས་དམའ་རུ་གཏོང་བར་ཁྱོན་བརྒྱ་ཆའི་གྲངས་0.3བཅག་ནས་དངུལ་བུན་གྱི་སྐྱེད་ཚད་བརྟན་པོའི་ངང་ཆག་པར་སྐུལ་འདེད་བཏང་བ་དང་། 2024ལོའི་ཟླ་བཅུ་གཉིས་པར། རང་རྒྱལ་གྱིས་གསར་དུ་སྤྲད་པའི་ཁེ་ལས་དངུལ་བུན་གྱི་སྐྱེད་ཚད་3.43%ཙམ་ཟིན་ནས་དུས་མཚུངས་ལས་བརྒྱ་ཆའི་གྲངས་0.36ཆག་ཡོད་པ་རེད།

(དམ་ཆོས་མི་ཕམ་གྱིས་བསྒྱུར། སྐལ་བཟང་མཆོག་སྐྱིད་ཀྱིས་ཞུས)