༄༅།།འགན་འཁྲི་ཕྲག་ཏུ་འཁུར་མཁན་འབད་འཐབ་པ་ཚང་མར་གུས་འདུད་ཞུ།

    འདི་ག་ཚགས་པར་གྱི་དཔྱད་གཏམ་མཁན་གྱིས།

    “དུས་བཞི་དང་འགྲོགས་ནས་མཉམ་དུ་ཆར་རླུང་དང་འཇའ་ཚོན་གྱི་ལམ་བུ་བརྒྱུད། འབད་འཐབ་ཀྱི་གཟུགས་བརྙན་རེ་རེ་སྤྱིར་བཏང་མིན་པའི་ལོ་འདིར་བཞག” 2024ལོར་སྐྱེལ་མ་ཞུས་ནས་2025ལོར་བསུ་བ་ཞུ་བར་ང་ཚོས་དུས་ཚོད་ཀྱི་གནས་ཚད་ཐོག་འབད་འཐབ་ཀྱི་རྗེས་ཤུལ་གསར་པ་བརྐོས་ཡོད།

    ལོ་གསར་གྱི་སྔ་ནུབ་ཏུ། ཀྲུའུ་ཞི་ཞི་ཅིན་ཕིང་གིས་2025ལོའི་ལོ་གསར་གྱི་ཤིས་ཚིག་གསུངས་ནས། མི་རྣམས་སེམས་འགུལ་ཐེབས་པ་དང་བརྗེད་པར་དཀའ་བའི་འདས་ཟིན་པའི་ལོ་གཅིག་ལ་ཕྱིར་དྲན་གནང་སྟེ། ཕུགས་འདུན་གྱི་ཆེད་དུ་འབད་བརྩོན་བྱེད་མཁན་ངལ་རྩོལ་པ་དང་། འཛུགས་སྐྲུན་པ། ལས་གཏོད་པ་བཅས་བགྲང་ལས་འདས་པར་བསྔགས་བརྗོད་གནང་ཡོད། གཟི་བརྗིད་ནི“འགན་འཁྲི་ཕྲག་ཏུ་འཁུར་མཁན་འབད་འཐབ་པ་ཚང་མར་དབང་ཡོད”ཅེས་བསྟན་ཡོད། “ཀྲུང་གོའི་ལུགས་ཀྱི་དེང་རབས་ཅན་གྱིས་སྒྱུར་བཅོས་སྒོ་དབྱེའི་ཁྲོད་དེ་བས་ཡངས་ཤིང་རྒྱ་ཆེ་བའི་མདུན་ལམ་གཏོད་ངེས་རེད”ཅེས་ནན་བཤད་གནང་ཡོད།

    འགག་རྩའི་དུས་སྐབས་དང་འགག་རྩའི་ལོ་གཅིག་རིང་འབད་འཐབ་བློ་ལ་བརྟན་པོར་ངེས་ནས་འགན་སེམས་མངོན་པར་བྱས་ཡོད།

    ལོ་འདིར། ང་ཚོར་དཀའ་སྡུག་དུ་མ་འཕྲད་རུང་སྔར་བཞིན་བློ་བག་ཡངས་པོས་ཁ་གཏད་བཅག་ཡོད། ཕྱི་རོལ་ལ་བལྟས་ན། གོ་ལ་ཧྲིལ་པོའི་དཔལ་འབྱོར་སླར་གསོ་བྱེད་ཤུགས་ཞན་པ་དང་བརྟན་པོ་མེད་པ་དང་ངེས་གཏན་མེད་པའི་རྒྱུ་རྐྱེན་མང་དུ་ཕྱིན་པ་དང་། ནང་ཁུལ་ལ་བལྟས་ན། རྒྱལ་ནང་གི་དགོས་མཁོ་མི་འདང་བ་དང་དཔལ་འབྱོར་འཕར་ཚད་ཆག་པའི་གནོན་ཤུགས་ཆེ་རུ་ཕྱིན་ཡོད། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་དང་ལས་འགན་གཙོ་བོ་བདེ་བླག་ངང་ལེགས་གྲུབ་བྱུང་བ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་གོམ་སྟབས་བརྟན་པོ་གསར་པ་སྤོས་པ། རང་རྒྱལ་གྱི་དཔལ་འབྱོར་ལ་མཉེན་ཆ་དང་མི་མངོན་པའི་སྟོབས་ཤུགས་ཧ་ཅང་ཆེན་པོ་མངོན་པ་ལ་སོགས་རེད། ལོ་གཅིག་རིང་། ང་ཚོར་ཐོབ་དཀའ་བའི་གྲུབ་འབྲས་ཐོབ་པའི་ཆེས་རྩ་བའི་རྒྱུ་མཚན་ནི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ། གནོན་ཤུགས་ཐེག་པ་དང་། དཀའ་ངལ་ཁྱད་བསད། བབ་བསྟུན་ཁ་གཏད། ཕྱོགས་བསྡུས་ཇུས་འདོན་བཅས་བྱས་ནས་རྒྱལ་ཡོངས་གོང་འོག་ཚང་མས་ལས་སྒྲུབ་གཙོ་བོར་བཟུང་བ་དང་རང་འགུལ་ངང་བྱ་སྤྱོད་སྤེལ་ཏེ་འགན་འཁྲི་ཕྲག་ཏུ་འཁུར་བའི་འབད་འཐབ་ལ་བརྟེན་ནས་འཕེལ་རྒྱས་ཡར་ཐོན་གྱི་སྐས་རིམ་བཟོས་ཡོད།

    ལོ་འདིར། ང་ཚོར་ཡིད་ཆེས་དང་སྟོབས་ཤུགས་ཆེན་པོ་ལྡན་ཡོད། ཀྲུང་གོའི་ལུགས་ཀྱི་དེང་རབས་ཅན་ནི་དམངས་འཚོ་གཙོ་བོ་ཡིན་པས། མི་དམངས་རྣམས་བདེ་སྐྱིད་ལྡན་པའི་འཚོ་བར་རོལ་ཐུབ་པ་བྱ་རྒྱུ་ནི་དོན་ཆེན་ཨང་དང་པོར་བཞག་ཡོད། ཐེན་ཧྲུའེ་ཧྭ་ཉིའུ་ཀུ་ཤུ་དང་ཏུང་ཧྲན་ཨའོ་ཅའོ་གྲོང་ཚོས་ཕྱོགས་ཡོངས་ནས་གྲོང་གསེབ་དར་རྒྱས་ལ་སྐུལ་འདེད་བཏང་བ་ལས་བྱུང་བའི་རི་གྲོང་གི་འགྱུར་ལྡོག་ཆེན་པོ་བདེན་དཔང་བྱས་པ་དང་། རྒྱལ་ཡོངས་ཀྱི་རྨང་གཞིའི་རྒན་གསོའི་དངུལ་གྱི་ཟླ་རེའི་ཚད་གཞི་དམའ་ཤོས་སྒོར་20མཐོ་རུ་བཏང་བ་དང་། གྲོང་ཁྱེར་དང་གྲོང་རྡལ་གྱི་ཁུལ་ཆུང་རྙིང་པ་ཁྲི་5ལྷག་ཙམ་གསར་དུ་སྒྱུར་བཀོད་བྱེད་འགོ་ཚུགས་པ་དེས་འཕེལ་རྒྱས་ཁྲོད་དམངས་འཚོ་འགན་སྲུང་དང་ལེགས་བཅོས་བྱེད་པའི་དོན་གཉེར་ལྷོད་མེད་མཚོན་པ། འཛད་སྤྱོད་ཐོན་རྫས་རྙིང་པ་གསར་བརྗེས་སྲིད་ཇུས་ཀྱིས་འབྲེལ་ཡོད་ཐོན་རྫས་ཕྱིར་ཚོང་བྱེད་ཚད་སྒོར་དུང་ཕྱུར་ཁྲི་1ལྷག་ཙམ་ཟིན་པར་སྤྱི་ཡོངས་ནས་སྐུལ་ཁྲིད་བྱས་པ་དང་གསོག་འབོར་ཁང་པའི་དངུལ་བུན་གྱི་སྐྱེད་ཚད་འབོར་ཆེན་དམའ་རུ་བཏང་བས་ཁྱིམ་ཚང་ཁྲི་5000ལ་ཕན་པ་ཐོབ་པ་དང་དེས་སྒྱུར་བཅོས་ལ་བརྟེན་ནས་མི་དམངས་ལ་བདེ་སྐྱིད་དེ་བས་ཆེ་བ་སྐྲུན་པའི་འཕེལ་རྒྱས་ཀྱི་གཏན་ཚིགས་གསལ་བཤད་བྱས་ཡོད། མི་དམངས་ཀྱི་བསམ་བློ་གཏོང་སར་བསམ་བློ་གཏོང་བ་དང་། མི་དམངས་ཀྱི་མངག་བྱ་ལག་ལེན་བསྟར་བ། མི་དམངས་ཀྱི་ཆེད་དུ་འབད་འཐབ་བཅས་བྱས་པས་ང་ཚོར་ཆེས་སྲ་ཞིང་བརྟན་པའི་གཞི་རྟེན་དང་སྟོབས་ཆེ་ཤོས་ཀྱི་གདེང་ཚོད་བྱུང་ཡོད།

    ཀྲུང་གོའི་ལུགས་ཀྱི་དེང་རབས་ཅན་ནི་བསྒྲུབས་ནས་བྱུང་བ་ཞིག་ཡིན་པ་དང་། བདེ་སྐྱིད་དང་མཛེས་སྡུག་ལྡན་པའི་འཚོ་བ་ནི་འབད་འཐབ་ལས་བྱུང་བ་ཞིག་རེད། འབད་འཐབ་མཁན་གྱི་ངོས་ནས་བརྗོད་ན། དུས་རབས་ནི་གར་སྟེགས་ཆེ་ཤོས་ཡིན་པ་དང་དུས་ཚོད་ནི་འགྱུར་ཚད་ཆེ་ཤོས་ཡིན། “གཞོན་ནུ་མི་རབས་ཀྱི་ཞུམ་མེད་ཡར་ཐོན་དང་བློ་སྟོབས་ཆེ་བའི་ཉམས་བཟང་གང་ལེགས་མངོན་པའི”ལུས་རྩལ་པ་ཚོ་དང་། ཉམས་འགྱུར་གསར་པ་ངོམ་པའི་མི་དམངས་བུ་ཕྲུག་དམག རང་བྱུང་གནོད་འཚེའི་མདུན་དུ་གདོང་མཆོང་བྱེད་པའི་རྒྱ་ཆེའི་ཏང་ཡོན་ལས་བྱེད་པ། རྒྱལ་ཁབ་ཀྱི་གཟེངས་རྟགས་དང་རྒྱལ་ཁབ་ཀྱི་གཟི་བརྗིད་མཚན་སྙན་ཐོབ་མཁན་སོགས་ཁོང་ཚོའི་དུས་རབས་གསར་པའི་རྫོགས་མཐའ་མེད་པའི་ཀྲུང་གོའི་སྟོབས་ཤུགས་དང་། འོད་ཆེམ་ཆེམ་དུ་འཕྲོ་བའི་ཀྲུང་གོའི་སྙིང་སྟོབས། ཡིད་ཆེས་དང་དཔའ་ངར་ཆེར་སྐྱེད་ཀྱི་ཀྲུང་གོའི་གཟུགས་བརྙན་བཅས་གཅིག་སྡུད་ཐོག་མངོན་ཡོད།

    དུས་ཚོད་ཀྱི་དོན་སྙིང་ནི་འབད་འཐབ་ལས་མངོན་པ་ཞིག་ཡིན་ཞིང་། དུས་ཚོད་ཀྱི་རིན་ཐང་ནི་འབད་འཐབ་དང་གསར་གཏོད་ལས་བྱུང་བ་ཞིག་ཡིན། 2025ལོ་ནི་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་ལོ་གལ་ཆེན་གཞན་ཞིག་ཡིན་པས། ང་ཚོས“ལོ་ལྔ་ཚན་བཅུ་བཞི་པའི”འཆར་འགོད་ཀྱི་དམིགས་ཚད་ལས་འགན་སྤུས་ཚད་མཐོ་པོས་ལེགས་འགྲུབ་བྱས་ཏེ། “ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་པར་རྨང་གཞི་བརྟན་པོ་འདིང་དགོས། ང་ཚོས་འབད་བརྩོན་བྱེད་ཐེངས་རེ་རེ་ནི་འབྱུང་འགྱུར་གྱི་ཆེད་དུ་ལམ་བུ་འདིང་བ་ཞིག་ཡིན་པ་དང་མདུན་ཕྱོགས་སུ་གོམ་པ་རེ་རེ་སྤོས་ཚེ་ཕུགས་འདུན་དང་ཇེ་ཉེར་འགྲོ་ངེས་རེད། ལོ་གསར་པར་འགན་འཁྲི་ཕྲག་ཏུ་འཁུར་ནས་ང་ཚོ་ཐུན་མོང་ཐོག་འབད་བརྩོན་བྱེད་དགོས།