༄༅།།རང་རྒྱལ་གྱི་ས་བབ་མཐོ་བའི་ཆེས་མཐོ་གནོན་གྱི་སྤེལ་རྒྱུག་ལས་གྲྭ་ཐོག་མ་སྤྱོད་འགོ་ཚུགས་པ།

    ཟླ་12ཚེས་27ཉིན། རང་རྒྱལ་གྱི་ས་བབ་མཐོ་བའི་ཆེས་མཐོ་གནོན་གྱི་སྤེལ་རྒྱུག་ལས་གྲྭ་ཐོག་མ་དང་ལྷོ་ནུབ་ས་ཁུལ་གྱི་ཆེས་མཐོ་གནོན་གྱི་སྤེལ་རྒྱུག་གློག་འདྲེན་ལས་གྲྭ་ཐོག་མ་སྟེ། རྒྱལ་ཁབ་གློག་དྲ་ཁྲོན་ཡུས་ཆན་ཧྥུའུ་1000ཟིན་པའི་ཆེས་མཐོ་གནོན་གྱི་ལས་གྲྭ་སྤྱོད་འགོ་ཚུགས་པ་རེད།

    ལས་གྲྭ་སྤྱོད་འགོ་ཚུགས་རྗེས། ལྷོ་ནུབ་གློག་དྲའི་དྲ་སྒྲོམ་གཙོ་བོའི་གློག་གནོན་རིམ་པ་ཆན་ཧྥུའུ་500ནས་ཆན་ཧྥུའུ་1000བར་མཐོ་རུ་སོང་ནས་སི་ཁྲོན་ནུབ་རྒྱུད་སོགས་ས་ཁུལ་གྱི་ནུས་རྒྱུ་གཙང་མའི་སྣ་མང་གསར་སྤེལ་དང་སྐྱེལ་གཏོང་གི་དགོས་མཁོ་སྐོང་ཐུབ་པ་དང་། ནུབ་བྱང་སོགས་ས་ཁུལ་གྱི་གློག་ནུས་དང་ལེན་ནུས་ལྡན་བྱེད་ཐུབ་པའི་ཁར། ལོ་ལྟར་ཁྲོན་ཡུས་ཁུར་ཐེག་ལྟེ་གནས་ལ་གློག་ནུས་གཙང་མ་ཆེ་ཤོས་སུ་ཆུ་ཚོད་ཆན་ཝ་དུང་ཕྱུར་350སྐྱེལ་འདྲེན་བྱེད་ཐུབ་པ་དེ་དུད་ཁྱིམ་ཁྲི་1000ཙམ་གྱི་ལོ་གཅིག་གི་འཚོ་བའི་གློག་སྤྱོད་ཚད་དང་མཚུངས་ཤིང་། ནུས་རྒྱུ་གཙང་མའི་སྤུས་ཚད་སྔར་ལས་མཐོ་བའི་སྒོ་ནས་ཡུལ་དེ་གར་འདྲེན་སྤྱོད་དང་ཁྱབ་ཁོངས་སྔར་ལས་ཆེ་བའི་སྒོ་ནས་བཀོད་སྒྲིག་ལེགས་སྒྱུར་ཐུབ་ཡོད།

    ཁྲེང་ཏུའུ་དང་ཁྲུང་ཆིང་གྲོང་ཁྱེར་གཉིས་ཀྱི་དཔལ་འབྱོར་ཁུལ་སྤྱི་ཡོངས་ཀྱི་གློག་ཤུགས་འགན་ལེན་ནུས་པ་ཆེ་རུ་བཏང་བ།

    རྒྱལ་ཁབ་གློག་དྲའི་ཆེས་མཐོ་གནོན་པུའི་འབྲེལ་ཡོད་འགན་འཁུར་བས་ངོ་སྤྲོད་བྱས་པ་ལྟར་ན། “ལོ་ལྔ་ཚན་བཅུ་བཞི་པའི”རིང་། ཁྲེང་ཏུའུ་དང་ཁྲུང་ཆིང་གྲོང་ཁྱེར་གཉིས་ཀྱི་དཔལ་འབྱོར་ཁུལ་འཛུགས་སྐྲུན་ལ་རྒྱུན་ཆད་མེད་པར་སྐུལ་འདེད་བཏང་བ་དང་ཆབས་ཅིག གློག་སྤྱོད་དགོས་མཁོ་མགྱོགས་མྱུར་འཕར་ཡོད། སྔོན་དཔག་བྱས་ན་2025ལོར་སླེབས་སྐབས། སི་ཁྲོན་དང་ཁྲུང་ཆིང་གི་གློག་སྤྱོད་ཐེག་ཚད་ཆེ་ཤོས་ཆན་ཝ་ཁྲི་7500དང་ཆན་ཝ་ཁྲི་3100ཙམ་ཟིན་ནས་2020ལོ་དང་བསྡུར་ན་48%དང་38%སོ་སོར་འཕར་རྒྱུ་ཡིན་པ་རེད།

    སི་ཁྲོན་ནི་རང་རྒྱལ་གྱི་ནུས་རྒྱུ་གཙང་མའི་ཞིང་ཆེན་ཆེན་པོ་ཞིག་རེད། ཆུ་གློག་གི་གློག་འདོན་གཞི་ཁྱོན་ཆན་ཝ་དུང་ཕྱུར་1ལས་བརྒལ་བ་དང་། རླུང་འོད་ཀྱི་ནུས་རྒྱུ་གསར་པའི་གློག་འདོན་གཞི་ཁྱོན་ཆན་ཝ་ཁྲི་1700ལས་བརྒལ་ཞིང་། སྔོན་དཔག་བྱས་ན་2025ལོར་སླེབས་སྐབས་སི་ཁྲོན་གྱི་ནུས་རྒྱུ་གསར་པའི་གློག་འདོན་ཚད་ཆན་ཝ་ཁྲི་3200ཟིན་རྒྱུ་རེད།

    གཞན་ཡང་། ལས་གྲྭ་དེས་སི་ཁྲོན་དང་ཁྲུང་ཆིང་གི་གློག་ཁུངས་དང་ཁུར་ཐེག་ལྟེ་གནས་དབར་སྦྲེལ་མཐུད་བྱས་པ་བརྒྱུད་སི་ཁྲོན་དང་ཁྲུང་ཆིང་གི་ཆེས་མཐོ་གནོན་གྱི་སྤེལ་རེས་དྲ་སྦྲེལ་མངོན་འགྱུར་བྱུང་ཞིང་། དེས་ཁྲུང་ཆིང་གི་གློག་ཤུགས་འགན་ལེན་ཆུ་ཚད་མཐོ་རུ་བཏང་བ་དང་ནུས་སྤྱོད་གྲུབ་ཆ་ལེགས་སྒྱུར་ལ་སྐུལ་འདེད་བཏང་ཡོད། ལས་གྲྭས་སི་ཁྲོན་དང་ཁྲུང་ཆིང་གློག་དྲའི་ཞིང་ཆེན་དང་ས་ཁུལ་བརྒལ་བའི་མཉམ་སྦྲེལ་མཉམ་ཕན་གྱི་ནུས་པ་ཆེ་རུ་གཏོང་ཐུབ་པ་དང་། ལྷོ་ནུབ་གློག་དྲའི་མ་ལག་གི་བརྟན་པོའི་རང་བཞིན་དང་། འཁོར་སྐྱོད་བློས་འགེལ་ཆོག་པའི་རང་བཞིན། ཐོན་ཁུངས་བཀོད་སྒྲིག་ནུས་པ་བཅས་ནུས་ལྡན་ངང་ཆེ་རུ་གཏོང་ཐུབ་ནས་ཁྲེང་ཏུའུ་དང་ཁྲུང་ཆིང་གྲོང་ཁྱེར་གཉིས་ཀྱི་དཔལ་འབྱོར་ཁུལ་སྤྱི་ཡོངས་ཀྱི་གློག་ཤུགས་འགན་ལེན་ནུས་པ་ཆེ་རུ་ཧུར་ཐག་བཏང་ཡོད།

    ཚན་རིག་ཞིབ་འཇུག་དང་ལས་གྲྭའི་ར་སྤྲོད་ཚོད་ལྟ་རིགས་145བྱས་པ།

    རང་རྒྱལ་གྱི་ས་བབ་མཐོ་བའི་ཆེས་མཐོ་གནོན་གྱི་སྤེལ་རེས་ལས་གྲྭ་ཐོག་མ་ཡིན་པའི་སྐུད་ལམ་གྱི་ས་བབ་མཐོ་ཚད་སྨི་2300ནས་སྨི་4750བར་མཐོ་རུ་སོང་ཞིང་། སྐུད་ལམ་གྱི་འཁྱགས་ཁེབས་ཆེ་ཤོས་ཧའོ་སྨི་60ཟིན་ནས་ད་ཡོད་ཀྱི་ཆེས་མཐོ་གནོན་གྱི་ལས་གྲྭའི་ཇུས་འགོད་སྒྲིག་སྲོལ་དང་སྒྲིག་ཆས་ཞིབ་འཇུག་གསར་སྤེལ་གྱི་མཚམས་ལས་བརྒལ་ཡོད། ཇུས་འགོད་ཚན་རིག་ཞིབ་འཇུག་ཚོགས་པས་སྔ་རྗེས་སུ་ཚན་རིག་ཞིབ་འཇུག་དང་ལས་གྲྭའི་ར་སྤྲོད་ཚོད་ལྟ་རིགས་145བྱས་ནས་མཁའ་རླུང་གི་བར་གསེང་དང་། ཕྱི་གློག་འབྲེལ་གཅོད། གློག་སྡུད་ཁོར་ཡུག་སོགས་ས་བབ་མཐོ་བའི་ཆེས་མཐོ་གནོན་གྱི་འགག་རྩའི་ལག་རྩལ་གྱི་དཀའ་གནད་ཁྱད་བསད་བྱས་ནས་རྗེས་མཐུད་ཀྱི་ས་བབ་མཐོ་བ་དང་ཚབས་ཆེའི་འཁྱགས་ཁུལ་གྱི་ལས་གྲྭ་ལ་རྨང་གཞི་བཏིང་ཡོད་པ་རེད།

    ཁྲོན་ཡུས་ཆེས་མཐོ་གནོན་དཀར་མཛེས་གློག་སྒྱུར་ས་ཚུགས་སུ་ཆན་ཧྥུའུ1000ཟིན་པའི་གློག་གནོན་སྒྱུར་ཆས་རྐྱང་པའི་ལྗིད་ཚད་ཏུན་330ལྷག་ཙམ་ཟིན་ཡོད། ལམ་ཀྱོག་མང་བ་དང་ལོ་ལྟར་གངས་གསོག་ཐེབས་པའི་རྒྱུ་ལ་ནས“བོངས་ཚད་ཆེ་བའི”གློག་གནོན་སྒྱུར་ཆས་དེ་བདེ་བླག་ངང་དབོར་་ཐུབ་པར་བྱ་ཆེད། རྣམ་གྲངས་ཚོགས་པས“ལྷུ་ལག་ཕྲལ་ནས་སྐྱེལ་འདྲེན་དང་ཡུལ་དངོས་སུ་སྒྲིག་སྦྱོར”གྱི་ཇུས་གཞི་སྤྱད་དེ་གློག་གནོན་སྒྱུར་ཆས་དེ་ཁག་16ལ་ཕྲལ་ནས་སླར་ཡང་སྒྲིག་སྦྱོར་བྱས་པ་རེད།

     མ་འཇོག་བརྟན་པོ་དང། ལས་ཞུགས་སྐུལ་གཏོང་། དམངས་འཚོར་ཕན་པ་བཅས་ཀྱི་ཁྲོད་ནུས་པ་གལ་ཆེན་བཏོན་པ།

     སི་ཁྲོན་དང་ཁྲུང་ཆིང་གི་ཆེས་མཐོ་གནོན་ལས་གྲྭ་ནི་སི་ཁྲོན་དཀར་མཛེས་བོད་རིགས་རང་སྐྱོང་ཀྲོའུ་ནས་འགོ་ཚུགས་ནས་ཁྲུང་ཆིང་ཐུང་ལེང་ཆུས་སུ་མཇུག་འགྲིལ་ཞིང་། ཆན་ཧྥུའུ་1000ཟིན་པའི་སྐུད་ལམ་སྤྱི་ལེ་1316དང་ཆན་ཧྥུའུ་1000ཟིན་པའི་གློག་སྒྱུར་ས་ཚུགས་4གསར་དུ་བསྐྲུན་པར་མ་དངུལ་གཏོད་འབོར་སྒོར་དུང་ཕྱུར་286ལས་བརྒལ་ཡོད། ལས་གྲྭས་མ་འཇོག་བརྟན་པོ་དང་། ལས་ཞུགས་སྐུལ་གཏོང་། དམངས་འཚོར་ཕན་པ་བཅས་ཀྱི་ནུས་པ་གལ་ཆེན་འདོན་བཞིན་ཡོད།

    རྒྱལ་ཁབ་གློག་དྲ་ཀུང་སིས་རིམ་རྩིས་བརྒྱབ་ན“འབྲེལ22དང་དྲང་16”གི་ཆེས་མཐོ་གནོན་ལས་གྲྭ་ཁག་38བསྐྲུན་པ་དང་། གློག་དྲའི་ཤོང་ཚད་ཆེན་པོ་དང་ཐག་རིང་གི་གློག་འདྲེན་ནུས་པ་མངོན་གསལ་དོད་པོས་ཆེ་རུ་སོང་ཞིང་། “ནུབ་གློག་ཤར་སྐྱེལ”དང“བྱང་གློག་ལྷོ་སྤྲོད”ཀྱི་གཞི་ཁྱོན་རྒྱུན་ཆད་མེད་པར་ཆེ་རུ་ཕྱིན་ཡོད་པ་རེད།