༄༅།།རྫ་དེ་མ་མོག་འདབས་སུ་མཐའ་བསྡུར་བྱས་པ།

ཤིན་ཧྭ་གསར་འགྱུར་ཁང་ལན་ཀྲོའུ་ནས་ཟླ་11ཚེས་13ཉིན་གློག་འཕྲིན་འབྱོར་གསལ། ཚེས་12ཉིན་གྱི་ཕྱི་དྲོར། མཐའ་མའི་ཤུ་སྒྲ་གྲགས་པ་དང་བསྟུན་ཐེ་བོ་རྫོང་དུ“ལ་གཟར་འགག་ཞི་མཐུན་བུམ་པའི”ལན་ཆིའུ་སྤོ་ལོའི་གདན་ཞུའི་འགྲན་བསྡུར་མཇུག་འགྲིལ་ཞིང་། མཐར་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཀྲོའུ་ནས་ཡིན་པའི་ཐེ་བོ་རྫོང་གི་འཐུས་མི་རུ་ཁག་གིས་87：85ཡི་ཐོག་ནས་ཀན་སུའུ་ཞིང་ཆེན་ཀ་ཆུ་ཧུའེ་རིགས་རང་སྐྱོང་ཀྲོའུ་ཡི་ཁང་ལེ་རྫོང་གི་འཐུས་མི་རུ་ཁག་ལས་རྣམ་པར་རྒྱལ་ཏེ་ས་མཐོའི་འགྲན་ར་གཙོ་བོར་ཨང་དང་པོ་བླངས་པ་རེད། ད་རེས་ཀྱི་འགྲན་བསྡུར་ནང་མཚོ་སྔོན་དང་། ཡུན་ནན། སི་ཁྲོན། ཀན་སུའུ་བཅས་ཀྱི་ས་མཐོའི་ཡུལ་གྱི་འཐུས་མི་རུ་ཁག་22ཞུགས་ཡོད་པ་རེད།

མཐའ་བསྡུར་བྱ་ཡུལ་ནི་ཐེ་བོ་རྫོང་གི་ལུས་རྩལ་ལུས་སྦྱོང་ལྟེ་གནས་སུ་ཡོད་ཅིང་། དགུན་དུས་ཀྱི་ཐེ་བོ་ས་ཆར་གྲང་རླུང་ལྡང་སྟེ་ནགས་རི་ནས་ལན་ཆིའུ་སྤོ་ལོ་ཐང་གི་ཕྱི་རོལ་དུ་ལྷགས་པ་འཚུབ་ནའང་། ལྟད་མོ་བ་ཚོའི་དགའ་འབོད་དང་སྤོ་ལོ་རྒྱག་མཁན་དག་གི་སྤྲོ་སེམས་ལ་ཉམས་པ་མེད།

ལོ་30ལ་སླེབས་པའི་ཀླུ་འབུམ་རྒྱ་མཚོ་ནི་ཐེ་བོ་རྫོང་གི་འཐུས་མི་རུ་ཁག་གི་ཁོངས་མི་ཞིག་ཡིན་ལ་སྤོ་ལོ་ཚོད་འཛིན་གྱི་རྒྱབ་སྲུང་བ་ཞིག་ཡིན། དེ་སྔོན་རྒྱལ་ཡོངས་ཀྱི་སྐྱེས་པའི་ལན་ཆིའུ་སྤོ་ལོའི་མཉམ་འགྲན་ནང་ཞུགས་མྱོང་བ་དང་ད་ཆ་ཕ་ཡུལ་གྱི་ཚབ་བྱས་ནས་སྤོ་ལོ་ཐང་དུ་བསྐྱོད།

“ད་རེས་ཐེ་བོའི་ཚབ་བྱས་ཏེ་འགྲན་ར་གཙོ་བོར་འགྲན་བསྡུར་བྱེད་ཐུབ་པ་དང་། ངའི་ཕུགས་འདུན་ཡང་གྲུབ་སོང”ཞེས་ཀླུ་འབུམ་རྒྱ་མཚོས་བཤད།

ཐེ་བོ་རྫོང་གི་འཐུས་མི་རུ་ཁག་གི་མཚོན་རྟགས་ནི་ངར་སྐད་སྒྲོག་པའི་ནགས་ཁྲོད་ཀྱི་སྟག་རྒོད་ཅིག་ཡིན་ལ། རྫོང་གྲོང་གི་ལྷོ་ནུབ་ཕྱོགས་ཀྱི་རྫ་དེ་མ་མོག་ནས་རིག་ཀློང་རྙེད་པ་དང་རི་དེ་ནི་སྟག་མགོ་ཞིག་དང་འདྲ་བས་མིང་དེ་ལྟར་ཐོགས། རྫ་དེ་མ་མོག་འདབས་སུ་ཀླུ་འབུམ་རྒྱ་མཚོའི་བྱིས་དུས་ཀྱི་དྲན་འཆར་ཞིག་ཡོད་ལ་གཞོན་ནུའི་དུས་ནས་བཟུང་ཁོང་དང་ལན་ཆིའུ་སྤོ་ལོ་དབར་ལས་འབྲེལ་ཟབ་མོ་ཆགས།

ཀླུ་འབུམ་རྒྱ་མཚོ་དམའ་རིམ་སློབ་འབྲིང་ནས་བཟུང་ལན་ཆིའུ་སྤོ་ལོ་རྒྱག་རྒྱུར་དགའ་པོ་ཡོད། དེ་དུས་རྫོང་གྲོང་ཡོངས་ལ་ལན་ཆིའུ་སྤོ་ལོ་ཐང་རེ་གཉིས་ལས་མེད་པ་དང་ཤིང་གི་ལན་ཆིའུ་སྤོ་ལོའི་སྒྲོམ་ས་ངོས་སུ་བཙུགས་ཡོད་པ་ནི་ལན་ཆིའུ་སྤོ་ལོ་ཐང་རེད། འོན་ཀྱང་ལོ་ན་གཞོན་པའི་ཀླུ་འབུམ་རྒྱ་མཚོའི་ངོས་ནས་བརྗོད་ན་འོད་འདུས་གློག་སྒྲོན་ཡོད་མེད་དེ་གལ་ཆེན་པོ་མིན་པར་གལ་ཆེ་བ་ནི་སྐྱིད་པོ་ཡོད་པ་དེ་རེད།

“ཆུང་དུས་ཆ་རྐྱེན་ཡག་པོ་མེད་པས་ང་ཚོས་མཉམ་དུ་དངུལ་བསྡུས་ཏེ་སྒོར་40ལྷག་ཙམ་སྤྲད་ནས་འགྱིག་གི་ལན་ཆིའུ་སྤོ་ལོ་ཉོས་པ་ཡིན། བརྒྱུད་རིམ་ལྡན་པའི་སྦྱོང་བརྡར་ཡང་མེད་པར་གང་འདོད་དུ་རྩེ་ཡི་ཡོད”ཅེས་ཀླུ་འབུམ་རྒྱ་མཚོས་བརྗོད།

2019ལོར་ཀླུ་འབུམ་རྒྱ་མཚོ་སྤོ་ལོའི་རུ་ཁག་ནས་ཐོན་ཏེ་ཕ་ཡུལ་དུ་ལོག ད་ཆ་ཁོང་ནི་ནགས་རའི་ལས་བཟོ་བ་ཞིག་ཡིན་མོད་ལན་ཆིའུ་སྤོ་ལོ་བློས་བཏང་མེད། ཁོང་གིས་ད་དུང“ཀུན་གྱི་རེ་སྨོན”ཞེས་པའི་ལན་ཆིའུ་སྤོ་ལོའི་གསོ་སྦྱོང་སྒྲིག་གཞི་ཞིག་གཉེར་ནས་ལས་ཀའི་དུས་ཚོད་ལ་ལས་ཀར་འགྲོ་བ་དང་ངལ་གསོའི་དུས་ཚོད་དུ་ཕྲུ་གུ་ཚོར་ལན་ཆིའུ་སྤོ་ལོ་བསླབས་ཏེ་མ་འོངས་པའི་ལན་ཆིའུ་སྤོ་ལོའི་ཤེས་ལྡན་པ་གསོ་སྐྱོང་བྱེད་ཀྱི་ཡོད།

“སྲིད་གཞུང་གིས་ང་ཚོར་རྒྱབ་སྐྱོར་ཆེན་པོ་བྱེད་ཀྱི་འདུག ང་ཚོར་རིན་མི་དགོས་པར་ལུས་རྩལ་ཐང་བེད་སྤྱོད་དུ་འཇུག་པ་མ་ཟད། ད་ཆ་ཁྱིམ་བདག་ཚོས་ཀྱང་ཕྲུ་གུར་ལུས་སྦྱོང་མང་ཙམ་བྱེད་པར་བསྐུལ་ནས་ལན་ཆིའུ་སྤོ་ལོ་དེ་སྟབས་བདེའི་རོལ་རྩེད་ཙམ་ལ་རྩི་ཡི་མེད”ས་མཐོར་འཚར་ལོངས་བྱུང་བའི་ཕྲུ་གུ་ཕལ་ཆེ་བ་ཐེག་ཤུགས་ཆེ་བ་དང་ལུས་རྩལ་ཐད་ལེགས་ཆ་ཡོད་པས། ངས་ཕྲུ་གུ་ཚོར་བརྒྱུད་རིམ་ལྡན་པའི་སྦྱོང་བརྡར་བྱས་ནས་ལན་ཆིའུ་སྤོ་ལོར་དགའ་མཁན་ལོ་ཆུང་ཚོ“ལམ་ལོག”ཏུ་མི་འགྲོ་བར་བྱ་རྒྱུ་ཡིན་ཞེས་ཀླུ་འབུམ་རྒྱ་མཚོས་བཤད།

ལན་ཆིའུ་སྤོ་ལོ་རྒྱག་མཁན་གཞོན་ནུ་ཕྱིར་ལོག་ནས་རྩལ་ཁྲིད་པར་གྱུར་པ་དང་ཐེ་བོ་རྫོང་གྲོང་ཆུང་ཆུང་དེའི་ལུས་རྩལ་བྱ་གཞག་ཀྱང་མགྱོགས་མྱུར་འཕེལ་རྒྱས་འགྲོ་བཞིན་ཡོད། གསར་འགོད་པས་ཤེས་རྟོགས་བྱས་པར་གཞིགས་ན། མིག་སྔར་ལུས་རྩལ་ལུས་སྦྱོང་ལྟེ་གནས་མ་ཟད་ད་དུང་ཐེ་བོ་རྫོང་གིས་སྲིད་འཛིན་གྲོང་ཚོ་དང་དེ་བཞིན་ཆ་རྐྱེན་ཡོད་པའི་རང་བྱུང་གྲོང་ཚོ་52ལ“གྲོང་ཚོ་རེར་ལུས་རྩལ་ར་བ་རེ”བསྐྲུན་ནས་ཁག་165ཡོད་པ་དང་། ལན་ཆིའུ་སྤོ་ལོའི་སྒྲོམ་དང་། ལུས་སྦྱོང་བྱེད་ཐབས། ཕིང་ཕང་སྤོ་ལོའི་སྟེགས་བུ་སོགས་ཀྱི་ལུས་སྦྱོང་ཡོ་བྱད་གཅིག་གྱུར་ཐོག་བསྒར་ཡོད། བསྡོམས་རྩིས་བྱས་པ་ལྟར་ན། ཐེ་བོ་རྫོང་གི་ལུས་རྩལ་ལུས་སྦྱོང་ར་བའི་རྒྱ་ཁྱོན་སྨི་ངོས་གྲུ་ཁྲི་10ཙམ་དང་མི་རེའི་ཆ་སྙོམས་ལུས་སྦྱོང་རྒྱ་ཁྱོན་སྨི་ངོས་གྲུ་1.95ཟིན་ཡོད། མིག་སྔར་ལུས་རྩལ་འགྲན་བསྡུར་ནི་ཡུལ་དེ་གའི་ས་ཁོངས་ཧྲིལ་པོ་དང་དུས་ཚིགས་ཧྲིལ་པོའི་ཡུལ་སྐོར་འཕེལ་རྒྱས་གཏོང་བའི་འདེགས་སྐྱོར་གལ་ཆེན་དུ་གྱུར་ཡོད་པ་རེད།

（གནམ་ཕྱུག་རྒྱལ་གྱིས་བསྒྱུར། ཚེ་བརྟན་སྒྲོལ་དཀར་གྱིས་ཞུས）