༄༅།།བུ་བཅོལ་ཁང་དང་སློབ་ཆུང་སློབ་མའི་རྒྱང་སྒྲིབ་ནད་སྔོན་འགོག་ ཚོད་འཛིན་ལས་དོན་ལ་ཤུགས་སྣོན་བརྒྱབ་པ།

    འདི་ག་ཚགས་པར་ཁང་དུ་པེ་ཅིང་ནས་ཟླ་11ཚེས་12ཉིན་གློག་འཕྲིན་འབྱོར་གསལ། ཉེ་ཆར་སློབ་གསོ་པུས་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་དང་རྒྱལ་ཁབ་ནད་ཡམས་སྔོན་འགོག་ཚོད་འཛིན་ཅུས་དང་མཉམ་དུ་བརྡ་ཐོ་བཀྲམ་པའི་ནང་། སྔོན་འགོག་ཚོད་འཛིན་གྱི་འགག་སྒོ་མདུན་དུ་སྤོས་ནས་བུ་བཅོལ་ཁང་དང་སློབ་ཆུང་སློབ་མའི་རྒྱང་སྒྲིབ་ནད་སྔོན་འགོག་ཚོད་འཛིན་གྱི་འགག་རྩའི་དུས་མཚམས་ཀྱི་སྔོན་འགོག་ཚོད་འཛིན་ལས་དོན་ལ་དམ་འཛིན་ནན་པོ་བྱས་ཏེ། བྱིས་པ་དང་སློབ་ཆུང་སློབ་མར་རྒྱང་སྒྲིབ་ནད་ཐོན་ཚད་ཉུང་དུ་ནུས་ལྡན་གཏོང་དགོས་པའི་བླང་བྱ་བཏོན་ཡོད་པ་རེད།

    ཆ་རྐྱེན་བསྐྲུན་ནས་ཕྱི་རོལ་བྱེད་སྒོའི་དུས་ཚོད་འདང་ངེས་ཡོང་བར་འགན་ལེན་བྱེད་དགོས། བུ་བཅོལ་ཁང་གི་དགེ་རྒན་དང་ཁྱིམ་བདག་གིས་བྱིས་པ་ཁྲིད་དེ་རོལ་རྩེད་གཙོ་བོར་བྱེད་པའི་ཕྱི་རོལ་བྱེད་སྒོ་དང་འོས་ཤིང་འཚམ་པའི་ལུས་རྩལ་བྱེད་སྒོར་ཞུགས་རྒྱུའི་ལྕག་སྐུལ་བྱས་ནས། བྱིས་པ་ཚོའི་ཉིན་རེའི་ཕྱི་རོལ་བྱེད་སྒོའི་དུས་ཚོད་ཆུ་ཚོད་2ལས་མི་ཉུང་བར་འགན་ལེན་བྱེད་དགོས། སློབ་ཆུང་སློབ་མ་སློབ་གསེང་སྐབས་ཕྱི་རོལ་བྱེད་སྒོར་ཞུགས་པའམ་ཡང་ན་རྒྱང་ལྟ་བྱ་རྒྱུའི་སྒྲིག་འཛུགས་དང་ལྟ་སྐུལ་བྱས་ནས། སློབ་རའི་ལུས་རྩལ་སྦྱོང་བརྡར་དུས་ཡུན་རིང་དུ་གཏོང་དགོས། སློབ་ཆུང་ཁག་ལ་སློབ་ཁང་གི་སྒོ་ཁའམ་ཡང་ན་སྤྱི་པའི་ཁུལ་དུ“བྱེད་སྒོ་ཆུང་གྲས་སྤེལ་ཁུལ”འཛུགས་རྒྱུའི་ལྕག་སྐུལ་བྱེད་དགོས།

    ཁྱིམ་བདག་ཚོའི་སྨན་བཅོས་ལ་མཐོང་ཆེན་དང་སྔོན་འགོག་ལ་སྣང་ཆུང་བྱེད་པའི་འདུ་ཤེས་སྒྱུར་དགོས་པ་སྟེ། བུ་བཅོལ་ཁང་དང་སློབ་ཆུང་ཁག་ལ་ཁྱིམ་བདག་ཚོགས་འདུ་དང་ཁྱིམ་བདག་ཨུ་ལྷན་སོགས་ཀྱི་ནུས་པ་འདོན་སྤེལ་བྱས་ཐོག ཁྱིམ་བདག་ལ་དམིགས་པའི་དྲིལ་བསྒྲགས་སློབ་གསོ་སྤེལ་ནས་རྒྱང་སྒྲིབ་ནད་སྔོན་འགོག་ཚོད་འཛིན་བྱེད་པའི་ཁྱིམ་ཚང་གི་འདུ་ཤེས་ཟབ་ཏུ་གཏོང་རྒྱུར་མཛུབ་ཁྲིད་བྱེད་དགོས། ཁྱིམ་བདག་ལ་བྱིས་པ་དང་སློབ་ཆུང་སློབ་མར་མིག་ཤེད་ཁོར་ཡུག་བཟང་པོ་སྐྲུན་པ་དང་བྱིས་པས་གློག་རྡུལ་ཐོན་རྫས་སྤྱོད་རྒྱུར་ལྟ་འདོམས་བྱེད་པའི་འདུ་ཤེས་ཟབ་ཏུ་གཏོང་རྒྱུའི་མཛུབ་ཁྲིད་བྱེད་དགོས། ཁྱིམ་བདག་ལ་ཕྲུ་གུ་ཕྱི་རོལ་དུ་ཕྱིན་ནས་འགུལ་སྐྱོད་མང་ཙམ་བྱ་རྒྱུར་ཁྲིད་སྟོན་བྱེད་པ་དང་སློབ་གྲྭས་མིག་ཤེད་ལྟ་ཞིབ་ཚད་ལེན་སོགས་ཀྱི་ལས་དོན་སྤེལ་རྒྱུར་གཞོགས་འདེགས་བྱ་རྒྱུའི་མཛུབ་ཁྲིད་བྱེད་དགོས།

    “གཅིག་དྲུག”གི་རྒྱང་སྒྲིབ་ནད་སྔོན་འགོག་ཚོད་འཛིན་བླང་བྱ་དོན་འཁྱོལ་གཏིང་ཟབ་བྱེད་དགོས་པ་སྟེ། སློབ་ཆུང་ཚང་མར“འཛིན་གྲྭ་རེར་ཚད་ལྡན་གཏད་གྲངས་མིག་ཤེད་དཔྱད་རིས་གཅིག་སྦྱར་བ་དང་། སློབ་ཆུང་སློབ་མས་ཉིན་རེའི་སྔ་དྲོ་དང་ཕྱི་དྲོ་གཉིས་ཀར་མིག་སྲུང་སྦྱོང་བརྡར་ཐེངས་གཅིག་བྱེད་པ། ཟླ་རེར་འཛིན་གྲྭའི་ནང་མིག་ཤེད་རང་བཤེར་ཐེངས་གཅིག་བྱེད་པ། དུས་ཚིགས་རེར་རྒྱང་སྒྲིབ་ནད་སྔོན་འགོག་ཚོད་འཛིན་བྱེད་སྟངས་ཁྱབ་གདལ་ཐེངས་གཅིག་གཏོང་བ། སློབ་དུས་རེ་ཚོགས་མ་ཐག་ཆེད་དོན་བཀོད་སྒྲིག་ཐེངས་གཅིག་བྱེད་པ། ལོ་རེར་སློབ་གྲྭ་ཡོངས་ཀྱི་སློབ་མའི་མིག་ཤེད་ལ་རྗེས་སྙེགས་ཞིབ་བསྡུར་དབྱེ་ཞིབ་ཐེངས་གཅིག་བྱེད་པ”བཅས་ཀྱི“གཅིག་དྲུག”གི་རྒྱང་སྒྲིབ་ནད་སྔོན་འགོག་ཚོད་འཛིན་གྱི་བླང་བྱ་དོན་འཁྱོལ་བྱ་རྒྱུར་སྐུལ་འདེད་གཏོང་དགོས།

    རང་འགུལ་ངང་མིག་ཤེད་ཁོར་ཡུག་ལེགས་སུ་གཏོང་དགོས་པ་སྟེ། སློབ་གྲྭས་ཚད་གཞི་དང་མཐུན་པའི་སྒྲོག་ཙེ་དང་རྐུབ་སྟེགས་ཉོས་ནས་སློབ་ཆུང་སློབ་མ་ཚོར་མིག་སྤྱོད་འཕྲོད་བསྟེན་གྱི་བླང་བྱ་དང་མཐུན་པའི་སློབ་གྲྭའི་ཁོར་ཡུག་མཁོ་འདོན་བྱེད་དགོས། “དཀར་ཆ་དོད་པའི་སློབ་གྲྭའི”ལས་གྲྭ་ཕྱོགས་ཡོངས་ནས་ལག་བསྟར་གཏིང་ཟབ་བྱས་ཐོག་ཚད་གཞིར་ནན་པོར་གཞིགས་ནས་སློབ་ཁང་དང་། ཉལ་ཁང་། དཔེ་མཛོད་ཁང（དཔེ་གཟིགས་ཁང）སོགས་ཀྱི་དཀར་ཆ་དང་གློག་སྒྲོན་གྱི་བླང་བྱ་དོན་འཁྱོལ་ནན་པོ་བྱས་ནས་མིག་ཤེད་བདེ་ཐང་ལ་ཕན་པའི་གློག་སྒྲོན་སྒྲིག་ཆས་བསྒར་དགོས།

    མིག་ཤེད་ལྟ་ཞིབ་ཚད་ལེན་དང་ཉེན་ཟོན་སྔོན་བརྡའི་ནུས་པ་ཆེ་རུ་གཏོང་དགོས་པ་སྟེ། བུ་བཅོལ་ཁང་ཁག་གིས་བྱིས་པའི་བདེ་ཐང་བརྟག་དཔྱད་ལམ་ལུགས་དོན་འཁྱོལ་བྱས་ནས་ལོ་ཕྱེད་རེར་བྱིས་པའི་མིག་ཤེད་ལ་ཞིབ་བཤེར་རེ་བྱེད་དགོས། སློབ་ཆུང་ཁག་གིས་སློབ་མའི་བདེ་ཐང་བརྟག་དཔྱད་ལམ་ལུགས་དང་སློབ་དུས་རེར་སློབ་མའི་མིག་ཤེད་ལ་ལྟ་ཞིབ་ཚད་ལེན་ཐེངས་གཉིས་རེ་བྱེད་པའི་ལམ་ལུགས་དོན་འཁྱོལ་ནན་པོ་བྱེད་དགོས། བུ་བཅོལ་ཁང་དང་སློབ་ཆུང་གིས་ཁྱིམ་བདག་ལ་ཕྲུ་གུ་དང་སློབ་ཆུང་སློབ་མའི་མིག་ཤེད་རྒྱུན་གཏན་མིན་པའི་གནས་ཚུལ་དུས་ཐོག་ཏུ་ཤོད་དགོས། སྨན་བཅོས་འཕྲོད་བསྟེན་སྒྲིག་གཞིས་མིག་ཤེད་ལྟ་ཞིབ་ཚད་ལེན་གྲུབ་འབྲས་རྒྱུན་གཏན་མིན་པའི་བྱིས་པ་དང་སློབ་ཆུང་སློབ་མར་སྔར་བས་བརྟག་དཔྱད་དང་དམིགས་སའི་རང་བཞིན་ལྡན་པའི་མཛུབ་ཁྲིད་བྱེད་དགོས། རྒྱང་རིང་མཐོང་ཚད་ལ་ལྟ་ཞིབ་ཚད་ལེན་བྱས་ནས་རྒྱང་རིང་པོ་གསལ་པོར་མི་མཐོང་བའི་བྱིས་པ་དང་སློབ་ཆུང་སློབ་མར་ཉེན་ཟོན་སྔོན་བརྡ་བཏང་ནས་དྲན་སྐུལ་བྱེད་དགོས།

    “གཉིས་ཡང”སྲིད་ཇུས་དོན་འཁྱོལ་བྱེད་དགོས་པ་སྟེ། སློབ་ཁྲིད་དོ་དམ་ལ་ཤུགས་སྣོན་བརྒྱབ་ནས་སློབ་ཆུང་དུ་ཚད་ལས་བརྒལ་ནས་སློབ་ཁྲིད་བྱེད་པ་དང་རྩ་འཛིན་ལས་བརྒལ་ནས་སློབ་ཁྲིད་བྱེད་པ་གཏན་འགོག་བྱེད་དགོས། སློབ་ཕྱིའི་གསོ་སྦྱོང་སྒྲིག་གཞིར་དོ་དམ་ནན་པོ་བྱེད་པ་དང་དྲ་ཐོག་གསོ་སྦྱོང་སྒྲིག་གཞིའི་སློབ་ཚན་གཅིག་ལ་སྐར་མ་30ལས་མི་བརྒལ་བ་དང་སློབ་ཚན་བར་གསེང་སྐར་མ་10ལས་མི་ཉུང་བ་བྱེད་དགོས།