༄༅།།ཐེན་ཅིན་དང་། ཀན་སུའུ། ཀོང་ཤིས། ཧེ་ལུང་ཅང་བཅས་ཀྱིས།“རྒྱལ་ཁབ་སྟོབས་ཆེན་དང་མི་རིགས་བསྐྱར་དར་ཡོང་བར་
ང་ཡིས་འབད”ཅེས་པའི་མང་ཚོགས་རང་བཞིན་གྱི་བརྗོད་དོན་གཙོ་བོའི་དྲིལ་བསྒྲགས་
སློབ་གསོའི་བྱེད་སྒོ་གཏིང་ཟབ་སྤེལ་བ།

    འདི་ག་ཚགས་པར་གྱི་གསར་འགོད་པས།

     རིག་གནས་འགྲེམས་འཁྲབ་དང་། བརྗོད་དོན་གཙོ་བོའི་སྒྲོག་འགྲེལ། ཁྱད་ལྡན་འགྲེམས་སྟོན་སོགས་ས་གནས་ཁག་གིས“རྒྱལ་ཁབ་སྟོབས་ཆེན་བསྐྱར་དར་ཡོང་བར་ང་ཡིས་འབད”ཅེས་པའི་མང་ཚོགས་རང་བཞིན་གྱི་བརྗོད་དོན་གཙོ་བོའི་དྲིལ་བསྒྲགས་སློབ་གསོའི་བྱེད་སྒོ་གཏིང་ཟབ་སྤེལ་ནས་མང་ཚོགས་རྒྱ་ཁྱབ་ངང་ཞུགས་རྒྱུའི་ཡིད་དབང་བཀུག་སྟེ། མཐུན་སྒྲིལ་འབད་འཐབ་དང་བྱ་སྤྱོད་ལ་བརྟེན་ནས“རྒྱལ་ཁབ་སྟོབས་ཆེན་དང་མི་རིགས་བསྐྱར་དར་ཡོང་བའི”ཕུགས་འདུན་མངོན་འགྱུར་བྱེད་པའི་སྟོབས་ཤུགས་ཆེན་པོ་གཅིག་ཏུ་བསྒྲིལ་ཡོད།

     “མཛེས་སྡུག་ལྡན་པའི་ཐེན་ཅིན་གྲོང་ཁྱེར་རི་མོ་ལྟར་མཛེས། བདེ་སྐྱིད་ལྡན་པའི་ཐེན་ཅིན·ང་རང་ཉིད་ཀྱི་ཁྱིམ་ལ་དགའ”ཐེན་ཅིན་གྲོང་ཁྱེར་ཧོ་ཕིང་ཆུས་ནན་ཡིང་མོན་ཁྲོམ་གཞུང་གི་ཐེན་ཅིན་ལུགས་ཀྱི་རིག་གནས་དམངས་ཕན་འཁྲབ་སྟོན་ཟློས་གར་ཁང་དུ་འཛུལ་སྐབས། དགོད་བྲོའི་གཏམ་གླེང་གི་འཁྲབ་སྟོན་པས་ལྟད་མོ་བ་དང་མཉམ་དུ་སྨྱུག་རོལ་མགྱོགས་གཏམ་བཤད་ནས་གསར་རྩོམ་ཟློས་གར《ཐེན་ཅིན་སྒྱུར་བཅོས་ཀྱི་ཞོགས་པའི་མཚམས་སྤྲིན་བསུ》ཞེས་པ་འཁྲབ་སྟོན་བྱེད་བཞིན་ཡོད་པ་དང་དེ་ལས་རིག་གནས་ཀྱི་ཉམས་འགྱུར་ཟབ་མོ་རབ་ཏུ་ཚོར།

     “ང་ཚོས་ཁྱད་ལྡན་རིག་གནས་བྱེད་སྒོར་བརྟེན་ནས་ས་གནས་དེ་གའི་གཏམ་རྒྱུད་ཡག་པོ་ཤོད་པ་དང་། རིག་གནས་ཀྱི་སྐད་སྒྲ་བརྒྱུད་སྤྲོད། མང་ཚོགས་ཀྱི་མོས་སེམས་ཆེ་རུ་གཏོང་བ་བཅས་མཐའ་འཁྱོངས་བྱས་ཏེ། མང་ཚོགས་ཀྱིས་ཐེན་ཅིན་ལུགས་ཀྱི་རིག་གནས་མྱོང་རོལ་བྱེད་རིང་་རིག་གནས་ཀྱི་གདེང་ཚོད་བརྟན་དུ་གཏོང་བ་དང་། རིག་གནས་ཀྱི་མོས་སེམས་ཆེ་རུ་གཏོང་བ། ཏང་གི་བཀའ་དྲིན་ཚོར་བ། ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ་བཅས་ཐུབ་པར་བྱེད་ཀྱི་ཡོད”ཅེས་ནན་ཡིང་མོན་ཁྲོམ་གཞུང་ཏང་གི་ལས་དོན་ཨུ་ལྷན་གྱི་ཧྲུའུ་ཅི་ཡེ་མིང་གིས་བཤད། མིག་སྔའི་བར་ཁྲོམ་གཞུང་གི་དམངས་ཕན་ཟློས་གར་ཁང་དུ་འཁྲབ་སྟོན་ཐེངས་20ཙམ་བྱས་ཡོད་པ་རེད།

     ད་ལོ་ཚུན་དུ་ཐེན་ཅིན་གྲོང་ཁྱེར་གྱིས“རྒྱལ་ཁབ་སྟོབས་ཆེན་དང་མི་རིགས་བསྐྱར་དར་ཡོང་བར་ང་ཡིས་འབད། རིག་གནས་ལ་བརྟེན་ནས་མི་སེམས་བརླན་པའི”རིམ་སྤེལ་བྱེད་སྒོ་གཏིང་ཟབ་སྤེལ་བ་དང་། སྡེ་ཚན་མང་པོའི་ཐོན་ཁུངས་བསྡུ་སྒྲིལ་བྱེད་པ། མང་ཚོགས་ཞུགས་འདོད་པ་དང་ཞུགས་བདེ་བའི་སྟེགས་བུ་སྐྲུན་པ། སྣ་མང་ཕུན་སུམ་ཚོགས་པའི་རིག་གནས་བྱེད་སྒོར་བརྟེན་ནས་ཀྲུང་གོའི་གཏམ་རྒྱུད་ཡག་པོ་ཤོད་པ་བཅས་བྱས་ཏེ། “རྒྱལ་ཁབ་སྟོབས་ཆེན་དང་མི་རིགས་བསྐྱར་དར་ཡོང་བར་ང་ཡིས་འབད”ཅེས་པའི་མང་ཚོགས་རང་བཞིན་གྱི་བརྗོད་དོན་གཙོ་བོའི་དྲིལ་བསྒྲགས་སློབ་གསོའི་བྱེད་སྒོ་རྒྱུན་གཏན་དུ་འགྱུར་བར་བྱས་ཡོད།

     ཐུན་མོང་མ་ཡིན་པའི་རིག་གནས་ཐོན་ཁུངས་ལ་བརྟེན་ནས་ཅ་ཡུས་ཀོན་གྲོང་ཁྱེར་གྱིས་ལྕགས་རི་རིང་པོའི་རིག་གནས་དར་སྤེལ་གཏོང་བ་དེ“རྒྱལ་ཁབ་སྟོབས་ཆེན་དང་མི་རིགས་བསྐྱར་དར་ཡོང་བར་ང་ཡིས་འབད”ཅེས་པའི་མང་ཚོགས་རང་བཞིན་གྱི་བརྗོད་དོན་གཙོ་བོའི་དྲིལ་བསྒྲགས་སློབ་གསོའི་བྱེད་སྒོ་གཏིང་ཟབ་སྤེལ་རྒྱུ་དང་ཟུང་འབྲེལ་དམ་ཟབ་བྱས་ཏེ“ལྕགས་རི་རིང་པོར་དགའ·ང་ཡི་ཁྱིམ་གཞིས་དར”ཞེས་པའི་བརྗོད་དོན་གཙོ་བོའི་རིམ་སྤེལ་བྱེད་སྒོ་ཇུས་འགོད་དང“སྒོ་ཀུན་ནས་བསམ་བློ་ཆབ་སྲིད་གླེང་བའི”རྣམ་པ་འཚོལ་ཞིབ་ཀྱིས་ཅ་ཡུས་ཀོན་མཁར་རྫོང་དང་ཅ་ཡུས་ཀོན་ལྕགས་རི་རིང་པོའི་རྟེན་རྫས་བཤམས་མཛོད་ཁང་དེ་བསམ་བློ་ཆབ་སྲིད་སློབ་ཚན་གྱི་སློབ་ཁྲིད་ལག་ལེན་རྟེན་གཞིར་བྱས་པས། བསམ་བློ་ཆབ་སྲིད་ཀྱི་སློབ་ཁང་ཆུང་ངུ་དང་སྤྱི་ཚོགས་ཀྱི་སློབ་ཁང་ཆེན་པོ་ཟུང་འབྲེལ་དམ་ཟབ་ཐུབ་ནས་མཐུན་སྒྲིལ་འབད་འཐབ་ཀྱི་བསམ་པའི་སྟོབས་ཤུགས་ནུས་ལྡན་ངང་གཅིག་ཏུ་བསྒྲིལ་ཡོད།

     ཀོང་ཤིས་སུ་གོམས་སྲོལ་བསྒྱུར་བར་སྐུལ་འདེད་ཏན་ཏིག་བཏང་བས་ཁྲོམ་གཞུང་དང་། སྡེ་ཁུལ། ཞིང་ནང་དང་མུ་ཁ་གང་སར་བདེ་སྐྱིད་ཀྱི་འཛུམ་མདངས་དང་ཤེས་དཔལ་གྱི་སྲོལ་བཟང་མཐོང་རྒྱུ་ཡོད་པ་རེད།

     “གྲོང་ཚོར‘མནའ་མ་བསུ་དུས་ལག་རྟགས་མི་ལེན་པ་དང་སློང་རྟེན་ཐེབས་རྩར་བསྒྱུར་རྒྱུ’དར་སྤེལ་བཏང་ནས། སློང་རྟེན་དེ་ཁྱིམ་ཚང་གི་ཐེབས་རྩར་བརྩིས་ཏེ་ཆང་ས་བརྒྱབ་མ་ཐག་པའི་ཁྱོ་ཤུག་གི་གནོན་ཤུགས་ཆུང་དུ་བཏང་ནས་དངོས་འབྲེལ་འཚོ་བ་ཡག་པོ་སྐྱེལ་ཐུབ་པར་བྱས་ཡོད”རྒྱལ་སྟོན་གུང་གསེང་རིང་བཀྲ་ཤིས་པའི་དགའ་སྟོན་མང་པོ་བཤམས་ཤིང་། ནན་ཉིང་གྲོང་ཁྱེར་མ་ཧྲན་རྫོང་ཐའེ་ཕིང་གྲོང་ཚོའི་ཡུལ་མི་ཚོས་གོམས་སྲོལ་བསྒྱུར་བ་ལས་བྱུང་བའི་འགྱུར་ལྡོག་བཟང་པོར་བསྔགས་བརྗོད་ཡང་ཡང་བྱས་པ་རེད།

     ནན་ཉིང་གྲོང་ཁྱེར་གྱིས“རྒྱལ་ཁབ་སྟོབས་ཆེན་དང་མི་རིགས་བསྐྱར་དར་ཡོང་བར་ང་ཡིས་འབད”ཅེས་པའི་མང་ཚོགས་རང་བཞིན་གྱི་བརྗོད་དོན་གཙོ་བོའི་དྲིལ་བསྒྲགས་སློབ་གསོའི་བྱེད་སྒོ་གཏིང་ཟབ་སྤེལ་ནས“ཤེས་དཔལ་སྲོལ་བཟང་ཧུར་ཐག་སྤེལ་བའི”བྱ་སྤྱོད་དེ་རྒྱུན་གཏན་གྱི་བྱེད་སྒོར་གྱུར་བར་བྱས་པ་རེད། གྲོང་ཚོ（སྡེ་ཁུལ）ཁག་གིས“གོམས་སྲོལ་བསྒྱུར་རྒྱུའི་གྲོས་འགོའི་ཡི་གེ”དང“གྲོང་གསེབ་དར་རྒྱས་ཀྱི་ཤེས་དཔལ་སྐར་གསོག་ལམ་ལུགས”སོགས་བརྒྱུད་དུས་རབས་ཀྱི་སྲོལ་གསར་དར་སྤེལ་བཏང་ཡོད། དེ་དང་ཆབས་ཅིག རིག་རྩལ་འཁྲབ་སྟོན་ལ་ལྟ་བ་དང་གྲོང་ཚོའི་ལན་ཆིའུ་སྤོ་ལོའི་འགྲན་བསྡུར་ནང་ཞུགས་པ་སོགས་ལ་བརྟེན་ནས་གོམས་སྲོལ་བསྒྱུར་སྟངས་གསར་གཏོད་དང་ཕུན་སུམ་ཚོགས་སུ་བཏང་བ་དང་། “གྲོང་གསེབ་དོན་གྲོས་ཚོགས་འདུ”དུས་བཀག་ལྟར་འཚོགས་པ་དང“མང་ཚོགས་ཞབས་ཞུའི་རུ་ཁག”རྒྱུན་དུ་འཚམས་འདྲིར་སྐྱོད་པ་སོགས་ཀྱི་བྱེད་སྒོ་སྤེལ་ནས་གཞི་རིམ་མང་ཚོགས་ཀྱི་རང་སྐྱོང་ནུས་པ་ཆེ་རུ་རྒྱུན་ཆད་མེད་པར་བཏང་བ་རེད།

      ཧེ་ལུང་ཅང་ཞིང་ཆེན་དུ། བརྗོད་དོན་གཙོ་བོའི་གྲུབ་འབྲས་འགྲེམས་སྟོན་མང་པོ་སྤེལ་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཕོ་འགྱུར་ཕྱོགས་ཡོངས་ནས་མངོན་པ་དང་སྦྲགས། བྱ་གཞག་ཁག་ལ་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་དང་ལོ་རྒྱུས་རང་བཞིན་གྱི་འཕོ་འགྱུར་བརྒྱུད་རིམ་ལྡན་པའི་སྒོ་ནས་འགྲེམས་སྟོན་བྱས་ཏེ་རྒྱ་ཆེའི་ལས་བྱེད་པ་དང་མང་ཚོགས་ཚོས་ལྟ་སྐོར་དང་སློབ་སྦྱོང་བྱ་རྒྱུའི་ཡིད་དབང་བཀུག་ཡོད།

     ད་ལོ་ཚུན་དུ། མུའུ་ཏན་ཅང་གྲོང་ཁྱེར་གྱིས“ལོ་ངོ་དོན་ལྔའི་འོད་སྟོང་ལྡན་པའི་ལམ། འབད་འབུངས་ཆེན་པོས་སླར་ཡང་མདུན་སྐྱོད་བྱེད”ཅེས་པའི་བརྗོད་དོན་གཙོ་བོའི་གྲུབ་འབྲས་འགྲེམས་སྟོན་བྱས་ཤིང་། མུའུ་ཏན་ཅང་གྲོང་ཨུད་དྲིལ་བསྒྲགས་པུས་སྡེ་ཚན་མང་པོ་དང་མཉམ་དུ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་75འཁོར་བར་རྟེན་འབྲེལ་ཞུ་བའི་བརྗོད་དོན་གཙོ་བོའི་པར་རིས་འཚོལ་སྡུད་རྒྱ་ཁྱབ་བྱས་མཐར་གཏན་འཁེལ་བྱས་པའི་པར་རིས་300ཙམ་ཁྲོད་ཀྱི་མང་ཚོགས་ཀྱི་འཛུམ་མདངས་རེ་རེ་ནི“ཐམས་ཅད་མི་དམངས་ཀྱི་ཆེད་དུ་ཡིན་པ་དང་ཐམས་ཅད་མི་དམངས་ལ་བརྟེན་དགོས་པའི”འགྲེལ་བཤད་གསོན་ཉམས་དོད་པོར་གྱུར་ཡོད།