༄༅།།མཚོ་སྔོན་པོའི་བྱེ་གླིང་སྲུང་སྐྱོང་ཁུལ་ནས་སྲོག་ཆགས་གཡི་ཐོག་མར་ཤེས་རྟོགས་བྱུང་བ།

   འདི་ག་ཚགས་པར་ཁང་དུ་གནས་ཚུལ་འབྱོར་གསལ། མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་དུས། མཚོ་སྔོན་པོའི་བྱེ་གླིང་སྲུང་སྐྱོང་ས་ཚིགས་ཀྱི་ལས་དོན་པས་བྱེ་གླིང་སྲུང་སྐྱོང་ཁུལ་དུ་སྐོར་ཞིབ་སྐོར་སྲུང་བྱེད་སྐབས། རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་སྲོག་ཆགས་གཡི་ཐོག་མར་ཤེས་རྟོགས་བྱུང་བ་རེད།

    གཡི་ནི་ཕྱི་དབྱིབས་ཞི་མི་དང་འདྲ་ཡང་ཞི་མི་ལས་ཆེ་བའི་སྲོག་ཆགས་ཤིག་ཡིན་ཞིང་། ནར་ལོན་གཡིའི་གཟུགས་པོའི་ལྗིད་ཚད་ལ་སྟོང་ཁེ་18ནས་སྟོང་ཁེ་36བར་ཟིན་པ་དང་། གཟུགས་པོའི་རིང་ཚད་ལ་ལི་སྨི་70ནས་ལི་སྨི་130བར་ཟིན་པ། མཇུག་མ་ཧ་ཅང་ཐུང་བ། རྣ་རྩེར་སྤུ་ནག་པོ་སྐྱེས་པ། འགྲམ་པའི་གཡས་གཡོན་གཉིས་སུ་སྤུ་རིང་པོ་སྐྱེས་པ། གསུས་སྤུ་ཧ་ཅང་རིང་བ། ལུས་ཡོངས་སུ་གཟིག་དང་འདྲ་བའི་ཁྲ་ཐིག་བཅས་ཡོད། གཡི་ནི་གྲང་ངར་ལ་དགའ་བའི་སྲོག་ཆགས་ཤིག་ཡིན་པས། སྤྱིར་བཏང་བྱང་དྲོད་ཁུལ་གྱི་གྲང་ངར་ཆེ་བའི་ས་ཁུལ་དུ་ཐོན་པ་དང་། རྒྱུན་དུ་གྲང་ངར་ཆེ་བའི་རི་ཁུལ་དུ་འཚོ་སྡོད་བྱེད་པ། མང་ཆེ་བ་བྲག་གསེབ་དང་ཤིང་སྡོང་གི་ཁོག་པའི་ནང་སྡོད་ཀྱི་ཡོད། གཡི་ནི་ཁེར་སྡོད་ལ་དགའ་བ་དང་། རི་འཛེགས་དང་ཆུ་རྐྱལ་ལ་བྱང་བ། ལྟོགས་སྲན་ཆེ་བ། ཨ་བྲ་དང་རི་བོང་སོགས་བཟས་སུ་བསྟེན་ལ། ཕག་རྒོད་དང་ཤྭ་བ་སོགས་ཀྱི་ཤ་ཡང་ཟ་ཡི་ཡོད།

    ད་ཐེངས་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་རི་སྐྱེས་སྲོག་ཆགས་གཡི་ཤེས་རྟོགས་བྱུང་བ་དེ་ལས། མཚོ་སྔོན་པོའི་བབས་རྒྱུད་ཀྱི་སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱུང་བ་མཚོན་ཡོད།