༄༅།།ས་མཐོར་སྐྱུ་རུའི་སྤོ་ལོའི་རུ་ཁག་གཅིག་ཡོད།

    འདི་ག་ཚགས་པར་གྱི་གསར་འགོད་པ། ཆུང་བདག་སྒྲོལ་དཀར།

    ལྷ་སའི་ཁྲོམ་གཞུང་དུ་ཉི་འོད་འཕྲོ་ཞིང་། ལོ་25ལ་སླེབས་པའི་སྐལ་བཟང་ལྷུན་གྲུབ་རྒྱུས་མངའ་ཆེ་བའི་རྡོ་གཅལ་ལམ་བརྒྱུད་ལྷ་ས་སྐྱིད་ཆུའི་ལྷོ་ངོགས་ཀྱི་སྔོ་ལྗང་ར་བའི་ཕྱོགས་སུ་བསྐྱོད། རུ་མི་གཞན་གཅིག་རྗེས་གཉིས་མཐུད་ངང་སླེབས་པ་དང་ལུས་སྦྱོང་རགས་ཙམ་བྱས་རྗེས། སྐྱུ་རུའི་སྤོ་ལོའི་འགྲན་བསྡུར་ཞིག་ཆུ་ཚོད་10པར་དུས་ཐོག་ཏུ་འགོ་ཚུགས།

     སྐལ་བཟང་ལྷུན་གྲུབ་ནི་བོད་ལྗོངས་བྱ་ཁྱུང་ལས་ཞོར་སྐྱུ་རུའི་སྤོ་ལོའི་རུ་ཁག་གི་རུ་མི་ཡིན་ཞིང་། ཁོང་གིས“སྐྱུ་རུའི་སྤོ་ལོ་རྩེད་མཁན་དེ་ཙམ་མེད་མོད། འོན་ཀྱང་དེར་སྟོབས་ཤུགས་དང་རྩལ་ནུས་ཆེན་པོ་ལྡན་ཡོད། ཆུང་དུས་ངས་བརྙན་འཕྲིན་ནས་སྐྱུ་རུའི་སྤོ་ལོའི་འགྲན་བསྡུར་ལྟ་མྱོང་། སློབ་ཆེན་འགྲིམ་སྐབས་ཀྱང་མི་གཞན་གྱིས་སྐྱུ་རུའི་སྤོ་ལོ་རྩེད་བ་ལྟ་མྱོང་ཡོད”ཅེས་བརྗོད་བཞིན་ཁོང་གིས་སྐྱུ་རུའི་སྤོ་ལོའི་འགྲན་བསྡུར་ནང་ཞུགས་རྗེས་གཞི་ནས་ལུས་རྩལ་དེའི་སྤྲོ་སྣང་ཚོར་ཡོད།

    ཐོག་མར། སྐལ་བཟང་ལྷུན་གྲུབ་ཀྱིས་སྐྱུ་རུའི་སྤོ་ལོ་རྩེད་སྟངས་མི་ཤེས་པས་དཀའ་ངལ་མང་པོ་འཕྲད། ཐོག་མར་སྦྱོང་སྐབས། སྤོ་ལོ་མཐོ་དྲགས་པའམ་ཡང་ན་དམའ་དྲགས་པ་དང་། སྤོ་ལོ་ལེན་སྐབས་དངངས་འཚབ་ལངས་པ། གཞན་དང་རྡུང་སྐབས་རྒྱུན་དུ་རིལ་བ་བཅས་བྱེད་ཀྱི་ཡོད། ཁོང་གིས“སྔོན་མ་བློ་ཁོག་ཆུང་ལ་གཟུགས་པོའང་སྐྱོ་པོ་ཡོད། སྐྱུ་རུའི་སྤོ་ལོ་སྦྱངས་རྗེས་གཟུགས་པོ་ཐང་དུ་ཕྱིན་པ་མ་ཟད། གཤིས་ཀ་ཡང་ཡག་ཏུ་ཕྱིན་སོང”ཞེས་བཤད།

     སྐྱུ་རུའི་སྤོ་ལོ་རྩེ་བར་གཟུགས་པོ་ཡག་པོ་དགོས་པས། སྐལ་བཟང་ལྷུན་གྲུབ་ཀྱིས་ཉིན་ལྟར་ལུས་སྦྱོང་ཁང་དུ་གཟུགས་པོར་སྦྱོང་བརྡར་བྱེད་པར་འགྲོ་གི་ཡོད། དཀའ་ཚེགས་ཆེན་པོས་སྦྱངས་མཐར་ཁོང་གིས་སྐྱུ་རུའི་སྤོ་ལོ་རྒྱག་སྟངས་ཤེས་ཏེ་རིམ་གྱིས་སྤོ་ལོའི་རུ་ཁག་གི་རུ་མི་གཙོ་བོར་གྱུར། ཁོང་གིས“ད་ཆ་ང་མདུན་དུ་ཤོར་མཁན་ཞིག་ཡིན་པས། རུ་མི་གཞན་ལ་ལམ་བཤངས་བའམ་ཡང་ན་རང་ཉིད་ཀྱིས་སྤོ་ལོ་འཁྱེར་ནས་མདུན་དུ་ཤོར་དགོས་ཀྱི་ཡོད”ཅེས་བཤད།

     བྱ་ཁྱུང་རུ་ཁག་2018ལོར་བཙུགས་པ་དང་སྐྱུ་རུའི་སྤོ་ལོར་དགའ་མཁན་མི་ཉུང་བ་ཞིག་གི་ཡིད་དབང་བཀུག སྐལ་བཟང་ལྷུན་གྲུབ་2021ལོར་གྲོགས་པོས་ངོ་སྤྲོད་བྱས་པ་བརྒྱུད་རུ་ཁག་ནང་ཞུགས། ལྷ་སར་སྐྱུ་རུའི་སྤོ་ལོ་རྒྱག་ས་དེ་ཙམ་མེད་ལ། ཆེད་ལས་ཀྱི་སྦྱོང་བརྡར་བྱེད་འདོད་ཀྱང་ལས་སླ་པོ་མེད། རུ་མི་ཚོས་དྲ་རྒྱ་ནས་སྤོ་ལོ་རྒྱག་སྟངས་སྦྱོངས་བ་མ་ཟད། རྒྱུན་དུ་མཉམ་དུ་སྦྱོང་བརྡར་དང་ལད་མོའི་འགྲན་བསྡུར་ཡང་བྱེད་པས་གྲུབ་འབྲས་མི་དམན་པ་ཞིག་ཐོབ་ཅིང་། ལོ་གཉིས་ཀྱི་གོང་བྱ་ཁྱུང་རུ་ཁག་ཧྭ་མེ་སྐྱུ་རུའི་སྤོ་ལོའི་མནའ་འབྲེལ་ནང་དངོས་སུ་ཞུགས་ནས་འགྲན་བསྡུར་བྱེད་འགོ་ཚུགས་པ་དང་རུ་མི་ཚོས་ལས་སླ་པོར་བྱུང་བ་ཞིག་མིན་པའི་འགྲན་བསྡུར་གྱི་གོ་སྐབས་དེར་གཅེས་སྤྲས་ཆེན་པོ་བྱེད་ཀྱི་ཡོད། “འདི་ལོའི་ལོ་འགོར་ང་ཚོ་ཁྲེང་ཏུར་འགྲན་བསྡུར་བྱེད་པར་བསྐྱོད་པ་ཡིན། དང་ཐོག་ཕར་ཕྱོགས་ཀྱིས་སྔོན་ལ་སྤྱིར་བཏང་གི་རུ་མི་བཏང་བ་དང་རྗེས་སུ་རུ་མི་དྲག་པ་བཏང་བ་དེ་ཐོག་ནས་ང་ཚོའི་རུ་ཁག་གི་སྟོབས་ཤུགས་ལ་བརྩི་འཇོག་བྱེད་པ་མཚོན་པས། ཚང་མའི་སྙིང་སྟོབས་ཇེ་ཆེར་ཕྱིན་སོང”ཞེས་སྐལ་བཟང་ལྷུན་གྲུབ་ཀྱིས་གད་མོ་འཚེར་འཚེར་ངང་བཤད།

     སྐལ་བཟང་ལྷུན་གྲུབ་ཀྱིས“སྐྱུ་རུའི་སྤོ་ལོ་ནི་ང་ཚོའི་དགའ་ཕྱོགས་ཡིན་ལ། ང་ཚོའི་ཉམས་འགྱུར་མངོན་པར་བྱེད་པའི་བྱ་ཐབས་ཤིག་ཀྱང་ཡིན། མི་དེ་བས་མང་བས་བོད་ཀྱི་དེང་སྐབས་གཞོན་ནུ་ཚོའི་ཉམས་འགྱུར་བཟང་པོ་དང་ངོ་མཚར་གྱི་འཚོ་བ་མཐོང་ཐུབ་པའི་རེ་བ་ཡོད”ཅེས་བཤད།