༄༅།།“ཉིང་རྡུལ་མཉམ་སྤྱོད་”ཀྱི་བཀོད་སྒྲིག་མེད་པར་བཟོ་བར་སྐུལ།  

ཚེས་26ཉིན་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་ཀྲུང་གོ་ཕྱོགས་ཀྱིས《ཉིང་རྡུལ་མཚོན་ཆ་ཁྱབ་འགྱེད་མི་བྱེད་པའི་ཆིངས་ཡིག》རྨང་གཞི་བྱས་པའི་རྒྱལ་སྤྱིའི་ཉིང་རྡུལ་དམག་མི་ཉུང་འཕྲི་དང་ཉིང་རྡུལ་ཁྱབ་འགྱེད་མི་བྱེད་པའི་མ་ལག་ལ་སྲུང་སྐྱོང་མཐའ་གཅིག་ཏུ་བྱེད་པ་མ་ཟད། འབྲེལ་ཡོད་རྒྱལ་ཁབ་ཀྱིས“ཉིང་རྡུལ་མཉམ་སྤྱོད”ཀྱི་བཀོད་སྒྲིག་མེད་པར་བཟོས་ནས། བྱེད་ཐབས་གང་རུང་བརྒྱུད་ནས་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོའི་ཁུལ་དུ་འདྲ་བཟོ་བྱེད་མི་ཆོག་པའི་སྐུལ་ལྕག་བྱ་རྒྱུ་ཡིན་ཞེས་བཤད་པ་རེད།

ཉིན་དེའི་གསར་འགོད་པའི་རྒྱུན་ལྡན་གྱི་ཚོགས་འདུའི་ཐོག གསར་འགོད་པ་ཞིག་གིས་གནས་འཕྲིན་སྤེལ་བར་གཞིགས་ན། ཀྲུང་གོའི་དམག་དོན་ཚོད་འཛིན་དང་དམག་མི་ཉུང་འཕྲིའི་མཐུན་ཚོགས་དང་ཀྲུང་གོའི་ཉིང་རྡུལ་འཐབ་ཇུས་འཆར་འགོད་ཞིབ་འཇུག་སྤྱི་ཁྱབ་ཁང་གིས་ཚེས་25ཉིན་ཇེ་ནེ་ཝར་འཚོགས་པའི《ཉིང་རྡུལ་མཚོན་ཆ་ཁྱབ་འགྱེད་མི་བྱེད་པའི་ཆིངས་ཡིག》གི་གྲོས་ཞིབ་ཚོགས་ཆེན་ཐེངས་བཅུ་གཅིག་པའི་གྲ་སྒྲིག་ཚོགས་འདུ་ཐེངས་གཉིས་པའི་སྐབས་ལ། “བྱང་ཆིངས་ཀྱི་ཉིང་རྡུལ་མཉམ་སྤྱོད”གནད་དོན་གྱི་བརྗོད་གཞིའི་ཚོགས་འདུ་འཚོགས་པ་མ་ཟད། ཚོགས་འདུའི་ཐོག《བྱང་ཆིངས་ཀྱི་ཉིང་རྡུལ་མཉམ་སྤྱོད〈ཉིང་རྡུལ་མཚོན་ཆ་ཁྱབ་འགྱེད་མི་བྱེད་པའི་ཆིངས་ཡིག〉ལས་འགལ་བའི་དབྱེ་ཞིབ》ཞེས་པའི་སྙན་ཞུ་ཁྱབ་བསྒྲགས་བྱས་ནས། བྱང་ཆིངས་ཀྱི“ཉིང་རྡུལ་མཉམ་སྤྱོད”ཀྱི་ཁྲིམས་མཐུན་རང་བཞིན་ལ་དོགས་སློང་བྱས་པ་རེད། མགྲིན་ཚབ་པར་དེའི་ཐད་དཔྱད་གཏམ་གང་ཞིག་ཡོད་དམ།

མའོ་ཉིང་གིས། ཀྲུང་གོ་ཕྱོགས་ཀྱི་འཐུས་མི་ཚོགས་པ་གོང་གི་བརྗོད་གཞིའི་ཚོགས་འདུར་ཞུགས་ཡོད། འབྲེལ་ཡོད་ཞིབ་འཇུག་སྙན་ཞུའི་ནང་བྱང་ཆིངས་ཀྱི“ཉིང་རྡུལ་མཉམ་སྤྱོད”བཀོད་སྒྲིག་དེ《ཉིང་རྡུལ་མཚོན་ཆ་ཁྱབ་འགྱེད་མི་བྱེད་པའི་ཆིངས་ཡིག》གི་གཏན་འབེབས་ལས་འགལ་བ་དང་། ངོ་བོའི་ཐོག་དམིགས་བསལ་གྱི་རྣམ་པའི་ཉིང་རྡུལ་ཁྱབ་འགྱེད་ཅིག་ཡིན་པ་བསྟན་པར་དོ་སྣང་བྱུང་ཡོད་ཅེས་བཤད་པ་རེད།

“《ཉིང་རྡུལ་མཚོན་ཆ་ཁྱབ་འགྱེད་མི་བྱེད་པའི་ཆིངས་ཡིག》ནང་ཉིང་རྡུལ་མཚོན་ཆ་དང་དེའི་ཚོད་འཛིན་དབང་ཆ་ཐད་ཀར་རམ་གཞན་བརྒྱུད་ཀྱིས་བཤུག་སྤྲོད་བྱས་མི་ཆོག་པ་ཡིག་ཆའི་ནང་གསལ་པོར་བཀོད་ཡོད། ཨ་རིས་བྱང་ཆིངས་ཀྱི་ཉིང་རྡུལ་མཚོན་ཆ་མེད་པའི་རྒྱལ་ཁབ་ཀྱི་མངའ་ཁོངས་སུ་ཉིང་རྡུལ་མཚོན་ཆ་བཀོད་སྒྲིག་བྱས་པ་མ་ཟད། རྒྱལ་ཁབ་དེ་དག་གི་དམག་འཐབ་གནམ་གྲུས་ཉིང་རྡུལ་མཚོན་ཆ་སྐྱེལ་འདྲེན་དང་འཕེན་གཏོང་ཆོག་པ་བྱས་པ་དེ་ནི་མངོན་གསལ་གྱིས་ཆིངས་ཡིག་གི་གཏན་འབེབས་ལས་འགལ་ཡོད། རྒྱལ་ཁབ་དེ་བས་མང་པོས་ལད་མོ་བྱེད་སླ་བ་དང་། དོན་དངོས་ཐོག་ཉིང་རྡུལ་མཚོན་ཆ་ཚོད་འཛིན་གྱི་འཕེལ་རིམ་ལ་འགོག་རྐྱེན་བཟོ་བ་དང་། ཉིང་རྡུལ་གདོང་གཏུག་གི་ཉེན་ཁ་ཆེ་རུ་འགྲོ་བ། གོ་ལ་ཧྲིལ་པོའི་འཐབ་ཇུས་བརྟན་བརླིང་ལ་གཏོར་བཤིག་གཏོང་ངེས་རེད”ཅེས་མའོ་ཉིང་གིས་བཤད།

ཁོ་མོས་ཀྲུང་གོ་ཕྱོགས་ཀྱིས《ཉིང་རྡུལ་མཚོན་ཆ་ཁྱབ་འགྱེད་མི་བྱེད་པའི་ཆིངས་ཡིག》རྨང་གཞི་བྱས་པའི་རྒྱལ་སྤྱིའི་ཉིང་རྡུལ་དམག་མི་ཉུང་འཕྲི་དང་ཉིང་རྡུལ་ཁྱབ་འགྱེད་མི་བྱེད་པའི་མ་ལག་ལ་སྲུང་སྐྱོང་མཐའ་གཅིག་ཏུ་བྱེད་པ་མ་ཟད། འབྲེལ་ཡོད་རྒྱལ་ཁབ་ཀྱིས་འཇམ་འཐབ་ཀྱི་བསམ་གཞིག་དང་བསྡོམས་སྟོང་འགྲན་འཛུགས་བྱེད་པ་དོར་ནས། “ཉིང་རྡུལ་མཉམ་སྤྱོད”ཀྱི་བཀོད་སྒྲིག་མེད་པར་བཟོ་བ་དང་། ཡོ་རོབ་ཏུ་བཀོད་སྒྲིག་བྱས་པའི་ཉིང་རྡུལ་མཚོན་ཆ་འབོར་ཆེན་ཕྱིར་འཐེན་བྱས་ནས། བྱེད་ཐབས་གང་རུང་གི་ཐོག་ནས་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོའི་ཁུལ་དུ“ཉིང་རྡུལ་མཉམ་སྤྱོད”ཀྱི་བཀོད་སྒྲིག་འདྲ་བཟོ་བྱེད་མི་རུང་ཞེས་བཤད་པ་རེད།