༄༅།།བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པའི་ཟློས་གར་དང་འཁྲབ་ཚན་ཐུང་ངུ་དང་གཞས་མ་གཏམ་གྱི་འགྲན་བསྡུར་ཆེ་མོ་དང་ན་གཞོན་གཞས་པའི་འགྲན་བསྡུར་ཆེ་མོ་ཐུགས་གྲ་ལེགས་འགྲིག་བྱུང་བ།

འདི་ནི་མངའ་རིས་ས་ཁུལ་ཞང་ཞུང་སྒྱུ་རྩལ་ཚོགས་པའི་བརྩམས་ཆོས《མངའ་རིས་ཀྱི་མཚར་གཏམ》ཞེས་པ་འཁྲབ་སྟོན་བྱེད་བཞིན་པ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཟླ་7ཚེས་19ནས་21ཉིན་བར་བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པའི་ཟློས་གར་དང་། འཁྲབ་ཚན་ཐུང་ངུ་། གཞས་མ་གཏམ་བཅས་ཀྱི་འགྲན་བསྡུར་ཆེ་མོའི་མཐའ་བསྡུར་བོད་སྐོར་དཀྱིལ་འཁོར་གྱི་ན་གཞོན་ཟློས་གར་ཁང་དུ་བདེ་བླག་ངང་གཉེར་བ་རེད།

ཉིན་གསུམ་རིང་འགྲན་བསྡུར་དྲག་པོ་བྱས་པ་བརྒྱུད་བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པའི་ཟློས་གར་དང་། འཁྲབ་ཚན་ཐུང་ངུ་། གཞས་མ་གཏམ་བཅས་ཀྱི་འགྲན་བསྡུར་ཆེ་མོའི་བྱ་དགའ་ཐོབ་པའི་འཁྲབ་ཚན་ཡོངས་བསྒྲགས་བྱས་ཤིང་། བོད་རང་སྐྱོང་ལྗོངས་གཏམ་བརྗོད་ཟློས་གར་ཚོགས་པའི་ལེ་ཚན《ས་བབ་མཐོ་ཚད་སྨི་5200》ཞེས་པར་འཁྲབ་ཚན་ཐུང་ངུའི་ཆེད་ལས་ཚོགས་ཆུང་གི་བྱ་དགའ་རིམ་པ་དང་པོ་ཐོབ་པ་དང་། གཞིས་རྩེ་གྲོང་ཁྱེར་ཁང་དམར་རྫོང་སྒྱུ་རྩལ་ཚོགས་པའི་བརྩམས་ཆོས《བཟའ་བཅའི་བདེ་འཇགས》ཞེས་པར་འཁྲབ་ཚན་ཐུང་ངུའི་ལས་ཞོར་ཚོགས་ཆུང་གི་བྱ་དགའ་རིམ་པ་དང་པོ་ཐོབ་པ། མངའ་རིས་ས་ཁུལ་ཞང་ཞུང་སྒྱུ་རྩལ་ཚོགས་པའི་ལེ་ཚན《མངའ་རིས་ཀྱི་མཚར་གཏམ》ཞེས་པར་གཞས་མ་གཏམ་ཚོགས་ཆུང་གི་བྱ་དགའ་རིམ་པ་དང་པོ་ཐོབ་པ་རེད།

《ས་བབ་མཐོ་ཚད་སྨི་5200》ཞེས་པའི་འཁྲབ་སྟོན་པ་ངག་དབང་རིན་ཆེན་གྱིས་འགྲན་བསྡུར་མཇུག་འགྲིལ་རྗེས“ནང་སྦྱོང་བྱེད་རིང་འཁྲབ་གཞུང་ལ་རྒྱུས་མངའ་ཟབ་མོ་ལོན་ཆེད། ང་ཚོའི་འཁྲབ་སྟོན་རུ་ཁག་ནག་ཆུ་གྲོང་ཁྱེར་ཨ་མདོ་རྫོང་གི‘གནམ་འོག་གི་ཏའོ་པན་དང་པོ’རུ་དམངས་གཞས་འཚོལ་བསྡུ་བྱེད་པར་ཕྱིན་པ་ཡིན། དེ་ག་ནས་ང་ཚོས་མི་སེམས་འགུལ་བའི་བྱས་རྗེས་མང་པོ་ཤེས་རྟོགས་ཐུབ་བྱུང་ལ། ང་ཚོས་གཏམ་རྒྱུད་དེ་དག་མི་དེ་བས་མང་བར་ཤེས་སུ་འཇུག་འདོད་ཆེན་པོ་བྱུང་། དེ་རིང་ཨང་དང་པོ་ཐོབ་པ་ནི་ངེད་ཚོར་བསྔགས་བརྗོད་བྱས་པ་ཞིག་རེད་ལ་སྐུལ་ལྕག་བྱས་པ་ཞིག་ཀྱང་རེད”ཅེས་བཤད།

གཞན་ཡང་གནས་ཚུལ་འབྱོར་གསལ། ཟླ་7ཚེས་19དང་20ཉིན་བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པའི་ན་གཞོན་གཞས་པའི་འགྲན་བསྡུར་ཆེ་མོའི་མཐའ་བསྡུར་བོད་ལྗོངས་ཟློས་གར་ཁང་ཆེན་གྱི་འཁྲབ་ར་ཆུང་ངུར་བྱས་པ་དང་ལྗོངས་ཕྱི་ནང་གི་བདམས་ཐོན་པ་63འགྲན་བསྡུར་ནང་ཞུགས་པ་རེད།

ད་ཐེངས་ཀྱི་འགྲན་བསྡུར་ཁྲོད་ཆེད་ལས་ཚོགས་ཆུང་དང་ཆེད་ལས་མིན་པའི་ཚོགས་ཆུང་ཁྱོན་ཁག་དྲུག་ལ་དབྱེ་ཡོད། སྐབས་འདིའི་འགྲན་བསྡུར་གྱི་སྤྱི་ཁྱབ་འཁྲབ་ཁྲིད་པ་བསམ་གཏན་གྱིས་བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པའི་གཞོན་ནུ་གཞས་པའི་འགྲན་བསྡུར་ཆེ་མོར་མིང་ཐོ་བཀོད་པའི་མི་གྲངས་སྐབས་དང་པོ་ལས་ཅུང་ཟད་མང་བ་དང་། མགྲིན་དབྱངས་ཀྱི་ཆ་རྐྱེན་ཡག་པོ་ཡོད་པའི་ཕུལ་བྱུང་བདམས་ཐོན་པའི་བསྡུར་ཚད་ཀྱང་དེ་བས་མཐོ་བ་མ་ཟད། ད་དུང་ཆེད་ལས་མིན་པའི་ཚོགས་ཆུང་ནས“དཔའ་གསར”མི་ཉུང་བ་ཞིག་ཀྱང་ཐོན་ཡོད།

མཐར་པ་སངས་ནོར་བུ་དང་ཚེ་རིང་དབྱངས་འཛོམས་གཉིས་ལ་ཆེད་ལས་ཚོགས་ཆུང་གི་ཨང་དང་པོ་ཐོབ་ཅིང་། ཚེ་རིང་སྒྲོལ་མ་དང་། ནོར་སྒྲོན། ཨེ་གཞུང་སྤུན་གྲོགས་ཚོགས་པ་བཅས་ལ་ཆེད་ལས་མིན་པའི་ཚོགས་ཆུང་གི་ཨང་དང་པོ་ཐོབ་པ་རེད།

“ད་ཐེངས་ཀྱི་འགྲན་བསྡུར་ལས་མྱོང་ཚོར་ཧ་ཅང་ཡག་པོ་བྱུང་སོང་། གར་སྟེགས་འདི་འདྲ་ཞིག་མཁོ་འདོན་གནང་བར་ཐུགས་རྗེ་ཆེ་ཞུ་རྒྱུ་དང་ངེད་ཚོའི་ཚོགས་པར་ཡང་ཐུགས་རྗེ་ཆེ་ཞུ་རྒྱུ་ཡིན”ཞེས་ཨེ་གཞུང་སྤུན་གྲོགས་ཚོགས་པའི་ཁོངས་མི་4ཡིས་གསར་འགོད་པའི་བཅར་འདྲི་དང་ལེན་ཞུ་སྐབས་དེ་ལྟར་བཤད། ཚོགས་པ་དེ་ནི་ཕུར་བཀྲ་དང་། བཀྲ་ཤིས། བློ་བསྟན། དངོས་གྲུབ་བཅས“དགུ་བཅུ་ནང་སྐྱེས”ཀྱི་ཁོངས་མི་བཞི་ལས་གྲུབ་ཅིང་། ཁོང་ཚོ་ཚང་མ་ལྷོ་ཁ་གྲོང་ཁྱེར་ཆུ་གསུམ་རྫོང་སྒྱུ་རྩལ་ཚོགས་པ་ནས་ཡིན་པ་རེད།