༄༅།།མཉམ་གཏོད་མཉམ་སྤྱོད་ཀྱིས་ལག་གདང་སྦྲེལ་ནས་མདུན་དུ་སྐྱོད།

ཤིན་ཧྭ་གསར་འགྱུར་ཁང་གི་གསར་འགོད་པ།

ཟླ་6ཚེས་20ཉིན། ཀྲུའུ་ཞི་ཞི་ཅིན་ཕིང་གིས་2024ལོའི་འཛམ་གླིང་རིག་ནུས་ཐོན་ལས་དངོས་མང་སྟོན་ཚོགས་ལ་རྟེན་འབྲེལ་འཕྲིན་ཡིག་སྤྲིངས་པར་ཚོགས་རའི་ཕྱི་ནང་གི་ལས་རིགས་མི་སྣའི་ཁྲོད་ཚུར་སྣང་ལན་ཆ་ཆེན་པོ་བྱུང་ཡོད། ཚང་མས། ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ནང་། མིག་སྔར་མི་ཐབས་རིག་ནུས་ཀྱིས་ཚན་རྩལ་གསར་བརྗེ་དང་ཐོན་ལས་འཕོ་འགྱུར་ལ་སྐུལ་འདེད་གཏོང་བའི་དོན་སྙིང་གལ་ཆེན་གསལ་བཤད་གནང་ནས། མི་ཐབས་རིག་ནུས་འཕེལ་རྒྱས་དང་བཅོས་སྐྱོང་གི་རྒྱལ་སྤྱིའི་མཉམ་ལས་ཟབ་ཏུ་གཏོང་བ་དང་། མི་ཐབས་རིག་ནུས་སྐྱོན་བྲལ་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ། འཛམ་གླིང་གི་དཔལ་འབྱོར་འཕར་རྒྱུར་སྐུལ་འདེད་གཏོང་བ། རྒྱལ་ཁབ་ཁག་གི་མི་དམངས་ཀྱི་བདེ་རྩ་ཆེ་རུ་གཏོང་བ་བཅས་ལ་ཁ་ཕྱོགས་གསལ་སྟོན་གནང་ཡོད་ཅེས་བརྗོད།

མིག་སྔར། མི་ཐབས་རིག་ནུས་སྔར་བྱུང་མྱོང་མེད་པའི་མྱུར་ཚད་ཀྱི་ཐོག་ནས་འཕེལ་རྒྱས་འགྲོ་བཞིན་ཡོད། རིགས་གཅིག་མཁས་ཅན་ཡིན་ནའང་། ཡང་ཡང་ཐོན་པའི་ལག་རྩལ་གསར་པ་དང་གྲུབ་འབྲས་གསར་པར་ཧང་སངས་སྲིད།

ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ནང“མི་ཐབས་རིག་ནུས་ནི་རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་འཕོ་འགྱུར་གྱི་སྐུལ་སྤེལ་སྟོབས་ཤུགས་གལ་ཆེན་ཞིག་ཡིན་པས། གོ་ལ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་དང་མིའི་རིགས་ཀྱི་ཤེས་དཔལ་ཡར་ཐོན་ལ་ཤུགས་རྐྱེན་ཟབ་མོ་ཐེབས་ཡོད”ཅེས་གསུངས་པས། ཚོགས་ཞུགས་མི་སྣའི་ཁྲོད་ཚུར་སྣང་ལན་ཆ་ཆེན་པོ་བྱུང་ཡོད།

ཚོགས་རའི་ཐོག་ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ཉན་རྗེས། རྒྱལ་ཁབ་རིམ་འདས་རྩིས་རྒྱག་ཐེན་ཅིན་ལྟེ་གནས་ཉེར་སྤྱོད་ཞིབ་འཇུག་གསར་སྤེལ་གྱི་དབུ་བཞུགས་ཚན་རིག་མཁས་ཅན་མེང་ཞང་ཧྥེ་ཡིས་མྱོང་ཚོར་ཟབ་མོས“གོ་ལ་ཧྲིལ་པོའི་དཔལ་འབྱོར་འཕར་འགོར་བའི་མདུན་དུ་འཕར་བའི་སྒུལ་ཤུགས་གསར་མ་སྐྱེད་སྲིང་བྱ་རྒྱུ་འགག་རྩར་གྱུར་ཡོད། མི་ཐབས་རིག་ནུས་ཀྱིས་མཚོན་པའི་རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་འཕོ་འགྱུར་གྱིས་འཛམ་གླིང་ལ་ཤུགས་རྐྱེན་ཟབ་མོ་ཐེབས་ཡོད། ང་ཚོས་སྒུལ་བྱེད་སྟོབས་ཤུགས་གལ་ཆེན་ཡིན་པའི་མི་ཐབས་རིག་ནུས་ལ་གོ་བ་གཏིང་ཟབ་བླངས་ནས་མི་ཐབས་རིག་ནུས་ཡག་པོ་སྤྱོད་པ་དང་འཕེལ་རྒྱས་ཡག་པོ་གཏོང་དགོས”ཞེས་བརྗོད།

ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ལས་ཀྲུང་གོས་མི་ཐབས་རིག་ནུས་འཕེལ་རྒྱས་ལ་ཚད་མཐོའི་མཐོང་ཆེན་བྱེད་པ་མཚོན་ཡོད། ཚོགས་འདུར་ཞུགས་མཁན་ཨུ་ཟ་བྷེ་ཁི་སི་ཐན་སྤྱི་མཐུན་རྒྱལ་ཁབ་བཟོ་ཚོང་ཚོང་ཚོགས་ཀྱི་ཀྲུའུ་ཞི་གཞོན་པ་ཝུའུ་སྨི་ཏེ·སཱ་ཧྥ་ལུའོ་ཧྥུའུ་ཡིས། མི་ཐབས་རིག་ནུས་ཁྱབ་ཁོངས་སུ་ཀྲུང་གོ་དེ་ཉིད་འཛམ་གླིང་གི་སྔོན་ཐོན་རྒྱལ་ཁབ་ཀྱི་གྲས་སུ་གྱུར་ཡོད། “ང་ཚོས་ཨུ་ཟ་བྷེ་ཁི་སི་ཐན་གྱི་ཁེ་ལས་དང་ཀྲུང་གོའི་རིག་ནུས་ཐོན་ལས་ཁེ་ལས་དབར་མཉམ་ལས་ཧུར་ཐག་བྱ་རྒྱུར་སྐུལ་འདེད་གཏོང་བ་དང་འབྲེལ། ཀྲུང་གོའི་བྱང་ཆུབ་པའི་ལག་རྩལ་ནང་འདྲེན་བྱ་རྒྱུའི་རེ་བའང་བྱེད་ཀྱི་ཡོད”ཅེས་བརྗོད།

“དེ་སྔའི‘དྲ་སྦྲེལ+’ནས་ད་ཆའི‘མི་ཐབས་རིག་ནུས+’བར་རང་རྒྱལ་གྱི་མི་ཐབས་རིག་ནུས་དང་ཐོན་ལས་མཉམ་འདྲེས་རིམ་པ་སྤར་ནས་མཉམ་ལས་མགྱོགས་སུ་གཏོང་བའི་དུས་མཚམས་གསར་པར་སླེབས་ཡོད”ཚོགས་འདུར་ཞུགས་མཁན་ཁོ་ཏཱ་ཤུན་ཧྥེ་ཡི་ཏུང་ཧྲི་ཀྲང་ལིའུ་ཆིང་ཧྥེང་གིས། ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་མཛུབ་སྟོན་དུ་བྱས་ཏེ་དྲ་སྦྲེལ་དང་། གྲངས་གཞི་ཆེ་མོ། མི་ཐབས་རིག་ནུས། དངོས་ཚན་དཔལ་འབྱོར་བཅས་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བའི་ནང་ཧུར་ཐག་ཞུགས་ནས་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་གསར་པ་མཁོ་འདོན་བྱེད་ཀྱི་ཡིན་ཞེས་བརྗོད།

“ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་མཐོང་རྗེས། ངས་ཀྲུང་གོའི་འབྱུང་འགྱུར་གྱི་མི་ཐབས་རིག་ནུས་ཁྲོམ་རའི་འཕེལ་རྒྱས་དང་གོ་སྐབས་ལ་རེ་སྒུག་དེ་བས་ཆེན་པོ་བྱེད་ཀྱི་ཡོད”འགྲེམས་སྟོན་ནང་ཞུགས་མཁན་འཇར་མན་TENSORཀུང་སིའི་བཟོ་སྐྲུན་ཆེ་མོ་བ་མཱ་ཁུའུ་སིས། ད་ལོ་ཀུང་སིས་ཀྲུང་གོར་ཀུང་སི་གསར་པ་བཙུགས་ནས་ཀྲུང་གོར་དམའ་འཕུར་དཔལ་འབྱོར་འཕེལ་རྒྱས་གཏོང་རྒྱུའི་འཆར་གཞི་ཡོད་ལ། ཀྲུང་གོའི་མི་ཐབས་རིག་ནུས་དང་ཐོན་ལས་འཁོར་འབྲེལ་དང་མཉམ་ལས་དེ་བས་མང་དུ་གཏོང་རྩིས་ཡོད་ཅེས་བརྗོད།

“ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ནང་དྲ་སྦྲེལ་དང་། གྲངས་གཞི་ཆེ་མོ། མི་ཐབས་རིག་ནུས་བཅས་དང་དངོས་ཚན་དཔལ་འབྱོར་མཉམ་འདྲེས་གཏིང་ཟབ་ཡོང་བར་སྐུལ་འདེད་ཧུར་ཐག་གཏོང་དགོས་ཞེས་གསུངས་ཡོད་པས་ང་ཚོའི་འབྱུང་འགྱུར་འཕེལ་རྒྱས་ཀྱི་ཁ་ཕྱོགས་དེ་བས་གསལ་དུ་ཕྱིན་སོང”འགྲེམས་སྟོན་ནང་ཞུགས་མཁན་ཚན་པ་པེ་ཅིང་སློབ་ཆེན（ཐེན་ཅིན་པིན་ཧའེ）རབས་གསར་པའི་ཆ་འཕྲིན་ལག་རྩལ་ཞིབ་འཇུག་ཁང་གི་ཡོན་ཀྲང་གཞོན་པ་ལི་ཧྥང་ཕིང་གིས་དངུལ་རྩ་དང་། སྨན་བཅོས། སློབ་གསོ། རྒན་གསོ་སོགས་ཁྱབ་ཁོངས་སུ་མི་ཐབས་རིག་ནུས་སྤྱད་ཚེ། ཐོན་སྐྱེད་ཀྱི་ལས་ཕྱོད་ཆེ་རུ་འགྲོ་རྒྱུ་མ་ཟད། མིའི་རིགས་ཀྱི་བདེ་རྩ་རྒྱུན་མཐུད་ངང་ཆེ་རུ་གཏོང་བར་མི་མངོན་པའི་སྟོབས་ཤུགས་ཧ་ཅང་ཆེན་པོ་ལྡན་ཡོད་ཅེས་བརྗོད།

ད་ཆ་ཀྲུང་གོའི་གྲངས་དངོས་དཔལ་འབྱོར་མཉམ་འདྲེས་ཀྱི་གོམ་སྟབས་མགྱོགས་སུ་འགྲོ་བཞིན་ཡོད་པ་དང་རྒྱལ་དམངས་དཔལ་འབྱོར་གྱི་རིགས་ཆེན་པོ་97ཁྲོད་ཀྱི་བཅུ་ཆ་བདུན་ཡན་ལ་5Gསྤྱད་ཟིན་པས། ལས་རིགས་ཁག་གི་གྲངས་འཛིན་ཅན་དང་རིག་ནུས་ཅན་གྱི་ཆུ་ཚད་མཐོ་རུ་རྒྱུན་མཐུད་ཕྱིན་ཡོད།

“ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ནང་ལས་རིགས་ཀྱི་མདུན་སྐྱོད་ཁ་ཕྱོགས་གསལ་སྟོན་གནང་ནས་མི་ཐབས་རིག་ནུས་དང་རིག་ནུས་དྲ་རྒྱ་ཉེར་སྤྱོད་དེ་དངོས་ཚན་དཔལ་འབྱོར་དང་ཟུང་འབྲེལ་ནུས་ལྡན་བྱ་རྒྱུར་སྐུལ་མ་ཐེབས་རྒྱུ་རེད”པེ་ཅིང་ཧྥེང་ཁྲའོ་དུས་རབས་ཚན་རྩལ་ཚད་ཡོད་ཀུང་སིའི་ཏུང་ཧྲི་ཀྲང་ཞ་ཡུང་ཧྥེང་གིས། ང་ཚོས་ལག་ལེན་ཉེར་སྤྱོད་དོན་འཁྱོལ་ལ་འཚོལ་ཞིབ་ཧུར་ཐག་བྱས་ནས་གསར་གཏོད་ཀྱི་གྲུབ་འབྲས་དེ་བས་མང་བ་མི་སེར་དཀྱུས་མའི་ཁྱིམ་ཚང་གིས་སྤྱོད་ཐུབ་པ་བྱེད་ཀྱི་ཡིན་ཞེས་བརྗོད།

ཅི་གཡོད་རླངས་འཁོར་གྱི་དབུ་བཞུགས་ལག་བསྟར་དཔོན་ཞ་དབྱི་ཕིང་གིས“རྟེན་འབྲེལ་འཕྲིན་ཡིག་ནང་ཀྲུང་གོས་འཛམ་གླིང་དང་མཉམ་དུ་གྲངས་འཛིན་ཅན་དང་། དྲ་རྒྱ་ཅན། རིག་ནུས་ཅན་བཅས་ཀྱི་འཕེལ་རྒྱས་གོ་སྐབས་ལ་དམ་འཛིན་བྱ་རྒྱུའི་འདུན་པ་གསལ་པོ་བཏོན་པས། ཀྲུང་གོ་དང་གོ་ལ་ཧྲིལ་པོའི་ཐོན་ལས་མཉམ་ལས་དམ་ཟབ་ལ་སྐུལ་འདེད་གཏོང་བར་ཁ་ཕྱོགས་གསལ་སྟོན་བྱས་ཡོད་ལ། ཐོན་ལས་རིག་ནུས་ཅན་གྱི་འཕེལ་རྒྱས་ལ་གདེང་ཚོད་ཀྱང་བསྣན་ཡོད”ཅེས་བརྗོད།

བྱ་དངོས་གསར་པ་དང་གོ་སྐབས་གསར་པར་དམ་འཛིན་བྱེད་དགོས་ལ། གྲ་སྒྲིག་ཨང་བསར་བྱས་ནས་མདུན་དུའང་སྐྱོད་དགོས། འབྱུང་འགྱུར་ཀྲུང་གོས་མི་ཐབས་རིག་ནུས་དང་རིག་ནུས་ཐོན་ལས་འཕེལ་རྒྱས་ལ་སྐུལ་འདེད་ཇི་ལྟར་གཏོང་རྒྱུ་ཡིན་ནམ།

2023ལོའི་ཟླ་10པར་ཀྲུའུ་ཞི་ཞི་ཅིན་ཕིང་གིས《གོ་ལ་ཧྲིལ་པོའི་མི་ཐབས་རིག་ནུས་བཅོས་སྐྱོང་གི་གྲོས་འགོ》བཏོན་པ་མ་ཟད། ད་ཐེངས་རྟེན་འབྲེལ་འཕྲིན་ཡིག་ནང“ཀྲུང་གོས་འཛམ་གླིང་གི་རྒྱལ་ཁབ་ཁག་དང་མཉམ་དུ་གྲངས་འཛིན་ཅན་དང་། དྲ་རྒྱ་ཅན། རིག་ནུས་ཅན་བཅས་ཀྱི་འཕེལ་རྒྱས་གོ་སྐབས་ལ་དམ་འཛིན་གྱིས་མི་ཐབས་རིག་ནུས་འཕེལ་རྒྱས་དང་བཅོས་སྐྱོང་གི་རྒྱལ་སྤྱིའི་མཉམ་ལས་གཏིང་ཟབ་ཏུ་བཏང་ནས་མི་ཐབས་རིག་ནུས་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་གཏོང་བ་དང་། འཛམ་གླིང་གི་དཔལ་འབྱོར་འཕར་བར་སྐུལ་འདེད་གཏོང་བ། རྒྱལ་ཁབ་ཁག་གི་མི་དམངས་ཀྱི་བདེ་རྩ་ཆེ་རུ་གཏོང་བ་བཅས་བྱ་ཆེད་འབད་བརྩོན་བྱེད་འདོད་ཡོད”ཅེས་སླར་ཡང་ནན་བཤད་གནང་ཡོད། ཚོགས་ཞུགས་མི་སྣ་ཚོས་ཀྲུང་གོས་རྒྱལ་ཁབ་ཁག་དང་མཉམ་དུ་མི་ཐབས་རིག་ནུས་གོ་ལ་ཧྲིལ་པོའི་བཅོས་སྐྱོང་ལ་སྐུལ་འདེད་གཏོང་བའི་རྣམ་འགྱུར་དང་འདོད་ཚུལ་དང་། དེ་བཞིན་མི་ཐབས་རིག་ནུས་འཕེལ་རྒྱས་དང་བདེ་འཇགས་གལ་ཆེ་མཉམ་ཡིན་པ་སླར་ཡང་གསལ་བཤད་བྱས་ཡོད་ཅེས་བརྗོད།

“རྟེན་འབྲེལ་འཕྲིན་ཡིག་གི་ནང་དོན་གཟིགས་རྒྱང་རིང་ལ་ནང་དོན་ཟབ་པ་དང་། རྒྱལ་ཁབ་འཕེལ་རྒྱས་ཀྱི་འཐབ་ཇུས་ནང་ཚན་རྩལ་གསར་ཤོས་མཉམ་འདྲེས་དང་གྲུབ་འབྲས་གསར་པ་དེ་དག་དོན་འཁྱོལ་ཐུབ་ཚེ་མི་རྣམས་ཀྱི་འཚོ་བའི་ཆུ་ཚད་མཐོ་རུ་འགྲོ་བར་སྐུལ་འདེད་གཏོང་ཐུབ”ཀྲུང་གོར་བཅའ་སྡོད་པེ་ནི་ནའི་གཞུང་ཚབ་ཆེ་མོ་བ་ཤིས་མོང·ཨ་ཏུའོ་ཝུའེ་ལན་ཏེས། པེ་ནི་ན་དང་ཀྲུང་གོས་མི་ཐབས་རིག་ནུས་ལག་རྩལ་དང་ཐོན་ལས་ཁྱབ་ཁོངས་སུ་མཉམ་ལས་གཏིང་ཟབ་བྱེད་བཞིན་ཡོད། ཀྲུང་གོ་དང་ཚན་ཞིབ་མཉམ་ལས་བྱས་ཏེ་རྒྱལ་ཁབ་གཉིས་པོའི་ཐོན་ལས་འཕེལ་རྒྱས་ལ་གསོན་ཤུགས་གསར་པ་བསྣན་རྒྱུའི་རེ་བ་ཡོད་ཅེས་བརྗོད།

（པ་སངས་དང་ཚེ་ཁོས་སྒྱུར་ཞུས་བྱས）