འཚོལ་བཤེར།   
藏文频道
2021ལོའི་ཟླ་1ཚེས་15ཉིན།

༄༅།།སྨན་བཅོས་ཤེས་ལྡན་པའི“ཚོགས་སྒྲིག”སྨན་དོན་མི་སྣ་841བོད་དུ་ཡོང་ནས་བརྒྱུད་རོགས་ཁྲིད་གསུམ་
གྱི་ལས་དོན་སྤེལ་བ།

གསར་འགྱུར་སྤེལ་དུས།  【2021ལོའི་ཟླ་ 01ཚེས་15ཉིན། 10:51】   (རྩོམ་སྒྲིག་འགན་འཁུར་པ། མཁའ་འགྲོ།)

 
འདི་ནི་ལྷ་ས་གྲོང་ཁྱེར་མི་དམངས་སྨན་ཁང་རུས་ནད་ཚན་ཁག་གི་ནད་ཁང་དུ་པེ་ཅིང་ཅི་ཧྲུའེ་ཐན་སྨན་ཁང་གི་བོད་སྐྱོར་སྨན་པ་ཀུང་ཞའོ་ཧྥུང(གཡས)དང་པེ་ཅིང་ཐེན་ཐན་སྨན་ཁང་གི་བོད་སྐྱོར་སྨན་པ་ལི་ཅ་མོའུ་ཡིས་ནད་པའི་གློག་པར་ལ་ལྟ་བཞིན་པ།
འདི་ནི་ལྷ་ས་གྲོང་ཁྱེར་མི་དམངས་སྨན་ཁང་རུས་ནད་ཚན་ཁག་གི་ནད་ཁང་དུ་པེ་ཅིང་ཅི་ཧྲུའེ་ཐན་སྨན་ཁང་གི་བོད་སྐྱོར་སྨན་པ་ཀུང་ཞའོ་ཧྥུང(གཡས)དང་པེ་ཅིང་ཐེན་ཐན་སྨན་ཁང་གི་བོད་སྐྱོར་སྨན་པ་ལི་ཅ་མོའུ་ཡིས་ནད་པའི་གློག་པར་ལ་ལྟ་བཞིན་པ།
    ཤིན་ཧྭ་གསར་འགྱུར་ཁང་ལྷ་ས་ནས་ཟླ་1ཚེས་13ཉིན་གློག་འཕྲིན་འབྱོར་གསལ། བོད་ལྗོངས་ལྷ་ས་གྲོང་ཁྱེར་མི་དམངས་སྨན་ཁང་གི་བོད་སྐྱོར་སྨན་པ་ལི་ཅ་མོའུ་ནད་ཁང་ནས་དོན་སྐབས་སྒོའི་ཕྱིར་སྒུག་བཞིན་པའི་ལྷ་སའི་གྲོང་མི་སྤེན་པ་བཀྲ་ཤིས་ཀྱིས་གོས་དར་ཞིག་ཁོང་གི་ལག་ཏུ་སྤྲད་ནས།
“ངའི་བཟའ་ཟླ་ན་ནས་ལོ་བཅུ་ཙམ་ཕྱིན་པ་བོད་སྐྱོར་སྨན་པ་ཚོས་སྨན་བཅོས་ཡག་པོ་གནང་ནས་ད་ཆ་དྲག་སྐྱེད་བྱུང་འདུག ཁྱེད་ཚོར་ཐུགས་རྗེ་ཆེ་ཞུ་རྒྱུ་ཡིན”ཞེས་སྤེན་པ་བཀྲ་ཤིས་ཀྱིས་སེམས་འགུལ་ཐེབས་པའི་ངང་བཤད། 
   ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་འཚོགས་རྗེས་སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་ལས་དོན་སྤེལ་འགོ་ཚུགས་པ་དང་། མིག་སྔའི་བར་སྨན་བཅོས་ཤེས་ལྡན་པ་841བོད་དུ་ཡོང་ནས་བོད་ཀྱི་སྨན་བཅོས་འཕྲོད་བསྟེན་བྱ་གཞག་ལ་རྒྱུན་ཆད་མེད་པར་གྲུབ་འབྲས་གསར་པ་ཐོབ་རྒྱུར་རམ་འདེགས་བྱས་ཡོད། 
    དེ་སྔོན་གྱི“གནས་གཏད་གནས”ཀྱི་བོད་སྐྱོར་བྱེད་ཐབས་དང་མི་འདྲ་བར་སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་གྱིས་གཅིག་སྡུད་ཐོག་ཆེད་ལས་ལག་རྩལ་ཤེས་ལྡན་མི་སྣ་བོད་དུ་བཏང་སྟེ་ཕྱོགས་ཡོངས་ནས་རོགས་སྐྱོར་བྱས་པ་དང་ས་གནས་དེ་གའི་སྨན་བཅོས་ཤེས་ལྡན་མི་སྣ་གསོ་སྐྱོང་བྱས་པ་མ་ཟད། བོད་ཀྱི་སྨན་བཅོས་ཀྱི་ཞན་ཆ་རྒྱུན་ཆད་མེད་པར་བསལ་ནས་ས་མཐོའི་མང་ཚོགས་ཀྱིས་དེ་བས་སྤུས་ལེགས་ཀྱི་སྨན་བཅོས་ཐོན་ཁུངས་ལོངས་སུ་སྤྱོད་ཐུབ་པར་བྱས་ཡོད།
   “པེ་ཅིང་གི་བོད་སྐྱོར་སྨན་པའི་ས་ནས་ཤེས་བྱ་མང་པོ་ཤེས་བྱུང་། ངའི་རྒན་ལགས་དང་པོ་ཀུང་ཞའོ་ཧྥུང་གིས་ང་ལ་རུས་ནད་ཚན་ཁག་གི་རྨ་ཆུང་གཤགས་བཅོས་བྱེད་སྟངས་བསླབ་པ་དངོས་གནས་གོ་ཆོད་པོ་འདུག”ཅེས་ལྷ་ས་གྲོང་ཁྱེར་མི་དམངས་སྨན་ཁང་རུས་ནད་ཚན་ཁག་གི་སྨན་པ་བློ་བཟང་ཆོས་འཕེལ་གྱིས་བཤད། ད་ཆ་ཁོང་གིས་བྱང་ཆུབ་པའི་ངང་རྨ་ཆུང་གཤགས་བཅོས་བྱེད་ཐུབ་ཀྱི་ཡོད་པ་རེད།
    ལོ་36ལ་སླེབས་པའི་བློ་བཟང་ཆོས་འཕེལ་གྱིས་2020ལོར་པེ་ཅིང་ནས་ཡོང་བའི་བོད་སྐྱོར་སྨན་པ་ཞིག་དགེ་རྒན་དུ་བསྟེན་པ་དང་། རྒན་དབྱང་ཅེ་པེ་ཅིང་ཅི་ཧྲུའེ་ཐན་སྨན་ཁང་ནས་ཡིན་པ་དང་། ཁོང་སླེབས་ནས་ཟླ་བ་གཅིག་ཙམ་མ་སོང་བར་བློ་བཟང་ཆོས་འཕེལ་སོགས་བོད་ཀྱི་ས་གནས་དེ་གའི་སྨན་པར་མཛུབ་ཁྲིད་དང་སྣེ་ཁྲིད་བྱས་ཏེ་གཤགས་བཅོས་བཅུ་གྲངས་བྱས་པ་དེས་བོད་ཀྱི་བྱིས་པའི་རུས་ནད་ཚན་ཁག་གི་ཆེད་ལས་ནད་བརྟག་སྨན་བཅོས་ཀྱི་སྟོང་ཆ་བསྐངས་པ་རེད།
    སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་ལག་བསྟར་བྱས་ཚུན་སྨན་བཅོས་ཚོགས་པ་721དང་། ས་གནས་དེ་གའི་སྨན་དོན་མི་སྣ་2031ལ་རོགས་ཁྲིད་བྱས་པ་དང་། སྨན་བཅོས་རྐང་འཛིན་མི་སྣ་4000ཙམ་གསོ་སྐྱོང་བྱས་པས་རོགས་སྐྱོར་བྱ་ཡུལ་སྨན་ཁང་གི་སྨན་པ་192ཀྱིས་རང་རྐྱ་འཕེལ་བའི་སྒོ་ནས་གཤགས་བཅོས་གསར་པ་རིགས་1ནས་2བར་བྱེད་ཐུབ་ཀྱི་ཡོད་པས་ནད་གཞི་ཆེ་གྲས་རིཌ་400ལྷག་ཙམ་བོད་དུ་བཅོས་ཐུབ་པ་དང་།“ནད་འབྲིང”མང་ཆེ་བ་གྲོང་ཁྱེར(ས་ཁུལ)ནས་བཅོས་ཐུབ་ཀྱི་ཡོད་པ་རེད།
    བོད་སྐྱོར་སྨན་པ་སླེབས་པ་དེས་བོད་ཀྱི་ས་གནས་སྨན་ཁང་གི་ཚན་ཞིབ་ཆུ་ཚད་ཆེས་ཆེར་མཐོ་རུ་ཕྱིན་ཡོད། གྲངས་གཞི་ལས་མངོན་པར། ནང་སའི་སྨན་ཁང་གིས“སྨན་ཁང་གིས་ཚན་ཁག་འགན་གཙང་ལེན་པའི”བྱེད་ཐབས་བརྒྱུད་ནང་སའི་སྔོན་ཐོན་ཉམས་མྱོང་དང་ལག་རྩལ་གྱི་གྲུབ་འབྲས་1061ཁྱབ་གདལ་བཏང་བ་དང་། ལག་རྩལ་གྱི་དཀའ་གནད་
1305མཉམ་དུ་འགག་སྒྲོལ་བྱས་པ། ས་ཁོངས་ནང་གི་སྨན་བཅོས་ལག་རྩལ་གྱི་སྟོང་ཆ་1541བསྐངས་པ་བཅས་བྱས་ཡོད།
   “བོད་སྐྱོར་རིགས་གཅིག་མཁས་ཅན་གྱིས་སྔོན་ཐོན་གྱི་ལག་རྩལ་དང་དོ་དམ་གྱི་འདུ་ཤེས་ཁྱབ་གདལ་བཏང་ནས་བོད་ཀྱི་ས་གནས་དེ་གའི་སྨན་བཅོས་ཀྱི་སྟོང་ཆ་མང་པོ་གསབ་པ་མ་ཟད། ས་གནས་དེ་གར་ནམ་ཡང་གནས་ཐུབ་པའི་སྨན་བཅོས་ཤེས་ལྡན་མི་སྣ་ཁག་གཅིག་སྐྱེད་སྲིང་བྱས་ཡོད”ཅེས་བོད་རང་སྐྱོང་ལྗོངས་ཏང་གི་སློབ་གྲྭའི་སློབ་སྤྱི་གཞོན་པ་ཝན་ཏའེ་ཞི་ཡིས་བཤད་པ་རེད།