མི་དམངས་དྲ་བ།

༄༅༎ཞི་ཅིན་ཕིང་གིས་ཨུ་རུ་སུའི་ཙུང་ཐུང་ཕུའུ་ཅིང་དང་ཞལ་པར་ཐོག་ནས་བཀའ་མོལ་གནང་བ།

གསར་འགྱུར་སྤེལ་དུས།  【2020ལོའི་ཟླ་ 07ཚེས་10ཉིན། 10:34】   (རྩོམ་སྒྲིག་འགན་འཁུར་པ། ཚེ་རིང་།)

     ཤིན་ཧྭ་གསར་འགྱུར་ཁང་པེ་ཅིང་ནས་ཟླ་7ཚེས་8ཉིན་གློག་འཕྲིན་འབྱོར་གསལ། ཟླ་7ཚེས་8ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨུ་རུ་སུའི་ཙུང་ཐུང་ཕུའུ་ཅིང་དང་ཞལ་པར་ཐོག་ནས་བཀའ་མོལ་གནང་བ་རེད།
     ཞི་ཅིན་ཕིང་གིས། ཟླ་6པའི་ཟླ་སྨད་དུ། ཨུ་རུ་སུས་རྒྱལ་སྲུང་དམག་འཁྲུག་ལ་རྒྱལ་ཁ་ཐོབ་ནས་ལོ་75འཁོར་བའི་ཐང་ཆེན་དམར་པོའི་དམག་གཟིགས་མཛད་སྒོ་གྲུབ་འབྲས་ཐོབ་པའི་སྒོ་ནས་གཉེར་ཏེ། འཛམ་གླིང་ལ་ལོ་རྒྱུས་བློ་ལ་བརྟན་པོར་ངེས་པ་དང་ཞི་བདེ་སྲུང་སྐྱོང་གི་ཆོད་སེམས་བརྟན་པོ་མངོན་པར་བྱས་ཡོད། ཉེ་ཆར། ཨུ་རུ་སུ་ཕྱོགས་ཀྱིས་དམངས་ཡོངས་ཀྱིས་འདེམས་ཤོག་བདེ་བླག་ངང་འཕེན་པའི་བྱེད་སྒོ་སྤེལ་ཞིང་། རྩ་ཁྲིམས་ཀྱི་བཟོ་བཅོས་འཆར་ཟིན་ལ་འདེམས་ཤོག་ཕལ་ཆེ་བ་ཐོབ་ནས་གྲོས་འཆམ་བྱུང་བ་དེ་ཐོག་ནས་ཨུ་རུ་སུའི་མི་དམངས་ཀྱིས་ཨུ་རུ་སུ་སྲིད་གཞུང་ལ་རྒྱབ་སྐྱོར་བྱེད་ལུགས་དང་དེ་བཞིན་ཨུ་རུ་སུའི་སྲིད་གཞུང་གི་རྒྱལ་སྲིད་སྐྱོང་ལུགས་ཀྱི་འདུ་ཤེས་ལ་ངོས་འཛིན་གཅིག་མཐུན་བྱེད་ལུགས་གང་ལེགས་མཚོན་ཡོད། ཀྲུང་གོ་ཕྱོགས་ཀྱིས་སྔར་རྒྱུན་བཞིན་ཨུ་རུ་སུ་ཕྱོགས་ལ་རྒྱལ་ཁབ་དེ་གའི་གནས་ཚུལ་དང་འཚམ་པའི་འཕེལ་རྒྱས་ཀྱི་འགྲོ་ལམ་ཐོག་བསྐྱོད་རྒྱུར་བློ་བརྟན་འགྱུར་མེད་ངང་རྒྱབ་སྐྱོར་བྱ་རྒྱུ་ཡིན་ལ། ཨུ་རུ་སུ་ཕྱོགས་ལ་འཕེལ་རྒྱས་དང་དར་རྒྱས་གང་མགྱོགས་མངོན་འགྱུར་ཡོང་བར་བློ་བརྟན་འགྱུར་མེད་ངང་རྒྱབ་སྐྱོར་ཡང་བྱ་རྒྱུ་ཡིན་ཞེས་གསུངས་པ་རེད།
     ཞི་ཅིན་ཕིང་གིས། མིག་སྔར་རྒྱལ་སྤྱིའི་དུས་བབ་ལ་མགྱོགས་མྱུར་འགྱུར་ལྡོག་འགྲོ་བཞིན་ཡོད། ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་ཞིག་ཡིན་པའི་ཀྲུང་ཨུ་རྒྱལ་ཁབ་གཉིས་པོའི་འཐབ་ཇུས་ཀྱི་འབྲེལ་བ་ཟབ་ཏུ་གཏོང་རྒྱུར་དགོས་གལ་ཧ་ཅང་ཆེན་པོ་ཡོད། ཀྲུང་གོ་ཕྱོགས་ཀྱིས་ཨུ་རུ་སུ་ཕྱོགས་དང་མུ་མཐུད་བློ་བརྟན་འགྱུར་མེད་ངང་ཕན་ཚུན་རྒྱབ་སྐྱོར་བྱེད་པ་དང་ཕྱི་ཕྱོགས་ཀྱི་ཐེ་ཇུས་དང་གཏོར་བཤིག་ལ་ངོ་རྒོལ་མཐའ་གཅིག་ཏུ་བྱས་ནས་རང་སོ་སོའི་རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་ཀྱི་ཁེ་ཕན་བཅས་ལ་སྲུང་སྐྱོང་ཡག་པོ་དང་། ཕྱོགས་གཉིས་ཀྱི་ཐུན་མོང་གི་ཁེ་ཕན་ལ་སྲུང་སྐྱོང་ཡག་པོ་བྱེད་འདོད་ཡོད་ཅེས་ནན་བཤད་གནང་བ་རེད།
     ཞི་ཅིན་ཕིང་གིས། ཀྲུང་ཨུ་རྒྱལ་ཁབ་གཉིས་པོས་ཏོག་གསར་གློ་ཚད་རིམས་ནད་ཐོན་པའི་དཀའ་ཚེགས་ཆེ་བའི་དུས་སྐབས་སུ་ཕན་ཚུན་རྒྱབ་སྐྱོར་དང་ཕན་ཚུན་རོགས་རམ་བྱས་ནས། དུས་རབས་གསར་པའི་ཀྲུང་ཨུའི་འབྲེལ་བར་འཐབ་ཇུས་ཀྱི་ནང་དོན་གསར་པ་བསྣན་ཡོད། ཕྱོགས་གཉིས་པོས་དུས་ཡུན་རིང་པོའི་ནང་རིམས་ནད་ལ་ཁ་གཏད་གཅོག་པའི་ལས་དོན་ཡག་པོ་སྒྲུབ་པ་དང་ཆབས་ཅིག སྟབས་བསྟུན་སྣ་མང་གི་བྱེད་ཐབས་ཞིབ་འཇུག་དང་ལག་བསྟར་བྱས་ཏེ་ཁྱབ་ཁོངས་ཁག་གི་མཉམ་ལས་གང་མགྱོགས་ལས་འགོ་བསྐྱར་ཚུགས་དང་ཐོན་སྐྱེད་སླར་གསོ་ཡོང་བར་སྐུལ་འདེད་གཏོང་དགོས་ཞེས་ནན་བཤད་གནང་བ་རེད།

  
style="display:none;"