༄༅།།མཚོ་སྔོན་བོད་ཡིག་ཚན་རྩལ་ཚགས་པར་གྱི་མི་ལོ36རིང་གི་འཕོ་འགྱུར།

    《མཚོ་སྔོན་ཚན་རྩལ་ཚགས་པར》བོད་ཡིག་པར་མ་ནི1984ལོའི་ཟླ7པར་མཚོ་སྔོན་ཚན་རྩལ་ཚགས་པར་ཁང་ནས་གསར་དུ་སྤེལ་བ་དང་། ཟླ་དེའི་ཚེས1ཉིན་བོད་ཡིག་པར་མའི་ཚགས་པར་ཐོག་མ་འགྲེམ་སྤེལ་བྱས། སྐབས་དེ་དུས་ཀྱི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཨུ་ཡོན་ཀྲང་གཞོན་པ་པཎ་ཆེན་ཨེར་ཏི་ཎི་སྐུ་ཕྲེང་བཅུ་བ་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་དཔལ་བཟང་པོ་མཆོག་གིས་ཚགས་པར་གྱི་ཁ་བྱང་ཕྱག་བྲིས་གནང་།
     ཚགས་པར་འདི་ནི་མཚོ་སྔོན་ཞིང་ཆེན་གཙོས་པའི་རྒྱལ་ནང་གི་བོད་རིགས་མང་ཚོགས་ལ་ཆེད་དམིགས་ཀྱི་ཚན་རིག་ལག་རྩལ་སྐོར་གྱི་ཕྱོགས་བསྡུས་ཚགས་པར་ཞིག་ཡིན་ལ། རྒྱལ་ནང་གི་གཅིག་གྱུར་ཚགས་ཨངCN63—0013ཡིན་པ་དང་། 2004ལོར་གཅིག་གྱུར་ཚགས་ཨང་དེCN63—0013/Zལ་བསྒྱུར། 2015ལོའི་ཟླ་དང་པོ་ནས་བཟུང་། ཚགས་པར་གྱི་རྒྱལ་ནང་གཅིག་གྱུར་ཚགས་ཨངCN63—0026ལ་བསྒྱུར་ཏེ་ད་ལྟར་ཡང་དེ་ལྟར་སྤྱོད་པ་དང་། ཚགས་པར་ཞིང་ཆེན་ཕྱི་ནང་དུ་ཡོངས་བསྒྲགས་ངང་སྤེལ་བཞིན་ཡོད།
     《མཚོ་སྔོན་ཚན་རྩལ་ཚགས་པར》བོད་ཡིག་པར་མ་གཉེར་བའི་དགོངས་དོན་ནི་བོད་ཁུལ་གྱི་གཞི་རིམ་ལས་བྱེད་མང་ཚོགས་ལ་དམིགས་ཏེ་ཏང་གི་ཚན་རྩལ་སྲིད་ཇུས་དྲིལ་སྒྲོག་དང་། ཚན་རྩལ་ཆ་འཕྲིན་ཁྱབ་སྤེལ། ཚན་རིག་ཤེས་བྱ་དར་སྤེལ། བོད་རིགས་མང་ཚོགས་ཀྱི་ཚན་རིག་བྱང་ཚད་ཇེ་མཐོར་གཏོང་བ། བོད་ཁུལ་གྱི་སྤྱི་ཚོགས་དང་དཔལ་འབྱོར་འཕེལ་རྒྱས་སྐུལ་འདེད་བྱེད་པ་བཅས་ཡིན། 【1】  【2】  【3】  【4】