༄༅༎བོད་ལྗོངས་ཀྱི་ཏོག་གསར་གློ་ཚད་ཕོག་པའི་ནད་པ་གཅིག་པུ་དེ་དྲག་སྐྱེད་བྱུང་རྗེས་སྨན་ཁང་ནས་དོན་པ།

     འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་2ཚེས་12ཉིན། བོད་རང་སྐྱོང་ལྗོངས་རིམ་པའི་གནས་གཏན་འཁེལ་གྱི་སྨན་བཅོས་སྒྲིག་གཞི་བོད་རང་སྐྱོང་ལྗོངས་མི་དམངས་སྨན་ཁང་གསུམ་པའི་སྨན་དོན་མི་སྣས་ཉིན་18ཡི་རིང་སྨན་བཅོས་དང་ནད་གཡོག་ཞིབ་ཚགས་བྱས་མཐར། རིགས་གཅིག་མཁས་ཅན་ཚོགས་ཆུང་གིས་དཔྱད་དཔོག་བྱས་པ་བརྒྱུད། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཏོག་གསར་གློ་ཚད་ལ་གཏན་འཁེལ་བའི་ནད་དཔེ་ལོགས་སུ་འཇོག་མཚམས་གཞོག་པ་དང་སྨན་ཁང་ནས་དོན་པའི་ཚད་གཞི་གསར་ཤོས་དང་མཐུན་པའི་ངོས་འཛིན་བྱས་པས། བོད་ལྗོངས་ཀྱི་ཏོག་གསར་གློ་ཚད་ཕོག་པའི་ནད་དཔེ་ཐོག་མ་དེ་སེང་དྲག་བྱུང་ནས་དེ་རིང་སྨན་ཁང་ནས་དོན་པ་རེད། འདི་ནི་ད་བར་བོད་དུ་ནད་གཞི་གཏན་འཁེལ་བྱུང་བའི་ཏོག་གསར་གློ་ཚད་ཕོག་མཁན་གཅིག་པུ་དེ་རེད།
     ཤེས་རྟོགས་བྱུང་བར་གཞིགས་ན། མིག་སྔར་སེང་དྲག་བྱུང་སྟེ་སྨན་ཁང་ནས་དོན་པའི་བོད་ལྗོངས་ཀྱི་ཏོག་གསར་གློ་ཚད་ཕོག་མཁན་དང་པོ་ཀྲང་ཆེ་གེ་མོ་ཟླ་1ཚེས་22ཉིན་ཝུའུ་ཧན་ཝུའུ་ཁྲང་ནས་མེ་འཁོར་ལ་བསྡད་དེ་ཚེས་24ཉིན་ལྷ་སར་འབྱོར་བ་རེད། ཟླ་1ཚེས་25ཉིན་གྱི་ཆུ་ཚོད་21དང་སྐར་མ་53ལ་བོད་ལྗོངས་ཏོག་གསར་གློ་ཚད་ཀྱི་གནས་གཏན་འཁེལ་གྱི་སྨན་བཅོས་སྨན་ཁང་བོད་རང་སྐྱོང་ལྗོངས་མི་དམངས་སྨན་ཁང་གསུམ་པར་ཉར་སྡོད་བྱས་པ་རེད། ཟླ་1ཚེས་30ཉིན་ནད་དཔེ་གཏན་འཁེལ་བྱུང་རྗེས། ཐོག་མཐའ་བར་གསུམ་དུ་རླུང་གནོན་དམའ་བའི་ནད་ཁང་དུ་ལོགས་སུ་བཞག་ནས་སྨན་བཅོས་བྱས་ཤིང་། སྨན་བཅོས་ལ་ཞུགས་མཁན་སྨན་དོན་མི་སྣར་རིམ་གསུམ་འགོག་སྲུང་བྱས་པ་དང་ནད་པའི་འཚོ་བཅུད་བཟའ་བཅའ་ཚང་མ་སྨན་ཁང་གིས་རིམ་གསུམ་འགོག་སྲུང་ལ་ནན་པོར་གཞིགས་ནས་སྤྲད་པ་རེད།
     བོད་རང་སྐྱོང་ལྗོངས་རིམ་པའི་ཏོག་གསར་གློ་ཚད་སྨན་བཅོས་ཀྱི་གནས་གཏན་འཁེལ་གྱི་སྨན་ཁང་བོད་རང་སྐྱོང་ལྗོངས་མི་དམངས་སྨན་ཁང་གསུམ་པས་སྔ་རྗེས་སུ་པེ་ཅིང་དང་། ཧྲང་ཧའེ། བོད་རང་སྐྱོང་ལྗོངས་བཅས་ཀྱི་སྨན་བཅོས་རིགས་གཅིག་མཁས་ཅན་གདན་འདྲེན་ཐེངས་4ཞུས་ནས། ལྷན་འཛོམས་ནད་དཔྱད་དང་དམིགས་སའི་རང་བཞིན་གྱི་སྨན་བཅོས་ཇུས་གཞི་བཟོས་ཏེ། ནད་དཔེ་ཐོག་མ་དེར་ཉིན་18ཡི་རིང་ནུས་ཤུགས་ཡོད་རྒུས་སྨན་བཅོས་བྱས་མཐར་སེང་དྲག་བྱུང་ནས་སྨན་ཁང་ནས་དོན་པ་རེད།