༄༅༎ཞི་ཅིན་ཕིང་གིས་ཨའོ་མོན་གྱི་རྒན་ཡོལ་ཞུས་པའི་རྒན་རྒོན་ལ་འཕྲིན་ལན་སྤྲིངས་ནས་འཚམས་འདྲི་དང་རྒྱལ་ཡོངས་ཀྱི་
རྒན་རྒོན་ཚོར་དགུ་པའི་ཚེས་དགུའི་དུས་ཆེན་སྤྲོ་པོ་ཡོང་བའི་སྨོན་འདུན་ཞུས་པ།

     ཤིན་ཧྭ་གསར་འགྱུར་ཁང་པེ་ཅིང་ནས་ཟླ་10ཚེས་7ཉིན་གློག་འཕྲིན་འབྱོར་གསལ། ཀྲུང་གོའི་སྲོལ་རྒྱུན་གྱི་དུས་ཆེན་དགུ་པའི་ཚེས་དགུའི་དུས་ཆེན་འཆར་ལ་ཉེ་བའི་མཚམས་སུ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཟླ་10ཚེས་6ཉིན་ཨའོ་མོན་ཁྱིམ་མཚེས་སྤྱི་ཁྱབ་ཚོགས་པའི་དབྱི་ཅུན་ལྟེ་གནས་ཀྱི་རྒན་རྒོན་གྱི་འོས་འགན་ལས་སྒྲུབ་ཚོགས་ཆུང་གི་རྒན་རྒོན་30ལ་འཕྲིན་ལན་སྤྲིངས་ནས་ཁོང་ཚོར་བྱམས་བརྩེའི་འཚམས་འདྲི་དང་སྐུལ་ལྕག་གནང་བ་དང་འབྲེལ་རྒྱལ་ཡོངས་ཀྱི་རྒན་རྒོན་ཚོ་ནད་མེད་ཚེ་རིང་དང་ཁྱིམ་ཚང་བདེ་སྐྱིད་ཡོང་བའི་སྨོན་འདུན་བཟང་པོའང་ཞུས་གནང་བ་རེད།
     ཞི་ཅིན་ཕིང་གིས་འཕྲིན་ལན་ནང་ཁྱེད་ཚོའི་འཕྲིན་ཡིག་འབྱོར་སྐབས་ངས་ལོ་བཅུའི་གོང་ཁྱེད་ཚོ་དང་ཨའོ་མོན་དུ་ཐུག་འཕྲད་བྱེད་པའི་ངང་ཚུལ་ཡིད་ལ་ལྷང་ངེར་དྲན་གྱི་འདུག ཁྱེད་རྣམ་པས་རྒན་ཡོལ་ཞུས་རྗེས་སྤྱི་ཕན་བྱ་གཞག་ནང་ཞུགས་པ་ཤེས་རྗེས་ང་རང་དངོས་གནས་དགའ་པོ་བྱུང་ཞེས་གསུངས་པ་རེད།
     ཞི་ཅིན་ཕིང་གིས་ཁྱེད་ཚོ་ཀྲུང་གོ་གསར་པ་དང་ན་ཟླ་ཡིན་པའི་ཆ་ནས་ཁྱེད་རྣམ་པས་རྒྱལ་ཁབ་ཀྱི་ལོ་ངོ་བཅུ་ཕྲག་རིང་གི་རླབས་ཆེན་འགྱུར་ལྡོག་དངོས་སུ་བརྒྱུད་མྱོང་ལ། “རྒྱལ་ཁབ་གཅིག་ལ་ལམ་ལུགས་གཉིས”ཨའོ་མོན་དུ་གྲུབ་འབྲས་ཐོབ་པའི་ངང་ལག་ལེན་བསྟར་བར་ཡང་བདེན་དཔང་བྱས་ཡོད། ཁྱེད་རྣམ་པས་རང་ཉིད་ཀྲུང་གོ་བ་ཞིག་ཡིན་པར་སྤོབས་སེམས་ཆེན་པོ་སྐྱེ་ཡི་འདུག་ཅེས་བརྗོད་ཡོད། དེ་ནི་རྒྱ་ཆེའི་སྤུན་ཟླ་ཨའོ་མོན་བའི་ཐུན་མོང་གི་སྙིང་གཏམ་ཡིན་པའི་ཡིད་ཆེས་ཡོད། ཁྱེད་རྣམ་པས་རྒས་ཀྱང་ལས་སྒྲུབ་གནང་བའི་སྲོལ་བཟང་དར་སྤེལ་དང་། ཨའོ་མོན་གྱི་གཞོན་ནུར་མེས་རྒྱལ་གྱི་པང་དུ་ཕྱིར་ལོག་བྱས་པའི་སྔ་རྗེས་ཀྱི་གཏམ་རྒྱུད་མང་ཙམ་བརྗོད་ནས་ཁོང་ཚོས་རྒྱལ་གཅེས་ཨའོ་གཅེས་ཀྱི་སྙིང་སྟོབས་རྒྱུན་འཛིན་ཡག་པོ་བྱེད་པ་མ་ཟད། གཡོད་ཀང་ཨའོ་ཁུག་ཆེན་ཁུལ་འཛུགས་སྐྲུན་ནང་ཧུར་ཐག་ཞུགས་པ་དང་ལག་གདང་སྦྲེལ་ནས་ཨའོ་མོན་དེ་བས་མཛེས་སྡུག་ལྡན་པ་ཞིག་ཏུ་བསྐྲུན་རྒྱུ་བཅས་ལ་སྐུལ་མ་གཏོང་རྒྱུའི་རེ་བ་ཡོད་ཅེས་གསུངས་པ་རེད།
     ཨའོ་མོན་ཁྱིམ་མཚེས་སྤྱི་ཁྱབ་ཚོགས་པའི་དབྱི་ཅུན་ལྟེ་གནས་ནི་སྤྱི་ལོ་2007ལོར་བཙུགས་པ་ཞིག་ཡིན་པ་དང་། དེ་ནི་ཆེད་ལས་ཀྱི་རྒན་རྒོན་ཞབས་ཞུའི་སྒྲིག་གཞི་ཞིག་རེད། སྤྱི་ལོ་2009ལོའི་ཟླ་བ་དང་པོར་རྒྱལ་ཁབ་ཀྱི་ཀྲུའུ་ཞི་སྐུ་གཞོན་ཡིན་པའི་ཞི་ཅིན་ཕིང་གིས་ཨའོ་མོན་དུ་གཟིགས་ཞིབ་གནང་མྱོང་ལ། ལྟེ་གནས་དེར་བྱམས་བརྩེའི་ངང་གཟིགས་པར་ཕེབས་མྱོང་ཡོད། ཉེ་དུས་དབྱི་ཅུན་ལྟེ་གནས་ཀྱི་རྒན་རྒོན་སུམ་ཅུས་ཀྲུའུ་ཞི་ཞི་ཅིན་ཕིང་ལ་འཕྲིན་ཡིག་ཅིག་ཕུལ་བ་དང་། འཕྲིན་ཡིག་ནང་ཨའོ་མོན་མེས་རྒྱལ་གྱི་པང་དུ་ཕྱིར་ལོག་བྱས་རྗེས་ཀྱི་གོང་འཕེལ་དང་འགྱུར་ལྡོག་གླེང་ཡོད་ལ། རང་ཉིད་ཀྲུང་གོ་བ་ཞིག་ཡིན་པར་སྤོབས་སེམས་ཆེན་པོ་སྐྱེ་ཚུལ་དང་། རྒྱལ་གཅེས་ཨའོ་གཅེས་ཀྱི་སྙིང་སྟོབས་དར་སྤེལ་ཡག་པོ་གཏོང་རྒྱུའི་ཆོད་སེམས་སོགས་མཚོན་པར་བྱས་ཡོད་པ་རེད།
     འཕྲིན་ལན།
     ཨའོ་མོན་ཁྱིམ་མཚེས་སྤྱི་ཁྱབ་ཚོགས་པའི་དབྱི་ཅུན་ལྟེ་གནས་ཀྱི་རྒན་རྒོན་གྱི་འོས་འགན་ལས་སྒྲུབ་ཚོགས་ཆུང་གི་ཁོངས་མི་རྣམ་པ། 
     ཁྱེད་རྣམས་སྐུ་ཁམས་བཟང་། ཁྱེད་ཚོའི་འཕྲིན་ཡིག་འབྱོར་སྐབས་ངས་ལོ་བཅུའི་གོང་ཁྱེད་ཚོ་དང་ཨའོ་མོན་དུ་འཕྲད་སྐབས་ཀྱི་ངང་ཚུལ་ཡིད་ལ་ལྷང་ངེར་འཆར་བྱུང་། ཁྱེད་རྣམ་པས་རྒན་ཡོལ་ཞུས་རྗེས་སྤྱི་ཕན་བྱ་གཞག་ནང་ཞུགས་པ་ཤེས་རྗེས་ང་རང་དངོས་གནས་དགའ་པོ་བྱུང་། 
     ཀྲུང་གོ་གསར་པ་དང་ན་ཟླ་ཡིན་པའི་ཆ་ནས་ཁྱེད་རྣམ་པས་རྒྱལ་ཁབ་ཀྱི་ལོ་ངོ་བཅུ་ཕྲག་རིང་གི་རླབས་ཆེན་འགྱུར་ལྡོག་དངོས་སུ་བརྒྱུད་མྱོང་ལ། “རྒྱལ་ཁབ་གཅིག་ལ་ལམ་ལུགས་གཉིས”ཨའོ་མོན་དུ་གྲུབ་འབྲས་ཐོབ་པའི་ངང་ལག་ལེན་བསྟར་བར་ཡང་བདེན་དཔང་བྱས་ཡོད། ཁྱེད་རྣམ་པས་རང་ཉིད་ཀྲུང་གོ་བ་ཞིག་ཡིན་པར་སྤོབས་སེམས་ཆེན་པོ་སྐྱེ་ཡི་འདུག་ཅེས་བརྗོད་ཀྱི་ཡོད། དེ་ནི་རྒྱ་ཆེའི་སྤུན་ཟླ་ཨའོ་མོན་བའི་ཐུན་མོང་གི་སྙིང་གཏམ་ཡིན་པའི་ཡིད་ཆེས་ཡོད། ཁྱེད་རྣམ་པས་རྒས་ཀྱང་ལས་སྒྲུབ་གནང་བའི་སྲོལ་བཟང་དར་སྤེལ་དང་། ཨའོ་མོན་གྱི་གཞོན་ནུར་མེས་རྒྱལ་གྱི་པང་དུ་ཕྱིར་ལོག་བྱས་པའི་སྔ་རྗེས་ཀྱི་གཏམ་རྒྱུད་མང་ཙམ་བརྗོད་ནས་ཁོང་ཚོས་རྒྱལ་གཅེས་ཨའོ་གཅེས་ཀྱི་སྙིང་སྟོབས་རྒྱུན་འཛིན་ཡག་པོ་བྱེད་པ་མ་ཟད། གཡོད་ཀང་ཨའོ་ཁུག་ཆེན་ཁུལ་འཛུགས་སྐྲུན་ནང་ཧུར་ཐག་ཞུགས་པ་དང་ལག་གདང་སྦྲེལ་ནས་ཨའོ་མོན་དེ་བས་མཛེས་སྡུག་ལྡན་པ་ཞིག་ཏུ་བསྐྲུན་རྒྱུ་བཅས་ལ་སྐུལ་མ་གཏོང་རྒྱུའི་རེ་བ་ཡོད། 
     དགུ་པའི་ཚེས་དགུའི་དུས་ཆེན་འཆར་བས་ངས་ཁྱེད་རྣམ་པ་དང་རྒྱལ་ཡོངས་ཀྱི་རྒན་རྒོན་རྣམས་ལ་དུས་ཆེན་སྤྲོ་པོ་ཡོང་བ་མ་ཟད། ནད་མེད་ཚེ་རིང་དང་ཁྱིམ་ཚང་བདེ་སྐྱིད་ཡོང་བའི་བཀྲ་ཤིས་སྨོན་འདུན་ཡང་ཞུ་རྒྱུ་ཡིན། 
     ཞི་ཅིན་ཕིང་གིས།
     2019ལོའི་ཟླ་10ཚེས་6ཉིན།