༄༅།།སྲིད་གཞུང་གི་ལས་དོན་སྙན་ཞུ།

    （བཅུ།） སྤྱི་ཚོགས་ཀྱི་བྱ་གཞག་འཕེལ་རྒྱས་ཇེ་མགྱོགས་སུ་བཏང་སྟེ་དམངས་འཚོ་འགན་སྲུང་དང་ལེགས་བཅོས་སྔར་ལྷག་བྱེད་རྒྱུ།  ད་ལོ་ནོར་སྲིད་ཀྱི་གཏོང་ཡོང་དོ་མཉམ་གྱི་གནོན་ཤུགས་ཆེ་རུ་ཕྱིན་མོད་ཀྱང་མ་མཐའི་དམངས་འཚོའི་འཇོག་བྱ་སྤོར་རྒྱུ་ཡིན་པ་ལས་གཅོག་མི་སྲིད་པའི་འགན་ལེན་བྱེད་རྒྱུ་ཡིན། སྤྱི་ཚོགས་ཀྱི་སྟོབས་ཤུགས་ཀྱིས་མ་མཐའི་སྤྱི་པའི་ཞབས་ཞུ་མིན་པའི་མཁོ་སྤྲོད་མང་དུ་གཏོང་བར་རྒྱབ་སྐྱོར་བྱས་ཏེ་མང་ཚོགས་ཀྱི་དགོས་མཁོ་རིམ་པ་མང་ཞིང་རྣམ་པ་སྣ་ཚོགས་ལེགས་པོར་བསྐང་རྒྱུ།
     སློབ་གསོ་སྔར་བས་འདྲ་མཉམ་དང་སྤུས་ཚད་སྔར་ལས་མཐོ་བའི་སྒོ་ནས་འཕེལ་རྒྱས་གཏོང་རྒྱུ། སློབ་གསོ་དང་སློབ་ཁྲིད་སྒྱུར་བཅོས་ཟབ་ཏུ་སྤེལ་ནས། གྲོང་ཁྱེར་དང་གྲོང་གསེབ་ཀྱི་འོས་འགན་སློབ་གསོ་གཞི་གཅིག་ཅན་དུ་འཕེལ་རྒྱས་ཡོང་བར་བྱེད་པ་དང་། གྲོང་གསེབ་ཀྱི་སློབ་གྲྭའི་སློབ་གཉེར་ཆ་རྐྱེན་མགྱོགས་མྱུར་ལེགས་སུ་གཏོང་བ། གྲོང་གསེབ་ཀྱི་དགེ་རྒན་དཔུང་ཁག་འཛུགས་སྐྲུན་བྱེད་ཤུགས་ཆེ་རུ་གཏོང་རྒྱུ། གྲོང་ཁྱེར་དང་གྲོང་རྡལ་གྱི་སློབ་གྲྭའི་“སློབ་མ་མང་ཐལ་ཆེ་བའི་”དཀའ་ངལ་སེལ་གང་ཐུབ་དང་། གྲོང་ཁྱེར་དུ་གླ་པ་རྒྱུག་པར་ཡོང་མཁན་གྱི་ཞོར་ཁྲིད་བུ་ཕྲུག་ཚོའི་སློབ་གསོ་འགན་ལེན་བཅས་བྱས་ཏེ་“འཕྲིན་སྦྲེལ་དྲ་བ་+སློབ་གསོ་”འཕེལ་རྒྱས་གཏོང་བར་བརྟེན་ནས་ཐོན་ཁུངས་སྤུས་ལེགས་མཉམ་སྤྱོད་ལ་སྐུལ་འདེད་གཏོང་རྒྱུ། ཐབས་ལམ་མང་པོའི་ཐོག་ནས་སློབ་ཞུགས་གོང་གི་སློབ་གསོ་མཁོ་སྤྲོད་བྱེད་རྒྱ་ཆེ་རུ་གཏོང་བ་དང་། བུ་བཅོལ་ཁང་གཞུང་བཙུགས་སམ་དམངས་བཙུགས་གང་ཡིན་ལ་མ་བལྟོས་པར་བདེ་འཇགས་ཀྱི་ཚད་གཞི་ལོན་པ་དང་། རིན་དངུལ་བསྡུ་རིགས་ཚུལ་མཐུན། ཁྱིམ་བདག་བློ་བདེ་བཅས་བྱུང་ཚེ་སྲིད་གཞུང་གིས་རྒྱབ་སྐྱོར་བྱེད་རྒྱུ། མཐོ་རིམ་སློབ་འབྲིང་དུས་མཚམས་ཀྱི་སློབ་གསོ་ཁྱབ་གདལ་ཡོང་བར་བྱེད་པ་དང་། མི་རིགས་སློབ་གསོ་དང་། དམིགས་བསལ་སློབ་གསོ། རྒྱུན་མཐུད་སློབ་གསོ་བཅས་ཡག་པོར་གཉེར་རྒྱུ། དམངས་གཉེར་སློབ་གསོ་འཕེལ་རྒྱས་ཁྲིམས་ལྟར་རོགས་སྐྱོར་བྱ་རྒྱུ་དང་། འོས་འགན་སློབ་གསོའི་དགེ་རྒན་གྱི་གླ་ཕོགས་ཐོབ་ཆ་དོན་འཁྱོལ་དམ་འཛིན་མུ་མཐུད་ཡག་པོར་བྱེད་རྒྱུ། སློབ་ཆེན་རྩེ་གྲ་དང་རིག་གཞུང་ཚན་ཁག་རྩེ་གྲ་འཛུགས་སྐྲུན་ལ་སྐུལ་འདེད་གཏོང་རྒྱུ། དབུས་ནུབ་རྒྱུད་ཀྱི་ཁྱད་ཆོས་དམིགས་བསལ་ལྡན་ཞིང་ཆུ་ཚད་མཐོ་བའི་སློབ་ཆེན་འཛུགས་སྐྲུན་བྱེད་པར་རོགས་སྐྱོར་བྱ་རྒྱུ། ད་ལོ་ནོར་ཤུགས་ཆུང་ཙམ་ཡིན་རུང་རྒྱལ་ཁབ་ཀྱི་ནོར་སྲིད་རང་བཞིན་གྱི་སློབ་གསོའི་གྲོན་དངུལ་གྱིས་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་གྱི་བསྡུར་ཚད་མུ་མཐུད་4%ཡན་ཟིན་པ་རྒྱུན་འཁྱོངས་དང་།  ཀྲུང་དབྱང་ནོར་སྲིད་ཀྱིས་སློབ་གསོའི་གཏོང་སྒོ་སྒོར་དུང་ཕྱུར་ཁྲི་1ལས་བརྒལ་བ་བཀོད་སྒྲིག་བྱེད་རྒྱུ།  ང་ཚོས་རིན་ཐང་བྲལ་བའི་མ་དངུལ་བེད་སྤྱོད་ཡག་པོ་ཏན་ཏིག་བྱས་ཏེ། མི་དམངས་བློ་ཡིད་ཚིམ་པའི་སློབ་གསོ་ཡག་པོར་གཉེར་ནས་འབྱུང་འགྱུར་རེ་སྨོན་གྱིས་ཁེངས་པར་བྱེད་རྒྱུ།
     མ་མཐའི་སྨན་བཅོས་འཕྲོད་བསྟེན་ཞབས་ཞུ་འགན་ལེན་བྱེད་རྒྱུ། གྲོང་ཁྱེར་དང་གྲོང་གསེབ་ཀྱི་གྲོང་མིའི་མ་མཐའི་སྨན་བཅོས་འགན་བཅོལ་དང་ནད་ཆེན་འགན་བཅོལ་འགན་ལེན་བྱེད་ཚད་མུ་མཐུད་ཆེ་རུ་གཏོང་རྒྱུ་དང་གྲོང་མིའི་སྨན་བཅོས་འགན་བཅོལ་ཐད་མི་རེར་ནོར་སྲིད་ཀྱི་ཁ་གསབ་རོགས་དངུལ་སྤྲོད་པའི་ཚད་གཞི་ཆ་སྙོམས་སྒོར་30མང་དུ་བཏང་ནས་ཕྱེད་ཀ་ནད་ཆེན་འགན་བཅོལ་ཐད་སྤྱོད་རྒྱུ། ནད་ཆེན་འགན་བཅོལ་གྱི་ཚད་གཞི་གཅོག་པ་མ་ཟད་གཅིག་གྱུར་ཡང་བྱེད་རྒྱུ་དང་སྨན་རིན་རྩིས་ཞུའི་བསྡུར་ཚད་50%ནས་60%བར་སྤོར་རྒྱུ།  ནད་ཆེན་ཕོག་པ་དང་དཀའ་ངལ་ཡོད་པའི་མང་ཚོགས་ཀྱི་སྨན་བཅོས་ཁུར་པོ་ཇེ་ཡང་དུ་གཏོང་རྒྱུ། ནད་གཞི་ཚབས་ཆེན་འགོག་བཅོས་བྱེད་ཤུགས་ཆེ་རུ་གཏོང་རྒྱུ། རང་རྒྱལ་དུ་སྐྲན་ནད་ངལ་དུབ་ཀྱིས་མནར་བའི་ཁྱིམ་ཚང་ཁྲི་སྟོང་མང་པོ་ཡོད་པས། སྐྲན་ནད་འགོག་བཅོས་བྱེད་ན། སྔོན་འགོག་ཚགས་བརྟག་དང་། སྔ་ཙམ་བརྟག་ནས་སྔ་ཙམ་བཅོས་པ། ཚན་ཞིབ་ཀྱི་འགག་གནད་སྒྲོལ་བ་བཅས་ཁྱབ་སྤེལ་བྱས་ཏེ། དམངས་འཚོའི་ཟུག་གཟེར་ལྡང་གནད་ཞི་ལྷོད་དུ་གཏོང་གང་ཐུབ་དང་། རྒྱུན་འབྱུང་གི་གཅོང་ནད་འགོག་བཅོས་ལེགས་པོར་བྱས་ནས། ཁྲག་ཤེད་མཐོ་བ་དང་། གཅིན་པ་མངར་འགྱུར་ནད་རིགས་སོགས་སྒོ་བསྟེན་སྨན་བཅོས་ཀྱི་སྨན་རིགས་དག་སྨན་བཅོས་འགན་བཅོལ་རྩིས་ཞུའི་ཁོངས་སུ་འཇུག་རྒྱུ། བྱིས་པའི་སྨན་རིགས་ཞིབ་འཇུག་གསར་སྤེལ་ཇེ་མགྱོགས་དང་། ནད་རིགས་དཀོན་གྲས་ལ་སྨན་རིགས་སྤྱོད་པར་འགན་སྲུང་བྱེད་ཤུགས་ཆེ་རུ་གཏོང་བ། སྨན་བཅོས་འགན་བཅོལ་གྱི་རྩིས་སྤྲོད་བྱེད་སྟངས་སྒྱུར་བཅོས་ཟབ་སྤེལ་དང་། སྨན་བཅོས་འགན་བཅོལ་གྱི་གཏོང་སྒོའི་གྲུབ་ཚུལ་ལེགས་སྒྲིག་བཅས་བྱེད་རྒྱུ། ཞིང་ཆེན་སྒྲོལ་ནས་ཡུལ་གཞན་དུ་སྨན་པ་བསྟེན་རིགས་ཐད་ཀར་རྩིས་ཞུའི་སྲིད་ཇུས་གང་མགྱོགས་དོན་འཁྱོལ་དང་འཐུས་སྒོ་ཚང་དུ་གཏོང་བ་དང་།   ཡུལ་གཞན་དུ་སྨན་པ་བསྟེན་མཁན་དམིགས་འཛུགས་ཀྱི་སྨན་ཁང་ཚང་མར་གཱ་འཁྱེར་ནས་སྨན་པ་བསྟེན་ཆོག་པ་དང་། འཕྲལ་མར་རྩིས་ཞུ་ཆོག་པར་བྱས་ཏེ་ཕྱོགས་འགྲུལ་མི་འབོར་དང་མཉམ་སྤོས་རྒན་རྒོན་སྟབས་བདེ་ཏན་ཏིག་ཡོང་བར་བྱེད་རྒྱུ། སྨན་རིགས་གཅིག་བསྡུས་ཐོག་ཉོ་སྒྲུབ་དང་བེད་སྤྱོད་ལམ་སྲོལ་འཐུས་སྒོ་ཚང་དུ་གཏོང་བ་དང་། གཞུང་འཛུགས་སྨན་ཁང་ཕྱོགས་བསྡུས་ཀྱིས་སྒྱུར་བཅོས་ཟབ་ཏུ་གཏོང་རྒྱུ་དང་། སྤྱི་ཚོགས་ཀྱིས་སྨན་ཁང་གཉེར་བར་སྐུལ་འདེད་གཏོང་རྒྱུ། འཕྲིན་སྦྲེལ་+སྨན་བཅོས་གནོད་མེད་འཕེལ་རྒྱས་གཏོང་བ། རྒྱང་རིང་གི་སྨན་བཅོས་ཞབས་ཞུའི་མ་ལག་ཇེ་མགྱོགས་སུ་འཛུགས་པ་དང་། གཞི་རིམ་གྱི་སྨན་བཅོས་འཕྲོད་བསྟེན་སྒྲིག་གཞིའི་ནུས་པ་འཛུགས་སྐྲུན་དང་། ནད་སྐྱོང་མི་སྣ་གསོ་སྐྱོང་བྱ་རྒྱུར་ཤུགས་སྣོན་རྒྱག་པ་བཅས་བྱས་ནས་རིམ་དབྱེའི་ནད་བརྟག་སྨན་བཅོས་དང་ཁྱིམ་ཚང་གི་སྨན་པའི་གན་འཇོག་ཞབས་ཞུའི་སྤུས་ཚད་མཐོ་རུ་གཏོང་རྒྱུ། སྔོན་འགོག་གཙོ་བོར་མཐའ་འཁྱོངས་བྱས་ཏེ་གསར་དུ་འཕར་བའི་མ་མཐའི་སྤྱི་པའི་འཕྲོད་བསྟེན་ཞབས་ཞུའི་ནོར་སྲིད་ཀྱི་ཁ་གསབ་རོགས་དངུལ་ཚང་མ་གྲོང་གསེབ་དང་སྡེ་ཁུལ་ལ་སྤྱད་དེ་གཞི་རིམ་མང་ཚོགས་ལ་ངེས་པར་ཕན་ཐོགས་ཐུབ་པར་བྱེད་རྒྱུ། རིམས་ནད་དང་ས་གནས་ཀྱི་ནད། གཞོན་ནུ་དང་བྱིས་པའི་རྒྱང་སྒྲིབ་མིག་ནད་བཅས་འགོག་བཅོས་དམ་འཛིན་བྱ་རྒྱུ། བུ་བཙའི་སྲིད་ཇུས་ཆ་འགྲིག་འཐུས་སྒོ་ཚང་དུ་གཏོང་རྒྱུ། བུད་མེད་དང་བྱིས་པའི་ལུས་ཁམས་བདེ་སྲུང་གི་ཞབས་འདེགས་ཞུ་ཤུགས་ཆེ་རུ་གཏོང་རྒྱུ་དང་། ཀྲུང་ལུགས་གསོ་རིག་དང་སྨན་རྫས་བྱ་གཞག་རྒྱུན་འཛིན་གསར་གཏོད་འཕེལ་རྒྱས་ལ་རྒྱབ་སྐྱོར་བྱེད་རྒྱུ། བདེ་ཐང་སློབ་གསོ་དང་བདེ་ཐང་གི་དོ་དམ་བྱེད་ཤུགས་ཆེ་རུ་གཏོང་རྒྱུ། སྨན་རྫས་དང་རིམས་འགོག་སྨན་ཁབ་ནི་མིའི་ཚེ་སྲོག་བདེ་ཐང་དང་འབྲེལ་བ་ཡོད་པས། བརྒྱུད་རིམ་ཧྲིལ་པོར་ལྟ་སྐུལ་དོ་དམ་བྱེད་ཤུགས་ངེས་པར་ཆེ་རུ་བཏང་སྟེ་ཁྲིམས་འགལ་བར་ཉེས་ཆད་དྲག་པོ་གཅོད་པ་ལས་གུ་ཡངས་སུ་མི་གཏོང་བ་དང་། འགན་ཤོར་ལས་འཛོལ་མཁན་ཞིབ་བཤེར་ཐག་གཅོད་ནན་པོར་བྱས་ནས་མི་དམངས་མང་ཚོགས་ཀྱི་ཚེ་སྲོག་བདེ་ཐང་གི་གཞི་ཐིག་མཐའ་གཅིག་ཏུ་བསྲུང་རྒྱུ།
     སྤྱི་ཚོགས་འགན་སྲུང་ལམ་ལུགས་དང་སྲིད་ཇུས་འཐུས་སྒོ་ཚང་དུ་གཏོང་རྒྱུ། རིམ་མང་རྒན་གསོའི་འགན་སྲུང་ལམ་ལུགས་འཛུགས་སྐྲུན་ལ་སྐུལ་འདེད་གཏོང་རྒྱུ།  རྒན་ཡོལ་ཞུ་མཁན་གྱི་མ་མཐའི་རྒན་གསོའི་འཚོ་དངུལ་མུ་མཐུད་མང་དུ་གཏོང་རྒྱུ།  དམག་ལོག་དམག་མིའི་ཐོབ་ཐང་འགན་སྲུང་དོན་འཁྱོལ་དང་། དམག་ལོག་དམག་མིའི་མ་མཐའི་རྒན་གསོ་དང་།  མ་མཐའི་སྨན་བཅོས་འགན་བཅོལ་རྒྱུན་མཐུད་སྲིད་ཇུས་འཐུས་སྒོ་ཚང་དུ་གཏོང་རྒྱུ། གྲོང་ཁྱེར་དང་གྲོང་གསེབ་ཀྱི་མ་མཐའི་འཚོ་རྟེན་དང་ཆེད་དམིགས་རོགས་སྐྱོབ་སོགས་པའི་ཚད་གཞི་མཐོ་རུ་འོས་འཚམ་གཏོང་བ་དང་།  དཀའ་གནས་སུ་གྱར་བའི་བྱིས་པར་འགན་སྲུང་བྱེད་ཤུགས་ཆེ་རུ་གཏོང་རྒྱུ།   གྲོང་ཁྱེར་དང་གྲོང་རྡལ་གྱི་དཀའ་ངལ་ཡོད་པའི་ལས་བཟོ་པ་དབུལ་ཕོངས་ལས་སྒྲོལ་ཤུགས་ཆེ་རུ་གཏོང་རྒྱུ། དབང་པོ་སྐྱོན་ཅན་སྔོན་འགོག་དང་ཁམས་གསོའི་ཞབས་ཞུ་སྒྲུབ་པའི་ཆུ་ཚད་མཐོ་རུ་གཏོང་རྒྱུ།  ང་ཚོས་མང་ཚོགས་མྱུར་སྐྱོབ་དཀའ་སེལ་དང་།  དགོས་པ་དུས་སུ་སྨིན་པར་བྱས་ཏེ། མ་མཐའི་དམངས་འཚོའི་གཞི་ཐིག་མཐའ་གཅིག་ཏུ་བསྲུང་རྒྱུ།
     མི་དམངས་མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཚོགས་སུ་གཏོང་རྒྱུ།   སྤྱི་ཚོགས་རིང་ལུགས་ཀྱི་སྲོག་ཤིང་རིན་ཐང་ལྟ་བ་སྐྱེད་སྲིང་དང་ལག་བསྟར་བྱེད་པ་དང་། མང་ཚོགས་ཀྱི་རང་བཞིན་ལྡན་པའི་བསམ་པའི་དཔལ་ཡོན་འཛུགས་སྤེལ་བྱེད་སྒོ་རྒྱ་ཆེར་སྤེལ་བ། འབད་བརྩོན་གྱི་སྙིང་སྟོབས་དང་།  ཚན་རིག་གི་སྙིང་སྟོབས། ངལ་རྩོལ་དཔེ་བཟང་ཅན་གྱི་སྙིང་སྟོབས། བཟོ་བོའི་སྙིང་སྟོབས་བཅས་དར་སྤེལ་ཤུགས་ཆེན་བཏང་སྟེ།  ཡར་ཐོན་དགེ་བརྩོན་གྱི་སྟོབས་ཤུགས་ཆེན་པོ་གཅིག་ཏུ་འགྲིལ་བར་བྱེད་རྒྱུ།  ཀྲུང་གོའི་ཁྱད་ཆོས་ལྡན་པའི་མཚན་ཉིད་རིག་པ་དང་སྤྱི་ཚོགས་ཚན་རིག་མགྱོགས་མྱུར་འཛུགས་རྒྱུ་དང་། འཕྲིན་སྦྲེལ་དྲ་བའི་ནང་དོན་འཛུགས་སྐྲུན་བྱེད་ཤུགས་ཆེ་རུ་གཏོང་རྒྱུ། རིག་རྩལ་གསར་རྩོམ་དར་རྒྱས་དང་། གསར་འགྱུར་པར་སྐྲུན་དང་། རླུང་འཕྲིན་གློག་བཪྙན་བཪྙན་འཕྲིན་དང་ཡིག་ཚགས་སོགས་པའི་ལས་དོན་འཕེལ་རྒྱས་གཏོང་རྒྱུ། རིག་དངོས་སྲུང་སྐྱོང་བེད་སྤྱོད་དང་དངོས་མིན་རིག་གནས་ཤུལ་བཞག་རྒྱུན་འཛིན་བྱེད་ཤུགས་ཆེ་རུ་གཏོང་རྒྱུ། རིག་གནས་ལས་དོན་དང་རིག་གནས་ཐོན་ལས་སྒྱུར་བཅོས་འཕེལ་རྒྱས་གཏོང་བ་དང་། གཞི་རིམ་གྱི་སྤྱི་པའི་རིག་གནས་ཞབས་ཞུའི་ནུས་པ་ཆེ་རུ་གཏོང་རྒྱུ། དམངས་ཡོངས་ཀྱིས་དཔེ་དེབ་ལྟ་བ་དར་སྤེལ་བཏང་ནས། སློབ་སྦྱོང་ཅན་གྱི་སྤྱི་ཚོགས་བསྐྲུན་པར་སྐུལ་འདེད་གཏོང་རྒྱུ། ཀྲུང་ཕྱིའི་བར་གྱི་མི་ཆོས་སྤེལ་རེས་གཏིང་ཟབ་ཏུ་གཏོང་རྒྱུ་དང་། དམངས་ཡོངས་ཀྱི་ལུས་སྦྱོང་བྱེད་སྒོ་རྒྱ་ཁྱབ་ངང་སྤེལ་རྒྱུ། 2020ལོའི་ཨའོ་རྩལ་འགྲན་ཚོགས་དང་། དབང་པོ་སྐྱོན་ཅན་པའི་ཨའོ་རྩལ་འགྲན་ཚོགས་ཀྱི་གྲ་སྒྲིག་ལས་ཀ་ཏན་ཏིག་ངང་ནས་ཡག་པོར་བསྒྲུབ་རྒྱུ་དང་། པེ་ཅིན་གྱི་དགུན་དུས་ཨའོ་རྩལ་འགྲན་ཚོགས་དང་། དབང་པོ་སྐྱོན་ཅན་པའི་དགུན་དུས་ཨའོ་རྩལ་འགྲན་ཚོགས་གྲ་སྒྲིག་ཞིབ་ཚགས། འཛམ་གླིང་དམག་མིའི་ལུས་རྩལ་འགྲན་ཚོགས་སྐབས་བདུན་པ་ལེགས་པོར་གཉེར་བ་བཅས་བྱེད་རྒྱུ། མི་དམངས་མང་ཚོགས་ལུས་སེམས་བདེ་ཐང་ཡོང་བར་བྱས་ན།  སྤྱི་ཚོགས་གསོན་ཤུགས་ཀྱིས་ཁེངས་ཤིང་།  རྒྱལ་ཁབ་དར་རྒྱས་གོང་འཕེལ་ཡོང་ངེས་རེད།
     སྤྱི་ཚོགས་བཅོས་སྐྱོང་དང་གསར་གཏོད་བྱེད་ཤུགས་ཆེ་རུ་གཏོང་རྒྱུ། སྤྱི་ཚོགས་བཅོས་སྐྱོང་གི་ལྟེ་བ་གཞི་རིམ་དུ་གཤམ་སྤོའི་སྐུལ་འདེད་གཏོང་བ་དང་།  སྤྱི་ཚོགས་ཞི་མཐུན་ཡོང་བར་བྱེད་པའི་“ཧྥེང་ཆའོ་ཉམས་མྱོང་”ཁྱབ་གདལ་དུ་གཏོང་རྒྱུ།   གྲོང་ཁྱེར་དང་གྲོང་གསེབ། སྡེ་ཁུལ་བཅས་བཅོས་སྐྱོང་བྱེད་སྟངས་གསར་པ་འཛུགས་རྒྱུ།  སྤྱི་ཚོགས་ཀྱི་རྩ་འཛུགས་དང་། མི་ཆོས་ཀྱི་རོགས་སྐྱོབ། དང་བླངས་ཞབས་ཞུ། དགེ་རྩའི་བྱ་གཞག་བཅས་སྐྱོན་བྲལ་ངང་འཕེལ་རྒྱས་གཏོང་བར་ཁྲིད་སྟོན་དང་རྒྱབ་སྐྱོར་བྱེད་རྒྱུ། སྤྱི་ཚོགས་ཀྱི་ཡིད་རྟོན་མ་ལག་འཐུས་སྒོ་ཚང་དུ་བཏང་ནས། བུད་མེད་དང་བྱིས་པ། རྒན་རྒོན། དབང་པོ་སྐྱོན་ཅན་བཅས་པའི་ཁྲིམས་མཐུན་ཁེ་དབང་འགན་སྲུང་བྱེད་རྒྱུ། ཡིག་བསྐུར་ངོ་བཅར་གྱི་ལས་དོན་ལེགས་བཅོས་བྱས་ནས། མང་ཚོགས་ཀྱི་ཚུལ་མཐུན་བདེ་སྡུག་ཞུ་རིགས་ཁྲིམས་ལྟར་དུས་ཐོག་ཏུ་ཐག་གཅོད་བྱེད་རྒྱུ། སྤྱི་ཚོགས་ཐོག་སེམས་ཁམས་ཀྱི་ཞབས་འདེགས་ཞུ་ཤུགས་ཆེ་རུ་གཏོང་རྒྱུ། རྒྱལ་ཁབ་ཀྱི་མཁོ་བསྟུན་མ་ལག་འཐུས་སྒོ་ཚང་དུ་བཏང་སྟེ། གནོད་འགོག་གེགས་སེལ་རྒུད་སྐྱོབ་བཅས་ཀྱི་ནུས་པ་ཆེ་རུ་གཏོང་རྒྱུ། བདེ་འཇགས་སྒོ་ནས་ཐོན་སྐྱེད་བྱེད་ཤུགས་ཆེ་རུ་བཏང་སྟེ། ལས་འཛོལ་ཚབས་ཆེན་དང་ཤིན་ཏུ་ཚབས་ཆེ་རིགས་ཉེན་ཟོན་དང་བཀག་འགོག་བྱེད་རྒྱུ། ས་ཡོམ་དང་གནམ་གཤིས། ཆུ་དཔྱད། ས་གཤིས། ཐིག་ལེན་སོགས་པའི་ལས་དོན་ལེགས་པར་བསྒྲུབ་རྒྱུ། སྤྱི་པའི་བཅའ་ཁྲིམས་ཀྱི་ཞབས་ཞུའི་མ་ལག་འཐུས་སྒོ་ཚང་དུ་བཏང་ནས། ཁྲིམས་ལུགས་ཁྱབ་སྤེལ་དང་དྲིལ་བསྒྲགས་ཀྱི་སློབ་གསོ་ཟབ་ཏུ་སྤེལ་རྒྱུ་དང་། རྒྱལ་ཁབ་ཀྱི་བདེ་འཇགས་ནུས་པ་འཛུགས་སྐྲུན་བྱེད་ཤུགས་ཆེ་རུ་གཏོང་རྒྱུ། དངོས་སྣང་ཅན་གྱི་སྤྱི་ཚོགས་བདེ་འཇགས་འགོག་སྲུང་མ་ལག་འཐུས་སྒོ་ཚང་དུ་གཏོང་བ་དང་། ནག་སེལ་ངན་འཇོམས་ཀྱི་ཆེད་དམིགས་འཐབ་རྩོད་གཏིང་ཟབ་ཏུ་སྤེལ་ནས། རྐུ་འཕྲོག་མགོ་སྐོར་གཡོ་ལེན་དང་འཆལ་རྒྱན་དུག་ལ་སོགས་པའི་ཁྲིམས་འགལ་ཉེས་གསོག་གི་བྱ་སྤྱོད་ལ་ཁྲིམས་ལྟར་ཆད་པ་གཅོད་རྒྱུ་དང་། ཁྲིམས་དང་འགལ་ཏེ་དངུལ་བསྡུ་དང་། བརྒྱུད་འཚོང་སོགས་པའི་དཔལ་འབྱོར་གྱི་ཉེས་གསོག་ལ་རྡུང་རྡེག་གཏོང་བ། སྤྱི་དམངས་སྒེར་གྱི་ཆ་འཕྲིན་ལ་བཙན་གནོད་བྱེད་པ་སོགས་པའི་གནད་དོན་མངོན་གསལ་དོད་རིགས་བཅོས་སྒྲིག་བྱས་ཏེ། མི་དམངས་མང་ཚོགས་ཀྱི་བདེ་འཇགས་བགེགས་མེད་འཚོ་བ་སྲུང་སྐྱོང་མཐའ་གཅིག་ཏུ་ཡག་པོར་བྱེད་རྒྱུ།  【1】  【2】  【3】  【4】  【5】  【6】  【7】  【8】