འཚོལ་བཤེར།   
藏文频道
2019ལོའི་ཟླ་5ཚེས་27ཉིན།

༄༅།།སྲིད་གཞུང་གི་ལས་དོན་སྙན་ཞུ།

——2019ལོའི་ཟླ་3ཚེས་5ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གཉིས་པའི་ཐོག རྒྱལ་སྲིད་སྤྱི་ཁྱབ་ཁང་གི་ཙུང་ལི།  ལི་ཁེ་ཆང་།

གསར་འགྱུར་སྤེལ་དུས།  【2019ལོའི་ཟླ་ 05ཚེས་24ཉིན། 10:46】   (རྩོམ་སྒྲིག་འགན་འཁུར་པ། མཁའ་འགྲོ།)

 
     འཐུས་མི་རྣམ་པ།
     ད་ལྟ་ངས་རྒྱལ་སྲིད་སྤྱི་ཁྱབ་ཁང་གི་ཚབ་ཞུས་ཏེ་ཚོགས་ཆེན་ལ་སྲིད་གཞུང་གི་ལས་དོན་སྙན་སེང་ཞུ་རྒྱུ་ཡིན་པས། གྲོས་ཞིབ་གནང་རོགས་ཞུ་རྒྱུ་མ་ཟད། རྒྱལ་ཡོངས་སྲིད་གྲོས་ཀྱི་ཨུ་ཡོན་རྣམ་པས་ཀྱང་དགོངས་འཆར་གནང་རོགས་ཞུ་རྒྱུ་ཡིན།
     གཅིག  2018ལོའི་ལས་ཀ་ཕྱིར་དྲན་བྱས་པ།
     འདས་པའི་ལོ་གཅིག་གི་རིང་ནི་ཏང་གི་ཚོགས་ཆེན་བཅུ་དགུ་པའི་དགོངས་པ་ཁྱོན་ཡོངས་ནས་ལག་ལེན་མཐར་ཕྱིན་བསྟར་འགོ་ཚུགས་མ་ཐག་པའི་ལོ་ཡིན་པ་དང་། སྐབས་འདི་གའི་སྲིད་གཞུང་གིས་ཁྲིམས་ལྟར་འགན་འཁྲི་སྒྲུབ་ལོ་དང་པོ་རེད། རང་རྒྱལ་གྱི་འཕེལ་རྒྱས་ལ་ལོ་མང་རིང་འབྱུང་དཀོན་པའི་རྒྱལ་ནང་གི་གནས་བབ་ཪྙོག་འཛིང་དྲག་པོ་ཐུག་པ་དང་། དཔལ་འབྱོར་ཆག་པའི་གནོན་ཤུགས་གསར་པ་ཐོན་པ་རེད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་དབུ་ཁྲིད་འོག  རྒྱལ་ཡོངས་མི་རིགས་ཁག་གི་མི་དམངས་ཀྱིས་བློ་མཐུན་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྟོན་དུ་བཟུང་སྟེ། ཞུན་བརྡར་མདུན་སྐྱོད་དང་། དཀའ་སྤྱད་འགག་སྒྲོལ་ཐོག་ནས་ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་དམིགས་འབེན་གྱི་ལས་འགན་གཙོ་བོ་ལེགས་འགྲུབ་བྱུང་བ་དང་། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པའི་རྒྱལ་ཁ་ཕུ་ཐག་ཆོད་པོ་ལེན་པར་འཕེལ་རྒྱས་ཆེན་པོ་བྱུང་བ་རེད།
     ——དཔལ་འབྱོར་འཁོར་སྐྱོད་ལུགས་མཐུན་བར་སྟོང་དུ་རྒྱུན་མཐུད་ཐུབ་ཡོད། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་6.6%འཕར་ཡོད་པ་དང་། བསྡོམས་འབོར་སྒོར་དུང་ཕྱུར་ཁྲི་90ལས་བརྒལ་ཡོད། དཔལ་འབྱོར་འཕེལ་བའི་མྱུར་ཚད་ནི་གློག་སྤྱོད་དང་དངོས་ཟོག་སྐྱེལ་འདྲེན་སོགས་པའི་དངོས་པོའི་འབོར་གྲངས་ཀྱི་དམིགས་ཚད་དང་ཆ་མཐུན་བྱུང་ཡོད། གྲོང་མིའི་འཛད་སྤྱོད་རིན་གོང་2.1%འཕར་བ་དང་། རྒྱལ་སྤྱིའི་གཏོང་ཡོང་རྩ་བའི་ཆ་ནས་དོ་མཉམ་བྱུང་ཡོད། གྲོང་ཁྱེར་དང་གྲོང་རྡལ་གྱི་ལས་ཞུགས་འཕར་ཚད་མི་གྲངས་ཁྲི་1361ཟིན་པ་དང་། བརྟག་དཔྱད་བྱས་འབྲས་སུ་ལས་ཀ་ཤོར་ཚད་5%ཡས་མས་ཀྱི་ཚད་དམའ་པོར་བརྟན་གནས་ཐུབ་པས། མི་གྲངས་དུང་ཕྱུར་14ཟིན་ཉེའི་དར་རྒྱས་འགྲོ་བཞིན་པའི་རྒྱལ་ཁབ་ཆེན་པོར་ལས་ཀར་ཞུགས་གང་ཐུབ་བྱེད་ཐུབ་པ་རེད།
     ——དཔལ་འབྱོར་གྲུབ་ཚུལ་རྒྱུན་མ་ཆད་པར་བཟང་པོར་གྱུར་ཡོད། འཛད་སྤྱོད་ཀྱིས་དཔལ་འབྱོར་འཕེལ་བར་བྱེད་པའི་ནུས་པ་ཇེ་ཆེར་ཕྱིན་ཡོད། ཞབས་ཞུའི་ལས་རིགས་ཀྱིས་དཔལ་འབྱོར་འཕེལ་བར་ལེགས་སྐྱེས་འབུལ་ཚད་60%ཟིན་པ་དང་། ཚན་རྩལ་མཐོ་གྲས་ཀྱི་ཐོན་ལས་དང་། སྒྲིག་ཆས་བཟོ་སྐྲུན་ལས་རིགས་ཀྱི་འཕེལ་ཚད་ནི་བཟོ་ལས་སྤྱིར་བཏང་ལས་མངོན་གསལ་མྱུར་ཅིང་། ཞིང་ལས་ལ་ཡང་བསྐྱར་ལོ་ལེགས་བྱུང་བ་དང་། རྩིས་གཞི་རེའི་རྒྱལ་ནང་ཐོན་སྐྱེད་རིན་ཐང་གི་ནུས་ཁུངས་ཟད་གྲོན་3.1%ཆག་ཡོད། སྤུས་ཚད་དང་ཕན་འབྲས་མུ་མཐུད་ལེགས་སུ་ཕྱིན་ཡོད།
     ——སྒུལ་ནུས་གསར་པ་འཕེལ་ཚུལ་མགྱོགས་སུ་ཕྱིན་ཡོད།  ཟླ་བའི་ལྷ་མོ་ཨང་རྟགས་བཞི་པ་སོགས་ཚན་རྩལ་གསར་གཏོད་ཀྱི་གྲུབ་འབྲས་གསར་པ་གལ་ཆེན་ཁག་གཅིག་སྔ་རྗེས་སུ་བཏོན་ཡོད། གསར་དར་ཐོན་ལས་དབྱར་མཚོ་རྒྱས་པ་ལྟར་འཕེལ་བ་དང་། སྲོལ་རྒྱུན་གྱི་ཐོན་ལས་ཚུལ་སྒྱུར་རིམ་སྤོར་མགྱོགས་སུ་བཏང་ཡོད། དམངས་ཀྱིས་བྱ་གཞག་སྐྲུན་པ་དང་། ཀུན་གྱིས་གསར་གཏོད་བྱེད་པ་ཁྱབ་སྤེལ་ཟབ་མོར་བཏང་ཞིང་། ཉིན་རེར་ཆ་སྙོམས་ཁེ་ལས་གསར་འཛུགས་བྱེད་ཚད་ཁྲི་1.8ལས་བརྒལ་བ་དང་། ཚོང་རའི་བྱེད་པོའི་གྲངས་འབོར་དུང་ཕྱུར་1ལས་བརྒལ་ཡོད། སྒུལ་ནུས་གསར་པས་ཐོན་སྐྱེད་བྱེད་སྟངས་ལ་འཕོ་འགྱུར་ཟབ་མོ་བྱུང་སྟེ། ཀྲུང་གོ་འཕེལ་རྒྱས་ཀྱི་བཟང་ཆ་གསར་པ་སྐྲུན་བཞིན་ཡོད།
     ——སྒྱུར་བཅོས་སྒོ་འབྱེད་འགག་གནད་གསར་པ་སྒྲོལ་ཐུབ་ཡོད། རྒྱལ་སྲིད་སྤྱི་ཁྱབ་ཁང་དང་ས་གནས་སྲིད་གཞུང་གི་སྒྲིག་གཞི་སྒྱུར་བཅོས་བདེ་བླག་ངང་བྱས་ཡོད། ཁྱབ་ཁོངས་གལ་ཆེན་གྱི་སྒྱུར་བཅོས་གོམ་སྟབས་གསར་པ་སྤོས་པ་དང་། ཚོང་རར་བཅུག་འཐུས་ཀྱི་ལྡོག་ཕྱོགས་གསལ་ཐོའི་ལམ་ལུགས་ཕྱོགས་ཡོངས་ནས་ལག་ལེན་བསྟར་བ། ལས་ཁུངས་ཁུ་བསྡུ་དང་དབང་ཆ་གཤམ་སྤྲོད། གློད་སྡོམ་ཟུང་འབྲེལ། ཞབས་ཞུ་བཟང་བསྒྱུར་བཅས་ཀྱི་སྒྱུར་བཅོས་བྱེད་ཤུགས་ཆེ་རུ་བཏང་བས། ཚོང་གཉེར་ཁོར་ཡུག་གི་རྒྱལ་སྤྱིའི་རིམ་གྲལ་ཇེ་ཆེར་འཕར་ཡོད། ཕྱི་ཕྱོགས་སུ་སྒོ་འབྱེད་ཁྱོན་ཆེ་རུ་བཏང་བ་དང་། “རྒྱུད་གཅིག་ལམ་གཅིག་”མཉམ་སྐྲུན་ལ་གྲུབ་འབྲས་འགངས་ཆེན་ཐོབ་ཡོད། ཀྲུང་གོའི་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་གཉེར་བ་ལམ་ལྷོང་བྱུང་བ་དང་། ཧའེ་ནན་གྱི་རང་མོས་ཉོ་ཚོང་ཚོད་ལྟ་ཁུལ་འཛུགས་སྐྲུན་བྱེད་འགོ་ཚུགས་ཡོད། དངོས་ཟོག་ཕྱིར་གཏོང་ནང་འདྲེན་བསྡོམས་འབོར་སྒོར་དུང་ཕྱུར་ཁྲི་30ལས་བརྒལ་ཞིང་། ཕྱི་རྒྱལ་གྱི་མ་དངུལ་དངོས་སུ་སྤྱོད་ཚད་ཨ་སྒོར་དུང་ཕྱུར་1383ཟིན་ཏེ། དར་རྒྱས་འགྲོ་བཞིན་པའི་རྒྱལ་ཁབ་ཀྱི་མདུན་གྲལ་དུ་བརྟན་པོར་གནས་ཡོད།
     ——འགག་སྒྲོལ་དམག་འཐབ་ཆེན་པོ་གསུམ་འགོ་ཡག་པོར་ཚུགས་ཐུབ་ཡོད།  ཉམས་ཉེན་གལ་ཆེན་འགོག་སེལ་བྱས་པ་དང་། སྤྱི་ཁོག་གི་བཀན་ཤིང་ཚོད་འཛིན་བརྟན་པོ་བྱུང་ཞིང་། དངུལ་རྩའི་འཁོར་སྐྱོད་སྤྱིའི་ཆ་ནས་བརྟན་པོ་བྱུང་ཡོད། དབུལ་བྲལ་གནད་འཁེལ་སྐུལ་སྤེལ་ཤུགས་ཆེན་བྱས་པས། གྲོང་གསེབ་ཀྱི་དབུལ་ཕོངས་མི་གྲངས་ཁྲི་1386ཙམ་ཉུང་དུ་སོང་བ་དང་། གནས་སྤོས་དབུལ་སྐྱོར་མི་གྲངས་ཁྲི་280ཟིན་ཡོད། སྦགས་བཙོག་འགོག་བཅོས་བྱེད་ཤུགས་ཆེ་རུ་གཏོང་ཐུབ་པ་དང་། ཕྲ་རྡུལ་(PM2.5)མཐུག་ཚད་མུ་མཐུད་ཆག་སྟེ། སྐྱེ་ཁམས་དཔལ་ཡོན་འཛུགས་སྐྲུན་ལ་གྲུབ་འབྲས་མངོན་གསལ་དོད་པོ་ཐོབ་ཡོད།
     ——མི་དམངས་ཀྱི་འཚོ་བ་ལེགས་བཅོས་རྒྱུན་མཐུད་བྱུང་ཡོད།  གྲོང་མི་མི་རེའི་ཆ་སྙོམས་སྤྱད་འཐུས་ཡོང་སྒོ་6.5%དངོས་སུ་འཕར་ཡོད། སྒེར་གྱི་ཐོབ་ཁྲལ་བསྡུ་གཞི་ཆེ་རུ་བཏང་བ་དང་། ཆེད་དམིགས་ཟུར་སྣོན་འཕྲི་འཐེན་ཁག་6བཙུགས་ཡོད། མ་མཐའི་རྒན་གསོ་དང་མ་མཐའི་སྨན་བཅོས་སོགས་པའི་འགན་བཅོལ་བྱེད་ཤུགས་ཆེ་རུ་བཏང་བ་དང་། སློབ་གྲྭ་རིགས་ཁག་གི་ཁྱིམ་ཚང་དཀའ་ངལ་ཡོད་པའི་སློབ་མར་རོགས་དངུལ་སྤྲོད་ཚད་མི་ཐེངས་གྲངས་དུང་ཕྱུར་1ལ་ཉེ་བ་ཟིན་ཡོད། སྡོད་ཁང་ཐེབས་ཆག་ཁུལ་གྱི་ཁང་པ་ཆ་འགྲིག་ཁྲི་620ལྷག་ཙམ་བསྒྱུར་བཀོད་བྱས་པ་དང་། གྲོང་གསེབ་ཀྱི་ཉེན་ཅན་ཁང་པ་ཁྱིམ་དུད་ཁྲི་190བསྒྱུར་བཀོད་བྱས་ཡོད། གྲོང་ཁྱེར་དང་གྲོང་གསེབ་ཀྱི་གྲོང་མིའི་འཚོ་བའི་ཆུ་ཚད་མུ་མཐུད་འཕེལ་རྒྱས་བསྐྱར་མ་བྱུང་ཡོད།
     ང་ཚོས་སྒྱུར་བཅོས་སྒོ་འབྱེད་བྱས་ནས་ལོ་ངོ་40འཁོར་བར་རྟེན་འབྲེལ་གཟབ་རྒྱས་ཞུས་པ་དང་། སྒྱུར་བཅོས་སྒོ་འབྱེད་ཀྱི་གྲུབ་འབྲས་རླབས་པོ་ཆེ་དང་རིན་ཐང་བྲལ་བའི་ཉམས་མྱོང་ཕྱོགས་བསྡོམས་གཏིང་ཟབ་བྱས་ཤིང་། དུས་རབས་གསར་པར་སྒྱུར་བཅོས་སྒོ་འབྱེད་མཐའ་འཁྱོངས་བར་བྱེད་པའི་ཆོད་སེམས་བརྟན་པོ་གསལ་སྟོན་གཟབ་ནན་བྱས་པས། རྒྱལ་ཡོངས་མི་རིགས་ཁག་གི་མི་དམངས་ཀྱིས་འབད་འཐབ་རྒྱུན་མཐུད་བྱེད་པ་དང་། ལོ་རྒྱུས་ཀྱི་བྱས་རྗེས་རླབས་པོ་ཆེ་བསྐྱར་མ་གཏོད་པར་སྐུལ་མ་བཏང་ཡོད།
     འདས་ལོར་ཕྱིར་དྲན་བྱས་པ་ན། གྲུབ་འབྲས་སླ་པོར་ཐོབ་པ་མིན། ང་ཚོའི་ཁ་ཕྱོགས་ཡུལ་ནི་འགྱུར་བ་གཏིང་ཟབ་བྱུང་བའི་ཕྱིའི་ཁོར་ཡུག་རེད། དཔལ་འབྱོར་གོ་ལ་ཧྲིལ་པོ་ཅན་དུ་བསྒྱུར་བར་འགལ་རྐྱེན་འཕྲད་པ་དང་། ཕྱོགས་མང་རིང་ལུགས་ལ་ཕོག་ཐུག་འཁེལ་ཞིང་། རྒྱལ་སྤྱིའི་དངུལ་རྩའི་ཚོང་ར་འཕར་ཆག་ཆེ་བ་དང་། ལྷག་པར་དུ་ཀྲུང་གོ་དང་ཨ་རི་བར་དཔལ་འབྱོར་གདོང་གཏུག་བྱུང་བས། ཁེ་ལས་འགའ་ཞིག་གི་ཐོན་སྐྱེད་གཉེར་སྐྱོང་དང་། ཚོང་རའི་སྔོན་དཔག་སོགས་ལ་གནོད་རྐྱེན་འབྱུང་བཞིན་ཡོད། ང་ཚོའི་ཁ་ཕྱོགས་ཡུལ་ནི་དཔལ་འབྱོར་གྱི་ཁ་ཕྱོགས་སྒྱུར་བའི་ཟུག་གཟེར་མངོན་གསལ་ལྡང་བའི་འགྲན་སློང་དྲག་པོ་རེད། འགལ་བ་གསར་ཪྙིང་མཉམ་དུ་འདྲེས་ཤིང་། དུས་འཁོར་གྱི་རང་བཞིན་དང་། གྲུབ་ཚུལ་རང་བཞིན་གྱི་གནད་དོན་རྩེག་སྣོན་ཡིན་པ། དཔལ་འབྱོར་འཁོར་སྐྱོད་བརྟན་པོའི་ངང་ནས་འགྱུར་བ་བྱུང་བ། འགྱུར་བའི་ཁྲོད་སེམས་ངལ་ལྡན་པ་བཅས་རེད། ང་ཚོའི་ཁ་ཕྱོགས་ཡུལ་ནི་བྱ་དཀའ་བྱེད་གཏད་དང་དཀའ་གནད་མང་བའི་ཪྙོག་འཛིང་གི་རྣམ་པ་རེད། བརྟན་པོའི་ངང་ནས་འཕེལ་བར་བྱེད་པ་དང་ཉམས་ཉེན་འགོག་པ་སོགས་ཀྱི་དམིགས་ཡུལ་མང་པོ་མངོན་འགྱུར་བྱས་པ་དང་། དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བ་སོགས་པའི་ལས་འགན་མང་པོ་འགྲུབ་པ། འཕྲལ་ཕུགས་སོགས་པའི་འབྲེལ་བ་སྣ་ཚོགས་ཐག་གཅོད་ཡག་པོར་བྱས་ཤིང་། སྲིད་ཇུས་ཀྱི་གདམ་ག་དང་ལས་ཀར་སྐུལ་སྤེལ་གཏོང་བའི་དཀའ་གནད་ཆེ་རུ་མངོན་གསལ་ཕྱིན་ཡོད། རྒྱལ་ཡོངས་གོང་འོག་གིས་ཐུན་མོང་ཐོག་འབད་འཐབ་བྱས་པར་བརྟེན། རང་རྒྱལ་གྱི་དཔལ་འབྱོར་འཕེལ་རྒྱས་གཞི་གྲངས་མཐོན་པོའི་ཐོག་སྤྱིའི་ཆ་ནས་བརྟན་པོ་དང་། བརྟན་པོའི་ངང་ནས་འཕེལ་རྒྱས་བྱུང་སྟེ། སྤྱི་ཚོགས་ཁྱོན་ཡོངས་ནས་བརྟན་བརླིང་རྒྱུན་མཐུད་ཐུབ་ཡོད། འདིའི་ཐོག་ནས། ཀྲུང་གོའི་གུང་ཁྲན་ཏང་གི་དབུ་ཁྲིད་འོག  ཀྲུང་གོའི་མི་དམངས་ལ་དཀའ་ཉེན་གང་ཞིག་ཐུག་ཀྱང་རྣམ་པར་རྒྱལ་བའི་བློ་སྟོབས་དང་། བློ་རིག  སྟོབས་ཤུགས་བཅས་ལྡན་པ་དང་། ཀྲུང་གོའི་འཕེལ་རྒྱས་ལ་ཐར་མི་ཐུབ་པའི་འགོག་རྐྱེན་ཞིག་མེད་པ་བསྐྱར་དུ་མཚོན་པ་རེད།
     ལོ་ངོ་གཅིག་འདས་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འཐབ་ཇུས་བཀོད་པ་ང་ཚོས་ལག་བསྟར་གཏིང་ཟབ་བྱས་པ་དང་། བརྟན་པོའི་ངང་ནས་ཡར་རྒྱས་ཡོང་བའི་སྤྱིའི་དགོངས་གཞི་མཐའ་འཁྱོངས། བརྟན་པོའི་ངང་ནས་འཕར་བ་དང་། སྒྱུར་བཅོས་ལ་སྐུལ་སྤེལ། གྲུབ་ཚུལ་ལེགས་སྒྲིག  དམངས་འཚོར་ཕན་པ། ཉམས་ཉེན་འགོག་པ་བཅས་གཅིག་གྱུར་འཆར་འགོད་བྱས་ཤིང་། ཀྲུང་གོ་དང་ཨ་རི་བར་གྱི་དཔལ་འབྱོར་ཉོ་ཚོང་གི་གདོང་གཏུག་ལ་ཁ་གཏད་བརྟན་པོར་བཅལ་བ། ལས་ཞུགས་བརྟན་པོ་དང་། དངུལ་རྩ་བརྟན་པོ། ཕྱི་ཕྱོགས་ཉོ་ཚོང་བརྟན་པོ། དངུལ་འཇོག་བརྟན་པོ། སྔོན་དཔག་བརྟན་པོ་བཅས་ཡོང་གང་ཐུབ་བྱས་པའི་ལས་དོན་གཙོ་བོ་གཤམ་གསལ། 
     གཅིག་ནས་སྤྱི་ཁོག་སྙོམ་སྒྲིག་གསར་གཏོད་དང་འཐུས་སྒོ་ཚང་དུ་བཏང་བ་དང་། དཔལ་འབྱོར་བརྟན་པོའི་ངང་འཁོར་སྐྱོད་རྒྱུན་མཐུད་བྱས་ཡོད། གནས་ཚུལ་གསར་པ་དང་འགྱུར་བ་གསར་པར་དམིགས་ནས། ང་ཚོས་“ཞིང་ཆུ་འབྱིང་གཏོང་”ལྟ་བུའི་ཤུགས་རྐྱེན་མི་བཟོ་བ་མཐའ་འཁྱོངས་དང་། སྤྱི་ཁོག་སྲིད་ཇུས་ཀྱི་རྒྱུན་མཐུད་ངང་ཚུལ་དང་བརྟན་པོའི་ངང་ཚུལ་རྒྱུན་འཁྱོངས་བྱས་ནས། བར་སྟོང་སྙོམ་སྒྲིག་གི་རྨང་གཞིའི་ཐོག་ཕྱོགས་ངེས་དང་། སྐབས་བསྟུན་སྙོམ་སྒྲིག  རང་འགུལ་ངང་ནས་སྔོན་སྒྲིག  ཕྲན་སྒྲིག་བཅས་བྱེད་ཤུགས་ཆེ་རུ་བཏང་ཡོད། དགེ་མཚན་ལྡན་པའི་ནོར་སྲིད་སྲིད་ཇུས་ལག་ལེན་མཐའ་འཁྱོངས་བྱས་པ་དང་། ཁྲལ་གྲོན་གཅོག་པ་དང་། ཆད་སྐྱོན་གསབ་ནས་གྲུབ་ཚུལ་ལེགས་སྒྲིག་གང་ཐུབ་བྱས་ཡོད། གནས་ཐང་འཕར་ཁྲལ་གྱི་ཁྲལ་ཚད་བཅག་པ་དང་། ཁེ་ལས་ཆུང་ཕྲན་གྱི་དཔྱ་ཁྲལ་གཟིགས་སྐྱོང་བྱེད་ཁྱོན་ཆེ་རུ་བཏང་བ། ཞིབ་འཇུག་གསར་གཏོད་ལ་བསྔགས་སྐུལ་སོགས་ཀྱི་དཔྱ་ཁྲལ་སྲིད་ཇུས་འདོན་པ་བཅས་བྱས་ཡོད། ལོ་ཧྲིལ་པོར་ཁེ་ལས་དང་སྒེར་གྱི་ཁྲལ་གྲོན་སྒོར་དུང་ཕྱུར་ཁྲི་1.3ཙམ་བཅག་ཡོད། ནོར་སྲིད་ཀྱི་གཏོང་སྒོའི་གྲུབ་ཚུལ་ཇེ་ལེགས་སུ་བཏང་བ་དང་། ནོར་སྲིད་ཀྱི་གསོག་འཇོག་མ་དངུལ་གང་འགབ་ཅི་སྤྱོད་བྱས་པས། ཁྱབ་ཁོངས་གཙོ་གནད་ཀྱི་གཏོང་སྒོ་འགན་སྲུང་ཐུབ་ཡོད། དངུལ་ལོར་གྱི་སྲིད་ཇུས་བརྟན་པོ་ལག་ལེན་མཐའ་འཁྱོངས་བྱས་ཏེ། དངུལ་རྩས་དངོས་གཞིའི་དཔལ་འབྱོར་ལ་རོགས་སྐྱོར་བྱེད་པར་ཁྲིད་སྟོན་བྱས་ཡོད། མ་དངུལ་བསྡུ་རུབ་དཀའ་བ་དང་བསྡུ་རུབ་ཀྱི་གནས་ཐང་ཆེ་བར་དམིགས་ཏེ། སྔ་རྗེས་སུ་བཅོལ་དངུལ་གྱི་གྲབས་དངུལ་གཅོག་ཐེངས་4བྱས་ཤིང་། དམངས་གཉེར་དང་། ཁེ་ལས་ཆུང་ཕྲན་གྱི་མ་དངུལ་དཀོན་པའི་གནས་སྟངས་ཐབས་མང་མཉམ་སྤྱོད་ཐོག་ནས་ཞི་ལྷོད་དུ་བཏང་བས། མ་དངུལ་བསྡུ་རུབ་ཀྱི་མ་གནས་འཕར་ཚུལ་བཀག་འགོག་རགས་ཙམ་ཐུབ་ཡོད། མ་རྐང་ཚོང་ར་དང་། བུ་ལོན་ཁྲོམ་ར་འཕར་ཆག་ཆེ་ཚུལ་ལ་དུས་ཐོག་ཏུ་ཁ་གཏད་བཅལ་ཞིང་། མི་དམངས་ཤོག་སྒོར་གྱི་དངུལ་བརྗེས་འཛའ་ཐང་རྩ་བའི་ཆ་ནས་བརྟན་པོ་བྱུང་བ་དང་། ཕྱི་དངུལ་གསོག་འཇོག་ཨ་སྒོར་དུང་ཕྱུར་ཁྲི་3ཡན་རྒྱུན་མཐུད་ཐུབ་ཡོད།
     གཉིས་ནས་འགག་སྒྲོལ་དམག་འཐབ་ཆེན་པོ་གསུམ་བརྟན་པོ་དང་ཡག་པོར་བརྒྱབ་པ་དང་། ལས་འགན་ལྟེ་བར་དགེ་མཚན་ལྡན་པའི་གྲུབ་འབྲས་ཐོབ་ཡོད། འགག་སྒྲོལ་དམག་འཐབ་ཆེན་པོ་གསུམ་རྒྱག་པའི་ལོ་གསུམ་རིང་གི་བྱ་སྤྱོད་འཆར་གཞི་བཟོས་པ་མ་ཟད་ལག་བསྟར་གོ་རིམ་ལྡན་པར་བྱས་ཡོད། གྲུབ་ཚུལ་རང་བཞིན་ལ་བརྟེན་ནས་བཀན་ཤིང་དོར་བ་བརྟན་པོའི་ངང་ནས་སྤེལ་བ་དང་། དངུལ་རྩའི་ཁྱབ་ཁོངས་ཀྱི་ཉམས་ཉེན་ཐག་གཅོད་འཚམ་པོར་བྱས་ཤིང་། ས་གནས་སྲིད་གཞུང་གི་བུ་ལོན་ཉམས་ཉེན་འགོག་ཟོན་བྱས་པ་དང་། ས་ཁང་བདག་ཁོངས་ཚོང་ར་སྙོམ་སྒྲིག་གི་ལམ་སྲོལ་སྒྱུར་བཅོས་འཐུས་ཚང་བྱས་ཡོད། དབུལ་བྲལ་གནད་འཁེལ་ཟབ་མོར་བྱས་པ་དང་། དབུལ་སྐྱོར་སྟོབས་ཤུགས་ཆེ་རུ་བཏང་བ། མ་དངུལ་འཇོག་ཤུགས་ཆེ་རུ་བཏང་བ། སྤྱི་ཚོགས་ཀྱི་རོགས་རེས་བྱེད་ཤུགས་ཆེ་རུ་བཏང་བ་བཅས་བྱས་པས། དབུལ་ཕོངས་ས་ཁུལ་རང་ངོས་འཕེལ་རྒྱས་གཏོང་ནུས་བརྟན་པོའི་ངང་ནས་ཆེ་རུ་སོང་ཡོད། གནམ་སྔོན་དང་། ཆུ་དྭངས། ས་གཙང་བཅས་སྲུང་ཐབས་ཕྱོགས་ཡོངས་ནས་བྱས་ཡོད། ནུས་ཁུངས་དང་སྐྱེལ་འདྲེན་གྱི་གྲུབ་ཚུལ་བཟང་པོར་གྱུར་ཡོད། བྱང་ཕྱོགས་ས་ཁུལ་དུ་“རྡོ་སོལ་རླངས་སྒྱུར་”དང་“རྡོ་སོལ་གློག་སྒྱུར་”བརྟན་པོའི་ངང་ནས་ཁྱབ་སྤེལ་བྱས་ཡོད། ཆུ་དཔོན་ལམ་ལུགས་དང་། མཚེའུ་དཔོན་ལམ་ལུགས་ཕྱོགས་ཡོངས་ནས་བཙུགས་ཡོད། རྫས་འགྱུར་ཞིང་སྨན་སྤྱོད་ཚད་མཉམ་ཆག་བྱུང་བ་དང་། སྐྱེ་ཁམས་ཁོར་ཡུག་ལ་ལྟ་སྐུལ་ཞིབ་བཤེར་གྱི་ཁྲིམས་བསྟར་བྱེད་ཤུགས་ཆེ་རུ་བཏང་ནས། གནམ་གཤིས་ཀྱི་འགྱུར་བར་ཁ་གཏད་ཧུར་ཐག་བཅལ་ཡོད། 
【1】  【2】  【3】  【4】  【5】  【6】  【7】  【8】