༄༅།།2019ལོའི་གངས་ཤུད་རི་འཛེག་འཛམ་གླིང་བུམ་པའི་ཐོག་(ཀྲུང་གོའི་སུང་ཧྭ་ཅང་ས་ཚུགས)བོད་ལྗོངས་
ཀྱི་ལུས་རྩལ་པར་འབྲས་བཟང་ཐོབ་པ།

     མི་དམངས་དྲ་བའི་འཕྲིན། ཟླ་2ཚེས་19ཉིན། 2019ལོའི་གངས་ཤུད་རི་འཛེག་འཛམ་གླིང་བུམ་པ(ཀྲུང་གོའི་སུང་ཧྭ་ཅང་ས་ཚུགས)ཅི་ལིན་ཞིང་ཆེན་སུང་ཧྭ་མཚེའུ་གངས་ཤུད་ར་བར་སྤེལ་བ་དང་། ཐེངས་འདིའི་འགྲན་བསྡུར་དེ་2019ལོའི་གངས་ཤུད་རི་འཛེག་འཛམ་གླིང་བུམ་པ་ཡོ་རོབ་གླིང་ཕུད་པའི་ས་ཁུལ་དུ་སྤེལ་བའི་འགྲན་བསྡུར་བྱེད་སྒོ་གཅིག་པུ་དེ་ཡིན་ཞིང་། ཀྲུང་གོ་དང་།  རི་པིན།  ཨོ་སི་ཁྲུ་རི་ཡ། འཇར་མན། སི་ཕེན། ཨུ་རུ་སུ་སོགས་རྒྱལ་ཁབ་12དང་ས་ཁུལ་100ལ་ཉེ་བའི་འཛམ་གླིང་གི་ལུས་རྩལ་པ་རྩེ་གྲ་ཅི་ལིན་གྱི་དབན་ཁོ་སུང་ཧྭ་མཚེའུ་ཡི་ངལ་གསོ་སྤྲོ་འཆམ་བྱ་ཁུལ་དུ་འཛོམས་ནས་འགྲན་བསྡུར་བྱས་པ་དང་། བོད་ལྗོངས་རི་འཛེག་རུ་ཁག་གི་རུ་མི་5ཡིས་ཀྲུང་གོའི་འཐུས་མི་བྱས་ནས་འགྲན་བསྡུར་ནང་ཞུགས་ཡོད་པ་རེད།     
     ཀྲུང་གོའི་ཅི་ལིན་ཞིང་ཆེན་དུ་སྤེལ་བའི་2019ལོའི་གངས་ཤུད་རི་འཛེག་འཛམ་གླིང་བུམ་པའི་(ཀྲུང་གོའི་སུང་ཧྭ་ཅང་ས་ཚུགས)མི་སྒེར་གྱི་ཐང་ཆེན་འགྲན་བསྡུར་ཁྲོད། ཀྲུང་གོའི་བོད་རང་སྐྱོང་ལྗོངས་ཀྱི་ལུས་རྩལ་པ་བསོད་ནམས་ཆོས་སྒྲོན་ལ་བུད་མེད་ཀྱི་ཡོངས་བསྒྲགས་ཚོགས་ཆུང་གི་ཨང་དང་པོ་ཐོབ་པ་དང་། སྐལ་བཟང་ཆོས་སྒྲོན་ལ་ཨང་གསུམ་པ་ཐབ་ཡོད་པ་དང་། དཀོན་མཆོག་བསམ་གཏན་ལ་སྐྱེས་པའི་ན་གཞོན་ཚོགས་ཆུང་གི་ཨང་གཉིས་པ་ཐོབ་པ་དང་། བསམ་གཏན་ཚེ་དབང་ལ་ཨང་གསུམ་པ་ཐོབ་ཡོད་པ་རེད།