འཚོལ་བཤེར།   
藏文频道
2018ལོའི་ཟླ་10ཚེས་15ཉིན།

༄༅།།རྒྱལ་ཁབ་ཁྲིམས་དཔོན་སློབ་གླིང་བོད་ལྗོངས་ཡན་ལག་སློབ་གླིང་གིས་བོད་རྒྱ་སྐད་གཉིས་ཀྱི་ཤེས་ལྡན་པ་1000ཙམ་གསོ་སྦྱོང་བྱས་པ།

གསར་འགྱུར་སྤེལ་དུས།  【2018ལོའི་ཟླ་ 10ཚེས་15ཉིན། 10:36】   (རྩོམ་སྒྲིག་འགན་འཁུར་པ། བསྟན་འཛིན།)

 
        ཤིན་ཧྭ་གསར་འགྱུར་ཁང་ནས་གློག་འཕྲིན་འབྱོར་གསལ། ཉེ་ཆར་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་ནས་གསར་འགོད་པར་ཤེས་རྟོགས་བྱུང་བར། རྒྱལ་ཁབ་ཁྲིམས་དཔོན་སློབ་གླིང་བོད་ལྗོངས་ཡན་ལག་སློབ་གླིང་གིས་བོད་རྒྱ་སྐད་གཉིས་ཀྱི་ཁྲིམས་དཔོན་དང་། ཁྲིམས་རའི་ཟིན་བཀོད་བ། མི་དམངས་ཀྱི་འདྲི་གཅོད་ལས་རོགས་པ། སྐད་གཉིས་ཁྲིམས་གཅོད་ཡིག་རིགས་བཟོ་མཁན་སོགས་ཁྱོན་མི་1000ཙམ་གསོ་སྦྱོང་བྱས་ནས། བོད་རིགས་མང་ཚོགས་ཀྱིས་བོད་ཡིག་དང་བོད་སྐད་སྤྱད་དེ་ཞུ་གཏུག་བྱེད་ཐུབ་པའི་འགན་ལེན་བྱས་པ་རེད།
          “བཅའ་ཁྲིམས་ཀྱི་སྐད་ཆ་ནི་ཧ་ཅང་གཟབ་ནན་དང་ཆེད་ལས་ཤིག་ཡིན། མིག་སྔར། བོད་ཀྱི་མང་ཚོགས་ཁག་གཅིག་གིས་རྒྱ་སྐད་མི་ཤེས་པ་དང་ལྷག་པར་ཏུ་ཞིང་འབྲོག་པ་ཁག་གཅིག་གིས་རྒྱ་སྐད་ཤེས་ཀྱི་མེད་པས་ཕན་ཚུན་འབྲེལ་བ་བྱེད་པར་བཀག་རྒྱ་བཟོས་ཡོད། སྐད་གཉིས་གསོ་སྦྱོང་བྱས་པ་བརྒྱུད། ངས་བོད་རྒྱ་སྐད་གཉིས་ཀྱི་བཅའ་ཁྲིམས་སྐོར་གྱི་ཐ་སྙད་སློབ་སྦྱོང་བྱས་པས། གྱོད་གཞི་སྒྲུབ་གཉེར་དང་ཡང་ན་འགལ་བ་འདུམ་འགྲིག་བྱེད་པ་སོགས་ཀྱི་ཐད་ནུས་པ་གལ་ཆེན་ཐོན་ཐུབ”ཅེས་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གི་ཁྲིམས་དཔོན་ཞུས་ཞའོ་ཀྲེང་གིས་བརྗོད་པ་རེད།
        རྒྱལ་ཡོངས་བོད་རྒྱ་སྐད་གཉིས་ཀྱི་ཁྲིམས་དཔོན་བོད་ལྗོངས་གསོ་སྦྱོང་རྟེན་གཞི་ནི་ཆེས་མཐོའི་མི་དམངས་ཁྲིམས་ཁང་གིས་ཆོག་མཆན་ཐོབ་པ་བརྒྱུད་2013ལོའི་ཟླ་བདུན་པར་བཙུགས་ཤིང་། 2015ལོ་ནས་2018ལོའི་བར་ཁྲིམས་དཔོན་གསོ་སྦྱོང་འཛིན་གྲྭ་ཐེངས་བཞི་དང་གསོ་སྦྱོང་བསླབ་གཞི་རྩོམ་སྒྲིག་གི་བགྲོ་གླེང་འཛིན་གྲྭ་ཐེངས་གཅིག་གཉེར་བར་བོད་རང་སྐྱོང་ལྗོངས་ཀྱི་ཁྲིམས་ཁང་དང་། སི་ཁྲོན་དང་། ཡུན་ནན། ཀན་སུའུ། མཚོ་སྔོན་བཅས་ཞིང་ཆེན་བཞིའི་བོད་རིགས་ས་ཁུལ་གྱི་ཁྲིམས་ཁང་གི་བོད་རྒྱ་སྐད་གཉིས་ཁྲིམས་དཔོན་352ཞུགས་ཡོད་པ་རེད།