༄༅།།བོད་ལྗོངས་ལྷོ་ཁའི་རྒན་གསོ་ཁང་གི་ཉི་མ་ལ་ཁའི་ལས་འཕྲོ།

        མི་དམངས་དྲ་བའི་འཕྲིན། ཟླ་10ཚེས་9ཉིན། ལྷོ་ཁ་གྲོང་ཁྱེར་སྣེ་གདོང་ཆུས་རྒན་གསོ་ཁང་དུ་ལོ་64ལ་སླེབས་པའི་ཚེ་རིང་རྡོ་རྗེས་བཟའ་ཟླར་སྒྲ་སྙན་དཀྲོལ་གཏོང་བྱེད་བཞིན་ཡོད་ཅིང་། ཁོ་གཉིས་ནི་རྒན་གསོ་ཁང་དུ་ཕན་ཚུན་དགའ་པོ་བྱས་ནས་གཉེན་སྒྲིག་བྱས་པ་ཞིག་རེད། 
           བོད་ལྗོངས་ལྷོ་ཁ་གྲོང་ཁྱེར་སྣེ་གདོང་ཆུས་རྒན་གསོ་ཁང་དུ་ཁེར་རྐྱང་རྒན་རྒོན་174ཡོད་ཅིང་། ཁོ་ཚོ་ནི་གྲོང་རྡལ་དང་ཤང་མི་འདྲ་བ་ནས་ཡོང་ནས་འདིར་མཉམ་འཛོམས་བྱུང་བ་ཞིག་ཡིན་པ་དང་། དུས་ཡུན་རིང་པོར་མཉམ་དུ་འཚོ་བར་རོལ་བའི་རྐྱེན་གྱིས་རྒན་རྒོན་མི་ཉུང་བ་ཞིག་དབར་བརྩེ་དུང་ཟབ་མོ་ཆགས་ཡོད། མིག་སྔར་རྒན་གསོ་ཁང་དུ་ཕན་ཚུན་དགའ་པོ་བྱས་ནས་གཉེན་སྒྲིག་བྱས་པའི་བཟའ་ཚོ་19ཡོད་ཅིང་། “ལང་ཚོ”ཐེངས་གཉིས་པ་མགོ་བརྩམས་ཤིང་ཡོད།