༄༅།།རྒྱབ་ཤ་དཀར་པོའི་དེབ་ནང་མཚོ་བོད་ས་མཐོའི་ཁུལ་ནི་སྔར་རྒྱུན་བཞིན་ས་གོ་ལའི་ཐོག་ས་
ཁུལ་གཙང་ཤོས་ཀྱི་གྲས་ཤིག་རེད་ཅེས་འཁོད་ཡོད། 

      མི་དམངས་དྲ་བའི་འཕྲིན། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་ཟླ་7ཚེས་18ཉིན་བཏོན་པའི་《མཚོ་བོད་ས་མཐོའི་སྣོད་བཅུད་ཤེས་དཔལ་འཛུགས་སྐྱོང་གནས་ཚུལ་》གྱི་རྒྱབ་ཤ་དཀར་པོའི་དེབ་ནང་མཚོ་བོད་ས་མཐོའི་ཁུལ་ནི་སྔར་རྒྱུན་བཞིན་ས་གོ་ལའི་ཐོག་ས་ཁུལ་གཙང་ཤོས་ཀྱི་གྲས་ཤིག་རེད་ཅེས་འཁོད་ཡོད།
     རྒྱབ་ཤ་དཀར་པོའི་དེབ་ནང་མཚོ་བོད་ས་མཐོར་མིའི་རིགས་ཀྱི་བྱེད་སྒོ་སྤེལ་ཉུང་བ་དང་། མཁའ་རླུང་གི་སྤུས་ཚད་ལ་མིའི་རིགས་ཀྱི་བྱེད་སྒོས་ཤུགས་རྐྱེན་ཐེབས་ཤུགས་ཆུང་བ། སྦགས་བཙོག་བཟོ་བའི་སྐྱེ་དངོས་རིགས་ཅུང་ཉུང་བ། གར་ཚད་ཅུང་དམའ་བས་སྦགས་བཙོག་དངོས་པོ་སྣ་ཚོགས་ཀྱི་འདུས་ཚད་དེ་བྱང་སྣེ་ས་ཁུལ་དང་སྤྱིར་ན་ཁྱད་པར་མེད། ལྗང་མདོག་ནུས་རྒྱུ་ཁྱབ་གདལ་དང་། སྣོད་བཅུད་གྲོང་ཁྱེར་དང་གྲོང་རྡལ་འཛུགས་སྐྲུན། གྲོང་གསེབ་ཁོར་ཡུག་ཕྱོགས་བསྡུས་བཅོས་སྐྱོང་བཅས་ལ་རྒྱུན་ཆད་མེད་པར་སྐུལ་འདེད་བཏང་བ་དང་བསྟུན་ནས་མཚོ་བོད་ས་མཐོའི་མཁའ་རླུང་སྤུས་ཚད་སྔར་བས་ལེགས་སུ་སོང་ཡོད་ཅེས་འཁོད་ཡོད།
    མིག་སྔར། མཚོ་བོད་ས་མཐོའི་གཙང་པོ་དང་མཚོ་གཙོ་བོ་རྣམས་གཞི་རྩའི་ཆར་རང་བྱུང་གི་རྣམ་པ་ཡིན་ལ་ཆུ་སྤུས་ཀྱང་ཡག་པོ་ཡོད། རྒྱབ་ཤ་དཀར་པོའི་དེབ་ནང་མཚོ་བོད་ས་མཐོ་ནི་ཨེ་ཤེ་ཡའི་གཙང་པོ་གཙོ་བོ་མང་པོ་ཞིག་གི་འབྱུང་ཁུངས་ཡིན་ལ་ཀྲུང་གོའི་ཆུའི་ཐོན་ཁུངས་དོ་དམ་དང་ཆུའི་ཁོར་ཡུག་སྲུང་སྐྱོང་ནན་ཤོས་ཀྱི་ས་ཁོངས་ཀྱི་གྲས་ཤིག་ཀྱང་ཡིན་ཞེས་འཁོད་ཡོད། རྒྱལ་ཁབ་ཀྱིས་མཚོ་བོད་ས་མཐོའི་ཆུའི་ཁོར་ཡུག་སྲུང་སྐྱོང་བྱ་ཤུགས་རྒྱུན་ཆད་མེད་པར་ཆེ་རུ་བཏང་ཞིང་། བྱ་ཐབས་གཙོ་བོའི་ནང་ཆུ་ཁོངས་གལ་ཆེན་གྱི་ཕྱོགས་བསྡུས་འཆར་འགོད་བཟོ་བ་དང་། གཙང་པོ་དང་མཚོ་དང་མཚེའུའི་ཆུའི་ནུས་པའི་ཁུལ་དབྱེ་བ། ཆུ་ཁོངས་ཀྱི་ནུས་པ་དང་ཆུ་སྤུས་སྲུང་སྐྱོང་གི་དམིགས་ཚད་གསལ་བཟོ། གཙང་པོ་དང་མཚོ་དང་མཚེའུའི་ཆུའི་ནུས་པའི་ཁུལ་གྱི་སྦགས་བཙོག་འཇུ་ནུས་དང་བཤངས་འབུད་ཚོད་འཛིན་བསྡོམས་འབོར་ཞིབ་བཤེར་གཏན་འཁེལ། ཆུའི་ཐོན་ཁུངས་ཀྱི་དོ་དམ་ལམ་ལུགས་ནན་ཤོས་ལག་བསྟར་བཅས་ཚུད་ཡོད་པ་རེད།
     རྒྱབ་ཤ་དཀར་པོའི་དེབ་ནང་མཚོ་བོད་ས་མཐོ་ནི་གོ་ལ་ཧྲིལ་པོར་སྦགས་བཙོག་ཕོག་ཉུང་ཤོས་ཀྱི་ས་ཁུལ་གྲས་ཤིག་ཡིན་པ་དང་། ས་རྒྱུའི་ཁོར་ཡུག་སྤྱིའི་ཆར་རང་བྱུང་ལྷུན་གྱིས་གྲུབ་པའི་རྣམ་པ་ཡིན། ས་རྒྱུའི་རིགས་དང་ལྕི་བའི་ལྕགས་རིགས་ཀྱི་གཞི་རྒྱུ་ལྡན་ཚད་ས་གྲུབ་རྟིང་རྡོའི་རང་བཞིན་དང་གནམ་གཤིས་ཆ་རྐྱེན་གྱི་ཚོད་འཛིན་ཕོག་པ་ལས་མིའི་རིགས་འགུལ་སྐྱོད་ཀྱི་ཤུགས་རྐྱེན་ཐེབས་པ་ཅུང་ཉུང་། ས་མཐོའི་མཚོའི་དིམ་བསགས་དངོས་པོར་ཟངས་དང་། ནིག ཞ་ཉེ་སོགས་ལྕི་བའི་ལྕགས་རིགས་ཀྱི་གཞི་རྒྱུ་ལྡན་ཚད་ནི་མིའི་རིགས་འགུལ་སྐྱོད་བྱེད་མང་བའི་མཚོའི་དིམ་བསགས་དངོས་པོ་ལས་ཉུང་བ་ཡོད། རྨོ་ཞིང་གི་ས་རྒྱུར་བལྟས་ན། བོད་ཀྱི་རྨོ་ཞིང་མང་ཆེ་བའི་ས་རྒྱུར་ལྕི་བའི་ལྕགས་རིགས་ཀྱི་གཞི་རྒྱུ་ལྡན་ཚད་རྒྱལ་ཁབ་ཀྱི་རིམ་པ་དང་པོའི་ས་རྒྱུའི་ཚད་གཞི་ལས་ལེགས་པ་ཡོད་ཅེས་འཁོད་ཡོད།
     དེ་དང་ཆབས་ཅིག སྡོད་མལ་ཁོར་ཡུག་མངོན་གསལ་དོད་པོས་ལེགས་སུ་ཕྱིན་ཡོད། རྒྱབ་ཤ་དཀར་པོའི་དེབ་ནང་2009ལོ་ནས་བཟུང་རྒྱལ་ཁབ་ཀྱིས་རིམ་རྩིས་བརྒྱབ་ན་མ་དངུལ་སྒོར་དུང་ཕྱུར་62.94བཏང་ནས་བོད་རང་སྐྱོང་ལྗོངས་དང་། མཚོ་སྔོན་ཞིང་ཆེན་དང་དེ་བཞིན་སི་ཁྲོན་དང་། ཡུན་ནན། ཀན་སུའུ་བཅས་ཀྱི་བོད་རིགས་ས་ཁུལ་གྱི་གྲོང་ཁྱེར་དང་གྲོང་རྡལ་གྱི་འཚོ་བའི་ཆུ་སྙིགས་དང་གད་སྙིགས་གཙང་སེལ་སྒྲིག་བཀོད་དང་ཆུ་སྙིགས་ཀྱི་མདོང་ལམ་དྲ་བའི་རྣམ་གྲངས་ལ་རྒྱབ་སྐྱོར་བྱས་ཏེ་ས་གནས་དེ་གའི་གྲོང་ཁྱེར་དང་གྲོང་རྡལ་གྱི་འཚོ་བའི་ཆུ་སྙིགས་དང་གད་སྙིགས་གཙང་སེལ་བྱེད་ནུས་ཆེ་རུ་བཏང་ཡོད་ཅེས་འཁོད་ཡོད།