༄༅།།ནང་སའི་ཀ་པ་རིམ་པ་གསུམ་པའི་སྨན་ཁང་གི་རིགས་གཅིག་མཁས་ཅན་བོད་ལྗོངས་སུ་ཡོང་ནས
་སྨན་དོན་མི་སྣ་བརྒྱ་ལྷག་ཙམ་ལ་གསོ་སྦྱོང་བྱས་པ།

      མི་དམངས་དྲ་བའི་འཕྲིན། ཚེས་22ཉིན་རྒྱལ་ཡོངས་ཀྱི་ཀ་པ་རིམ་པ་གསུམ་པའི་སྨན་ཁང་གི་རིགས་གཅིག་མཁས་ཅན་25བོད་ལྗོངས་གཞིས་རྩེ་གྲོང་ཁྱེར་དུ་ཡོང་ནས“རང་བརྟེན”རྣམ་པའི་སྨན་བཅོས་བོད་སྐྱོར་བྱེད་འགོ་བརྩམས་ཏེ། རིག་གཞུང་ཚན་ཁག་འཛུགས་སྐྱོང་དང་། སྨན་ཁང་དོ་དམ་གྱི་འདུ་ཤེས་དང་སྨན་བཅོས་འཕྲུལ་ཆས་ཚད་ལྡན་ཅན་བེད་སྤྱོད་བཅས་བྱེད་པའི་ཐད་བོད་ཀྱི་གཞི་རིམ་སྨན་དོན་མི་སྣ་100ལྷག་ཙམ་ལ་གསོ་སྦྱོང་བྱས་པ་རེད།
      རྣམ་གྲངས་འདི་ནི་2016ལོར་འགོ་ཚུགས་པའི“སྨན་བཅོས་མཉམ་འགྲོགས་བྱ་སྤྱོད”ཀྱི་བོད་སྐྱོར་ཆེད་སྦྱོང་ཚན་ཁག་འཛུགས་སྐྱོང་དང་དོ་དམ་ནུས་པ་གསོ་སྦྱོང་གི་རྣམ་གྲངས་ཤིག་ཡིན་པ་དང་། འདི་ནི་དེ་སྔའི་རྒྱལ་ཁབ་འཕྲོད་བསྟེན་འཆར་བཙའ་ཨུ་ལྷན་སྨན་ཁང་དོ་དམ་ཞིབ་འཇུག་སུའོ་ཡིས་གཙོ་གཉེར་བྱས་པ་དང་། ནུབ་རྒྱུད་མཐའ་མཚམས་ས་ཁུལ་སྨན་ཁང་གི་ཁ་གཏད་རོགས་སྐྱོར་མཉམ་ལས་ལ་དམིགས་པའི་སྤྱི་ཕན་རྣམ་གྲངས་ཤིག་རེད། དེའི་དམིགས་ཡུལ་ནི་ནུབ་རྒྱུད་སྨན་ཁང་གི་སྨན་བཅོས་ལག་རྩལ་གྱི་ཕྱོགས་བསྡུས་ནུས་པ་ཆེ་རུ་བཏང་ནས་སྨན་ཁང་གི་སྤྱི་ཡོངས་ཀྱི་དོ་དམ་ཆུ་ཚད་དང་དེ་བཞིན་སྨན་པ་དཀའ་བཅུ་པའི་ཆེད་ལས་ཅན་དང་ཚད་ལྡན་ཅན་གྱི་སྨན་བཅོས་ཆུ་ཚད་མཐོ་རུ་གཏོང་རྒྱུ་དེ་རེད།
      རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་སྨན་དོནདང་སྨན་ཁང་དོ་དམ་ཅུས་ཀྱི་ལས་རིགས་སྤྱོད་ཚུལ་འཛུགས་སྐྱོང་ཁྲུའི་ཁྲུའུ་ཀྲང་ཁྲེན་ཧུའུ་ཡིས་ལོ་2ལྷག་ཙམ་རིང「སྨན་བཅོས་མཉམ་འགྲོགས་བྱ་སྤྱོད」ཀྱིས་བོད་ལྗོངས་སུ་ཆེད་དོན་གསོ་སྦྱོང་ཐེངས་4བྱས་པས་ས་གནས་དེ་གའི་སྨན་དོན་མི་སྣ་400ལྷག་ཙམ་ལ་ཕན་པ་ཐོབ་ཡོད། རོགས་སྐྱོར་དང་ལེན་བྱེད་མཁན་ཕྱོགས་ཀྱིས་སྨན་ཁང་དོ་དམ་ཚད་ལྡན་དུ་བཏང་བ་དང་རིག་གཞུང་ཚན་ཁག་འཛུགས་སྐྱོང་བྱེད་པ་བརྒྱུད་ད་ཡོད་ཀྱི་ཤེས་ལྡན་པ་གནས་ཐུབ་པར་བྱས་ཏེ་སྨན་བཅོས་ཐད「རང་བརྟེན」ཐུབ་རྒྱུའི་རེ་བ་ཡོད་ཅེས་ངོ་སྤྲོད་བྱས་པ་རེད།
      ད་ཐེངས་ཀྱི་བོད་སྐྱོར“སྨན་བཅོས་མཉམ་འགྲོགས་བྱ་སྤྱོད”རྣམ་གྲངས་ཀྱི་སྨན་བཅོས་རིགས་གཅིག་མཁས་ཅན་ཚོགས་ཆུང་གི་ཁོངས་མི་ཚང་མ་ནི་ས་གནས་ཁག་གི་སྨན་བཅོས་རིག་གཞུང་ཚན་ཁག་འཛུགས་སྐྱོང་དང་སྨན་བཅོས་དོ་དམ་ཁྱབ་ཁོངས་ཀྱི་རིགས་གཅིག་མཁས་ཅན་ཤ་སྟག་ཡིན་ཞིང་།  དེ་དག་ནི་ཧྲང་ཧའེ་དང་། ཀོང་ཏུང་། ཧེ་ལུང་ཅང་། ཧོ་པེ། ཅང་སུའུ། ཧུའུ་པེ། ཁྲུང་ཆིང་། ཧྲའན་ཤིས་སོགས་ས་གནས་ཀྱི་སྨན་བཅོས་སྒྲིག་གཞི་ཁག་སོ་སོ་ནས་ཡོང་བ་ཞིག་ཡིན་པ་རེད།