༄༅།།བོད་ལྗོངས་ལྷོ་ཁ་གྲོང་ཁྱེར་གྲ་མ་ལུང་གྲོང་ཚོས་ཡུལ་སྐོར་འཕེལ་རྒྱས་བཏང་ནས་དབུལ་སྒྲོལ་
ཕྱུག་འགྱུར་ཡོང་བར་བྱས་པ། 

      མི་དམངས་དྲ་བའི་འཕྲིན། དྲོ་སྐྱིད་ལྡན་པའི་ཉི་འོད་ཤེལ་ལྟར་སྔོ་བའི་ཡར་འབྲོག་གཡུ་མཚོའི་ངོས་སུ་འཕྲོ་སྐབས། ཀུའེ་ཀྲོའུ་ནས་སླེབས་པའི་ཞའོ་དབྱང་དང་བཟའ་ཟླས་མཚོ་ངོགས་སུ་གཉེན་སྒྲིག་པར་རྒྱག་བཞིན་མཆིས།
      “ཕ་ཡུལ་གྱི་མཛེས་ལྗོངས་ལ་ཐེངས་མང་བལྟས་ཟིན་པས་ལྟ་འདོད་མི་འདུག ཡར་འབྲོག་གཡུ་མཚོ་ཧ་ཅང་མཛེས་པོ་ཡོད་པ་སྔ་ས་ནས་ཐོས་མྱོང་བས་འདི་གར་མི་ཚེའི་ཆེས་གལ་ཆེ་བའི་སྐད་ཅིག་ཉིད་པར་ལེན་རྒྱུའི་འཆར་གཞི་བཀོད་པ་ཡིན”ཞེས་སྐུ་ཞབས་དབྱང་ལགས་ཉིན་འགའི་གོང་ཀུའེ་ཀྲོའུ་ནས་ལྷ་སར་བསྐྱོད་པ་དང་པར་རྒྱག་ཚོགས་པ་དང་མཉམ་དུ་རླངས་འཁོར་ལ་བསྡད་དེ་ཡར་འབྲོག་གཡུ་མཚོར་བསྐྱོད་པ་ཞིག་རེད། མཁྱེན་ལྡན་མ་ཁྲེན་ལགས་ཀྱིས“ང་ཚོའི་ཀུང་སིས་ལྷ་སར་ཆེད་མངགས་བོད་ཀྱི་པར་རྒྱག་ལས་སྒོ་སྣ་ཚོགས་མཁོ་འདོན་བྱེད་ཀྱི་ཡོད”ཅེས་བརྗོད། ཁོང་ནི་ལྷ་སའི་གཉེན་སྒྲིག་པར་རྒྱག་ཁང་ཞིག་གི་མཛེས་འཆོས་མཁན་ཞིག་རེད། ཁོང་གིས“ཉེ་བའི་ལོ་ཤས་ནང་ཡུལ་སྐོར་ལས་རིགས་འཕེལ་རྒྱས་ཆེན་པོ་ཕྱིན་པ་དང་བསྟུན་ནས་མི་དེ་བས་མང་བ་བོད་དུ་ཡོང་བའི་འདུན་པ་སྐོང་ཐུབ་པ་མ་ཟད། ཡར་འབྲོག་གཡུ་མཚོའང་ངོ་མཚར་དོན་གཉེར་དང་ཁྱད་ཆོས་དོན་གཉེར་བྱེད་པའི་བཟའ་ཚང་གསར་པ་ཚོ་གཉེན་སྒྲིག་གི་པར་རྒྱག་སའི་གདམ་ཀ་ཐོག་མ་དེར་གྱུར་པ་དང་ང་ཚོའི་ཚོང་ཡང་ཇེ་ལེགས་སུ་འགྲོ་བཞིན་འདུག”ཅེས་ངོ་སྤྲོད་བྱས།
     ཡར་འབྲོག་གཡུ་མཚོའི་རྡོ་རིང་གི་མདུན་དུ་ལྷག་བཟང་གིས་རང་ཁྱིམ་གྱི་གཡག་ཁྲིད་དེ་ཡུལ་སྐོར་བར་སྣེ་ལེན་ཞུ་བཞིན་ཡོད་པ་དང་ཡར་འབྲོག་གཡུ་མཚོའི་འགྲམ་དུ་གཡག་བཞོན་ཏེ་པར་རྒྱག་ཐེངས་རེར་སྒོར་20ལེན་གྱི་ཡོད། དབྱར་ཁ་ཡུལ་སྐོར་བ་མང་བའི་དུས་སུ་ཉིན་ལྟར་པར་རྒྱག་མཁན་བརྒྱ་ལྷག་ཙམ་ཡོད་པས་ཡོང་འབབ་མང་པོ་ཡོད་པ་དང་དགུན་དུས་ཡུལ་སྐོར་བ་ཉུང་དུས་སུའང་ཉིན་ལྟར་བཅུ་ལྷག་ཙམ་ཡོད།
     “དེ་སྔ་གྲོང་མི་ཚོར་ཡོང་འབབ་གང་ཡང་མེད་པས་གློག་ཀྱང་སྤྱོད་མི་ཕོད་པར་ལྕི་བ་བསྲེགས་ནས་དྲོད་ལེན་གྱི་ཡོད” གྲ་མ་ལུང་གྲོང་ཚོར་ས་བབ་མཐོ་ཚད་སྨི་4500ཡོད་པ་དང་དེ་སྔ་གཙོ་བོ་ནས་དང་པད་ཁ་འདེབས་པ་དང་འབྲོག་ལས་ལ་བརྟེན་ནས་འཚོ་ཐབས་བྱེད་ཀྱི་ཡོད། འདི་ལོ་ལོ་52ལ་སོན་པའི་གྲ་མ་ལུང་གྲོང་ཚོའི་ཀྲི་པུའི་ཧྲུའུ་ཅི་ཉི་མ་བསམ་གྲུབ་ཀྱིས་གྲོང་ཚོའི་འཕོ་འགྱུར་གྱི་དཔང་པོ་བྱེད་ཐུབ། ཡུལ་སྐོར་ལས་རིགས་འཕེལ་རྒྱས་གཏོང་ཆེད། ས་གནས་དེ་གའི་སྲིད་གཞུང་གིས་འགྲོ་ལམ་བཟོས་པས་ཡུལ་སྐོར་བ་ཉིན་རེ་བཞིན་ཇེ་མང་དུ་སོང་ཡོད། ན་ནིང་ས་གནས་དེ་གའི་སྲིད་གཞུང་གིས་གམ་པ་ལ་ཡུལ་སྐོར་ཁུལ་གསར་སྤེལ་བྱས་ནས་ཡུལ་སྐོར་ཀུང་སིར་གཅིག་གྱུར་དོ་དམ་བྱ་རྒྱུར་འགན་གཙང་སྤྲད་པ་དང་ལོ་ལྟར་གྲོང་མི་ཚོར་ཡོང་འབབ་བགོ་བཤའ་རྒྱག་གི་ཡོད།
     རི་སྐེད་དུ་ཡོད་པའི་འཛོམས་པའི་ཁྱིམ་དུ་སླེབས་སྐབས་གཙང་སྦྲ་དོད་ལ་གྲལ་སྒྲིག་པའི་སྒོ་ར་དང་ཐོག་སོ་གཉིས་ལྡན་གྱི་སྡོད་ཁང་མིག་མདུན་དུ་འཆར་བྱུང་། ཁྱིམ་གྱི་བརྙན་འཕྲིན་འཇོག་སར་ཕྱེ་མར་དང་ཁ་ཟས་དང་ཤིང་འབྲས་སྣ་ཚོགས་བསྒྲིགས་འདུག ལོ་ལྔ་བཅུ་ལྷག་ཙམ་ལ་སོན་པའི་འཛོམས་པ་ཐང་ཤ་དོད་པ་དང་ངོ་གདོང་ནས་བདེ་སྐྱིད་ཀྱི་འཛུམ་མདངས་མངོན་བཞིན་འདུག
     ཁོང་གི་ཁྱིམ་ལ་ས་ཞིང་མུའུ་14ཡོད་པར་གཙོ་བོ་ནས་དང་པད་ཁ་འདེབས་ཀྱི་ཡོད། དབྱར་དུས་ཡུལ་སྐོར་ལས་རིགས་གཉེར་བ་དང་དགུན་དུས་ཁྱིམ་གྱི་འབྲི་གཡག་17དེ་དག་འཚོ་གི་ཡོད་པས་འབྲུ་རིགས་ཀྱི་ཁ་གསབ་དང་རྩྭ་ཐང་གི་ཁ་གསབ་བསྣན་ཚེ་ན་ནིང་ལོ་གཅིག་ལ་ཡོང་འབབ་སྒོར་ཁྲི་3.5བྱུང་ཡོད། སློབ་ཆེན་དུ་མཐར་ཕྱིན་པའི་ཕྲུ་གུ་གཉིས་གཞུང་ལས་པར་ཚུད་ནས་ད་ཆ་འཚོ་བ་ཧ་ཅང་ཡག་པོ་ཡོད།