༄༅།།ལྷ་སར་ནུས་རྒྱུ་གསར་པའི་སྤྱི་སྤྱོད་རླངས་འཁོར་བཅུ་ཆ་དྲུག་ཟིན་པ།

     མི་དམངས་དྲ་བའི་འཕྲིན། གསར་འགོད་པར་བོད་ལྗོངས་འགྲིམ་འགྲུལ་སྡེ་ཚན་ནས་ཤེས་རྟོགས་བྱུང་བར་2018ལོའི་ལོ་འགོར་ལྷ་ས་གྲོང་ཁྱེར་དུ་གློག་རླངས་འདྲེས་མའི་སྤྱི་སྤྱོད་རླངས་འཁོར་128བེད་སྤྱོད་བྱས་པས་ད་ཡོད་ཀྱི་ནུས་རྒྱུ་གསར་པའི་སྤྱི་སྤྱོད་རླངས་འཁོར་312བར་མང་དུ་ཕྱིན་པ་དེས་གྲོང་ཁྱེར་ཡོངས་ཀྱི་སྤྱི་སྤྱོད་རླངས་འཁོར་བསྡོམས་འབོར་གྱི་60%བཟུང་ཡོད། ལྷ་ས་གྲོང་ཁྱེར་གྱིས་སྟབས་བདེ་དང་། ལྗང་མདོག བདེ་ཐང་བཅས་ལྡན་པའི་ཕྱིར་སྐྱོད་ཀྱི་ཁོར་ཡུག་བཟང་པོ་བསྐྲུན་པར་གྲོང་མི་ཚོའི་གདེང་འཇོག་ཡག་པོ་ཐོབ་ཡོད།
     “ནུས་རྒྱུ་གསར་པའི་སྤྱི་སྤྱོད་རླངས་འཁོར་བེད་སྤྱོད་བྱེད་ཤུགས་ཆེ་རུ་བཏང་བ་དེས་གྲོང་མི་ཚོའི་ཕྱིར་སྐྱོད་མི་བདེ་བའི་གནད་དོན་ནུས་ལྡན་ངང་བསལ་བ་དང་དུས་མཚུངས་ལྷ་སའི་དྭངས་ཤིང་གཙང་བའི་རི་ཆུ་ཀླུང་གསུམ་སྲུང་སྐྱོང་བྱ་རྒྱུར་ལེགས་སྐྱེས་ཀྱང་འབུལ་ཐུབ་རྒྱུ་རེད”ཅེས་ལྷ་ས་གྲོང་ཁྱེར་སྤྱི་སྤྱོད་རླངས་འཁོར་གཉེར་སྐྱོང་ཀུང་སིའི་སྤྱི་ཁྱབ་ཅིང་ལི་གཞོན་པ་རྒོད་སྐྱེས་ཀྱིས་བརྗོད།