༄༅།།《ཐར་ལོ་》ལ་སྐབས་31པའི་གློག་བརྙན་གསེར་བྱའི་གཟེངས་རྟགས་ཀྱི་ཆེས་ལེགས་པའི་
མ་གནས་འབྲིང་ཆུང་གི་གཏམ་རྒྱུད་གློག་བརྙན་གྱི་བྱ་དགའ་ཐོབ་པ།

      མི་དམངས་དྲ་བའི་འཕྲིན། ཉེ་སྔོན། སྐབས་31པའི་ཀྲུང་གོའི་གློག་བརྙན་གསེར་བྱའི་གཟེངས་རྟགས་ཀྱི་མིང་ཐོ་ཧུ་ཧེ་ཧའོ་ཐི་གྲོང་ཁྱེར་དུ་གསལ་བསྒྲགས་བྱས་ལ། བོད་རིགས་འཁྲབ་ཁྲིད་པའམ་སྐད་གཉིས་རྩོམ་པ་པོ་པདྨ་ཚེ་བརྟན་གྱིས་འཁྲབ་ཁྲིད་བྱས་པའི་གློག་བརྙན་《ཐར་ལོ་》ཞེས་པར་ཆེས་ལེགས་པའི་མ་གནས་འབྲིང་ཆུང་གི་གཏམ་རྒྱུད་གློག་བརྙན་གྱི་བྱ་དགའ་ཐོབ་པ་རེད།
       《ཐར་ལོ་》ཞེས་པ་ནི་པདྨ་ཚེ་བརྟན་གྱིས་འཁྲབ་ཁྲིད་བྱས་ལ། ཞི་བདེ་ཉི་མ་དང་གཡང་ཕྱུག་མཚོ་གཉིས་ཀྱིས་གཙོ་འཁྲབ་མི་སྣ་བྱས་པའི་སེམས་མཚོན་གློག་བརྙན་ཞིག་ཡིན་ཞིང་། 2016ལོའི་ཟླ་12ཚེས་9ཉིན་ཀྲུང་གོའི་སྐམ་ས་རུ་བསྟན་ལ། གློག་བརྙན་འདི་ནི་པདྨ་ཚེ་བརྟན་གྱི་སྒྲུང་ཐུང"ཐར་ལོ"ཞེས་པ་བཅོས་སྒྲིག་བྱས་པ་ཞིག་ཡིན་པ་དང་། ནང་དོན་ནི་ཁེར་སྡོད་ཀྱི་ཕྱུགས་རྫི་ཞིག་གྲོང་ཁྱེར་དུ་ཐོབ་ཐང་དཔང་ཡིག་བཟོ་བར་སོང་བའི་ལམ་བར་གྱི་དོན་དག་རབ་དང་རིམ་པ་ཞིག་བརྗོད་ཡོད་པ་རེད།