༄༅།།མཚོ་སྔོན་གྱིས་སྣོད་བཅུད་ཁོར་ཡུག་སྲུང་སྐྱོང་ཁྱབ་ཁོངས་ཀྱི་འགན་འཁྲི་བདའ་འདེད་ཀྱི་
དཔེ་མཚོན་གྱོད་གཞི་6བརྡ་ཁྱབ་བཏང་བ།

     མི་དམངས་དྲ་བའི་འཕྲིན། ཟླ་9ཚེས་14ཉིན། སྣོད་བཅུད་ཁོར་ཡུག་སྲུང་སྐྱོང་དང་འཛུགས་སྐྲུན་ལ་སྐུལ་འདེད་གཏིང་ཟབ་གཏོང་ཆེད། ཉེ་ཆར། མཚོ་སྔོན་ཞིང་ཆེན་སྒྲིག་ཨུད་ཀྱིས་སྣོད་བཅུད་ཁོར་ཡུག་སྲུང་སྐྱོང་ཁྱབ་ཁོངས་ཀྱི་འགན་འཁྲི་བདའ་འདེད་ཀྱི་དཔེ་མཚོན་གྱོད་གཞི་6བརྡ་ཁྱབ་བཏང་བ་རེད།
     2016ལོའི་ཟླ་12པར་ཟི་ལིང་གྲོང་ཁྱེར་ཏ་ཐུང་རྫོང་ཏུང་ཞ་གྲོང་རྡལ་ཐེན་ཅ་ཀོའུ་གྲོང་ཚོས་བྱེ་རྡོ་གང་བྱུང་དུ་སྔོག་འདོན་བྱས་ནས་རི་དང་ས་ཞིང་ཁག་གཅིག་ལ་གཏོར་སྐྱོན་བཏང་བ་རེད། བྱེ་རྡོ་ར་བའི་བཅོས་སྒྲིག་ལས་དོན་ལག་ལེན་མཐར་ཕྱིན་མ་བསྟར་བར་བརྟེན་རྫོང་རྒྱལ་ཁབ་ས་ཆ་ཅུས་ཀྱི་ཅུས་ཀྲང་གཞོན་པ་ཝང་ཧྲེང་པེའོ་དང་ཏུང་ཞ་གྲོང་རྡལ་གྱི་ཀྲེན་ཀྲང་གཞོན་པ་དབང་ཡུང་ཆོན་ལ་བསླབ་འདོམས་སྐུལ་ལྕག་གླེང་མོལ་གྱི་ཆད་པ་བཅད་པ་རེད།
     2017ལོའི་ཟླ་2པར་མཚོ་ཤར་གྲོང་ཁྱེར་གྱི་གྲོང་མི་དང་རྫོང་གིས་སོལ་གཏེར་སྔོག་འདོན་ཁེ་ལས་17དང་བྱེ་རྡོ་ར་བ་55ཡིས་ལག་ཁྱེར་མེད་པའམ་ཡང་ན་ལག་ཁྱེར་ཆ་མ་ཚང་བར་གང་བྱུང་དུ་སོལ་གཏེར་སྔོག་འདོན་བྱས་པ་སོགས་ཀྱི་གནད་དོན་ཤེས་རྟོགས་བྱུང་། འགན་འཁྲི་ལག་ལེན་མཐར་ཕྱིན་དང་ལྟ་སྐུལ་དོ་དམ་ཡག་པོ་མ་བྱས་པར་བརྟེན་རྫོང་དེའི་རྒྱལ་ཁབ་ས་ཆ་ཐོན་ཁུངས་ཅུས་དང་། ཁོར་ཡུག་སྲུང་སྐྱོང་ཅུས། ཆུ་དོན་ཅུས། དེ་སྔའི་བདེ་འཇགས་ཐོན་སྐྱེད་ལྟ་སྐུལ་དོ་དམ་ཅུས་སོགས་ཚན་པའི་འབྲེལ་ཡོད་འགན་འཁུར་བ་ཚང་མར་དེ་མཚུངས་ཀྱི་ཆད་པ་བཅད་པ་དང་ཐག་གཅོད་བྱས་པ་རེད།
    2015ལོའི་ཟླ་7པ་ནས་2016ལོའི་ཟླ་7པའི་བར། མཚོ་སྔོན་ཧའོ་ལུང་ཀུང་སིས་ཞའོ་ཀན་ཀོའུ་རུ་སྔོག་འདོན་དང་འཚོལ་ཞིབ་བྱས་ཏེ་རང་དགར་ཉེན་ཡོད་རྫས་འགྱུར་དངོས་རྫས་སྤྱད་དེ་བྲག་གསེར་གཏེར་ཁ་སྔོག་འདོན་བྱས་པས་གཏེར་ཁའི་ཐོན་ཁུངས་དང་དེ་བཞིན་མཐའ་འཁོར་གྱི་ཁོར་ཡུག་ལ་གཏོར་སྐྱོན་ཆེན་པོ་ཕོག་ཡོད། གོར་མོ་གྲོང་ཁྱེར་ཐིག་རིས་ས་གཤིས་ཆ་འཕྲིན་ཅུས་ཀྱི་ཅུས་ཀྲང་གཞོན་པ་ཧའེ་ཡན་ཧྲེང་གིས་འགན་འཁྲི་ལག་ལེན་མཐར་ཕྱིན་མ་བསྟར་བར་བརྟེན་སྲིད་འཛིན་གྱི་སྐྱོན་ཐོ་བཀོད་པའི་ཆད་པ་བཅད་པ་རེད།
     2016ལོའི་ཟླ་6པར་མཚོ་ལྷོ་བོད་རིགས་རང་སྐྱོང་ཀྲོའུ་ཡི་མཉམ་འབྲེལ་བརྟག་དཔྱད་ཚོགས་ཆུང་གིས་མཚོ་སྔོན་པོའི་མཛེས་ལྗོངས་ཁུལ་གྱི་ལྷོ་རྒྱུད་དུ་རང་དགར་གུར་བརྒྱབ་པ་དང་རང་དགར་ཡུལ་སྐོར་འགྲོ་ལམ་བཏོད་པ་སོགས་ཀྱི་སྣང་ཚུལ་ངན་པ་བཀག་སྡོམ་ཡང་ཡང་བྱས་ཀྱང་མཚམས་མི་བཞག་པར་བརྟེན་མཚོ་སྔོན་པོའི་སྣོད་བཅུད་ཁོར་ཡུག་ལ་གཏོར་སྐྱོན་ཆེན་པོ་ཕོག་ཡོད། འགན་འཁྲི་ལག་ལེན་མ་བསྟར་བས་མཚོ་ལྷོ་བོད་རིགས་རང་སྐྱོང་ཀྲོའུ་གུང་ཧོ་རྫོང་རྟ་ནག་ཆུ་ཤང་ཏང་ཨུད་ཀྱི་དེ་སྔའི་ཧྲུའུ་ཅི་ཡན་ཧའེ་མིང་དང་སྤྲེལ་ནག་ཤང་ཏང་ཨུད་ཀྱི་དེ་སྔའི་ཧྲུའུ་ཅི་རིག་འཛིན་ལ་བརྡ་ཁྱབ་བཏང་ནས་སྐྱོན་བརྗོད་བྱས་པ་དང་གུང་ཧོ་རྫོང་སྲིད་གཞུང་གི་རྫོང་དཔོན་གཞོན་པ་ཀྲོའུ་ཤན་རྩ་འཛུགས་ཀྱིས་ཐག་གཅོད་བྱས་པ་རེད།
     2017ལོའི་ཟླ་4པར། ཡུལ་ཤུལ་བོད་རིགས་རང་སྐྱོང་ཀྲོའུ་འབྲི་སྟོད་རྫོང་གི་ཚན་པ་འགའ་ཞིག་གིས་ཞིང་ཆེན་ཁོར་ཡུག་སྲུང་སྐྱོང་ལྟ་བཤེར་ཚོགས་ཆུང་གིས་རྩིས་སྤྲད་པའི་གནད་དོན་དག་ཐེར་བྱེད་པའི་ལས་དོན་ནང་། འགན་འཁྲི་ལག་ལེན་མ་བསྟར་བ་དང་ལྟ་སྐུལ་དོ་དམ་ཡག་པོ་མ་བྱས་པར་བརྟེན་ལས་མཚམས་འཇོག་ཏུ་བཅུག་པའི་ཅ་ཅི་གཏེར་ལས་ཀྱིས་སླར་ཡང་གཏེར་ཁ་ལྐོག་ཏུ་སྔོག་འདོན་བྱས་པས་ཤུགས་རྐྱེན་ངན་པ་བཟོས་ཡོད། འབྲི་སྟོད་རྫོང་ཁྲིམས་འཛིན་རུ་ཆེན་གྱི་རུ་དཔོན་རིན་ཆེན་ལ་འགན་འཁྲི་ཁུར་མཚམས་བཞག་ནས་ཞིབ་བཤེར་བྱ་རྒྱུ་དང་བསླབ་འདོམས་སྐུལ་ལྕག་གླེང་མོལ་གྱི་ཆད་པ་བཅད་པ་རེད། གཙང་གསུམ་ཆུ་འགོའི་རྒྱལ་ཁབ་སྤྱི་གླིང་འབྲི་སྟོད་དོ་དམ་ཁྲུའི་ཐོན་ཁུངས་ཁོར་ཡུག་ཁྲིམས་འཛིན་ཅུས་ཀྱི་ཅུས་ཀྲང་། རྫོང་ཁོར་ཡུག་སྲུང་སྐྱོང་དང་ཆུ་བེད་ཅུས་ཀྱི་ཅུས་ཀྲང་བསོད་རིག་ཝུན་ཚའེ་དང་རྫོང་རྒྱལ་ཁབ་ས་ཆ་ཐོན་ཁུངས་ཅུས་ཀྱི་ཅུས་ཀྲང་ཉི་མ་བཀྲ་ཤིས་ལ་བརྡ་ཁྱབ་བཏང་ནས་སྐྱོན་བརྗོད་བྱས་པ་དང་བསླབ་འདོམས་སྐུལ་ལྕག་གླེང་མོལ་གྱི་ཆད་པ་བཅད་པ་རེད།
     2017ལོའི་ཟླ་4པར། མགོ་ལོག་བོད་རིགས་རང་སྐྱོང་ཀྲོའུ་གཅིག་སྒྲིལ་རྫོང་བར་གཞི་ཤང་གིས་ཁོར་ཡུག་བཅོས་སྒྲིག་ལས་དོན་ལ་བཀོད་སྒྲིག་བྱས་མེད་པ་དང་། རྫོང་འཕེལ་སྒྱུར་དང་དཔལ་འབྱོར་ཚོང་དོན་ཅུས་ཀྱིས་བཙོག་ཆུ་གཙང་གསིང་བཟོ་གྲྭའི་ཆུ་འདྲེན་མདོང་ལམ་ལས་གྲྭའི་ཨར་སྐྲུན་བརྒྱུད་རིམ་ནང་ལྗང་མདོག་རྩི་ཤིང་ལ་གཏོར་སྐྱོན་བཏང་བ། རྫོང་ཞིང་འབྲོག་ནགས་ལས་ཚན་རྩལ་ཅུས་ཀྱིས་ཁོར་ཡུག་བཅོས་སྒྲིག་ལས་དོན་ལ་ལྟ་སྐུལ་དོ་དམ་ཡག་པོ་མ་བྱས་པས་བར་གཞི་ཤང་དང་། རྫོང་ཞིང་འབྲོག་ཅུས། རྫོང་འཕེལ་སྒྱུར་ཅུས་བཅས་ལ་བརྡ་ཁྱབ་བཏང་ནས་སྐྱོན་བརྗོད་བྱས་པ་རེད།