༄༅།།དཀའ་མོའི་བྲག་ལ་འཛེགས་པས། བདེ་མོའི་སྤང་ལ་སླེབས་སོང་།

     མི་དམངས་དྲ་བའི་འཕྲིན། གྲུབ་མཆོག་གི་སྨི་ངོས་གྲུ་100ལྷག་ཙམ་ཡོད་པའི་ཐང་ག་བཞེངས་ཁང་དུ་བོད་རུམ་བཏིང་འདུག་ལ་མེ་ཏོག་ཁོག་མ་ཁ་ཤས་བསྒྲིགས་འདུག་པས། བལྟས་པ་ཙམ་གྱིས་སྐྱིད་སྣང་ཤིན་་ཏུ་དོད། ཁོང་གིས་ང་ཚོ་ཚོམས་ཆེན་དུ་འབོད་ནས་ཇ་བླུགས་པ་དང་འབྲེལ། རང་ཉིད་ཀྱི་གཏམ་རྒྱུད་བརྗོད་བྱུང་། ལོ་28ལ་སླེབས་པའི་གྲུབ་མཆོག་ནག་ཆུའི་འབྲོག་དུད་ཅིག་ཏུ་སྐྱེས་པ་དང་ཆུང་དུས་ནས་ཐང་གར་དགའ་པོ་ཡོད་ལ། ལྷག་པར་དུ་ཐང་གའི་ངོས་ཀྱི་ཕྱག་རྒྱ་སྣ་ཚོགས་ཀྱི་སྐུ་དང་རྣམ་པར་བཀྲ་བའི་ཚོས་གཞིར་དེ་བས་དགའ་པོ་ཡོད།
     ལོ་12ལ་སླེབས་སྐབས་ཁོང་གིས་ཀརྨ་སྒར་བྲིས་ལུགས་ཀྱི་ཐང་གའི་རྒྱུན་འཛིན་པ་སངས་རྒྱས་ཕུན་ཚོགས་སློབ་དཔོན་ལ་བསྟེན་ནས་ཐང་ག་འབྲི་རྩལ་གྱི་རྨང་གཞི་སྦྱངས། ལོ་ལྔ་སོང་རྗེས་ཡང་དགེ་རྒན་བློ་བཟང་ལགས་ཀྱི་ས་ནས་འཇིམ་སྐུ་བཞེངས་སྟངས་སྦྱངས། 2009ལོར་སྨན་ཐང་ལུགས་ཀྱི་ཐང་གའི་རྒྱུན་འཛིན་པ་བསྟན་པ་རབ་བརྟན་གྱི་དྲུང་ནས་སྨན་ཐང་ལུགས་ཀྱི་ཐང་ག་འབྲི་རྩལ་སྦྱོང་འགོ་ཚུགས། 2015ལོར་སླེབས་སྐབས་གྲུབ་མཆོག་གིས་ལོ་གསུམ་གྱི་རིང་བྲིས་པའི་ཐོན་ཐང《རྡོ་རྗེ་འཆང》ཞེས་པ་ལེགས་གྲུབ་ཟིན།
     ཐང་ག་དེར་ཁྱོན་སྐུ་འདྲ་ཆེ་ཆུང་སྣ་ཚོགས་བསྡོམས་100ཙམ་ཡོད་པ་དང་སྐུ་འདྲ་དག་ཉམས་འགྱུར་མི་འདྲ་ཞིང་། ཚོན་མདོག་ཀྱང་བཀྲག་མདངས་ཆེ་བས་མིག་གི་ལོངས་སྤྱོད་ཅིག་ཏུ་གྱུར། ཁོང་གི་ཐང་ག་དེར་རྒྱལ་ཡོངས་དང་། བོད་ལྗོངས། མཚོ་སྔོན་སོགས་ཀྱི་ཐང་གའི་འགྲེམས་སྟོན་ཐོག་བྱ་དགའ་རག་པ་མ་ཟད། ཁོང་རང་ཉིད་ཀྱང་སྐད་གྲགས་ཆོད་འགོ་ཚུགས། ད་བར་ཁོང་གིས་ཐང་ག་དེ་རང་ཉིད་ཀྱི་གཅེས་ནོར་ལྟ་བུར་བརྩི་བ་དང་གཞན་གྱིས་སྒོར་ཁྲི་130སྤྲད་དེ་འཚོང་རོགས་ཞེས་བཤད་ཀྱང་བཙོངས་མེད།
     “སྐབས་དེ་དུས་སློབ་གྲྭ་ཐོན་མ་ཐག་ཡིན་སྟབས། དངུལ་དཀོན་ཙམ་ཡོད། གོང་ཚད་མཐོ་པོ་དེ་འདྲ་སྤྲོད་དུས་འཚོང་འདོད་ཆེན་པོ་བྱུང་། འོན་ཀྱང་ཉིན་གསུམ་ཏག་ཏག་བསམ་བློ་བཏང་རྗེས་འཚོང་ཕོད་མ་བྱུང”ཐང་ག་དེར་རང་ཉིད་ཀྱི་རྩལ་ཡོད་ཚད་བཏོན་ཡོད་པ་མ་ཟད། རྒན་བསྟན་པ་རབ་བརྟན་ལགས་ཀྱིས་ཐང་ག་དེ་ཡག་པོ་ཇི་འདྲ་ཡོད་ལུགས་བྲིས་ཡོད་པས་འཚོང་ག་ལ་ཕོད་ཅེས་བརྗོད་བྱུང་།
     དུས་ད་ཆ་ཡང་སློབ་གཉེར་དུས་ཀྱི་ཐང་ག་སྦྱོང་བའི་དཀའ་ངལ་འཕྲད་པའི་གནས་ཚུལ་དེ་དག་བློ་ལ་གསལ་པོར་ངེས་ནས་ཡོད། ཁོང་ཁྱིམ་གྱི་འཚོ་བ་དེ་ཙམ་ཕྱུག་པོ་མེད། ཐོག་མར་རྒན་བསྟན་པ་
རབ་བརྟན་ལགས་ཀྱི་སར་ཐང་ག་སྦྱོང་བར་འགྲོ་སྐབས་སྒོར་ཁྲི་2ལས་རུབ་ཐུབ་མེད། ལྷ་སར་ཁང་གླ་སྤྲོད་པ་དང་། ལྟོ་རིན། ཚོན་ཉོ་བ། ཐང་རས་ཉོ་བ་བཅས་ལ་དངུལ་གཏོང་དགོས་པས་སྒོར་ཁྲི་2དེ་དག་མི་རིང་བར་བེད་སྤྱོད་བཏང་ཟིན།“ཐབས་ཤེས་མི་འདུག ནང་མིར་བསྐུར་རོགས་ལབ་ན་ལབ་མི་བདེ་བས་མཐར་ཉིན་ལྟར་དགོང་མོ་མཚན་ཁྲོམ་ལ་མེ་ཏོག་བཙོངས་ནས་བསྡད་པ་ཡིན”ཞེས་བཤད་བྱུང་།
     དེ་ལྟར་གྲུབ་མཆོག་གིས་མེ་ཏོག་ཟླ་བ་བརྒྱད་བཙོངས་མོད། ཁེ་བཟང་རག་པའི་དངུལ་རྣམས་འཁྱུག་ཙམ་ནང་རྫོགས། དེ་ལྟར་སློབ་ཐོན་གྱི་མཚམས་སུ་བཅར་བས་ཚོན་ཉོ་བྱེད་ཀྱི་དངུལ་མེད་པས། མཚོ་སྔོན་དུ་བསྐྱོད་དེ་ཉིན་གླ་སྒོར་250བླངས་ཏེ་ལྡེབས་རིས་འབྲི་བའི་ལས་ཀ་མ་བྱས་ཐབས་མེད་བྱུང་། 【1】  【2】