༄༅།།འགྲུལ་བཞུད་ལམ་བར་དུ་ཁྱོད་དང་འཕྲད་པའི་བསྐལ་བ་ཐོབ་པའི་སླད་དུ།

     མི་དམངས་དྲ་བའི་འཕྲིན། ཉེ་ཆར། ཤིན་ཧྭ་གསར་འགྱུར་ཁང་གི་གསར་འགོད་པ་མཚོ་བོད་ས་མཐོའི་ཕྱོགས་བསྡུས་ཚན་རིག་རྟོག་ཞིབ་རུ་ཁག་གིས་བོད་ལྗོངས་མངའ་རིས་ས་ཁུལ་དུ“གནས་རི་བླ་མཚོའི”ཁུལ་དུ་གནས་པའི་སྲོག་ཆགས་ལ་ཐེངས་གཉིས་པ་ལྟ་བར་སྐྱོད་སྐབས་ལམ་བར་དུ་མཛེས་སྡུག་ལྡན་པའི་རྣམ་པ་འདི་ལྟ་བུ་མཐོང་རྒྱུ་ཡོད་ཅིང་། 
     གཙོད། འཛམ་གླིང་ཐོག་ཨ་མ་ལས་ལྷག་པ་མེད།
     ལོ་རེའི་ཟླ་5པ་དང་6པའི་བར། གཙོད་མོ་ཁྱུ་བསྒྲིགས་ནས་དགུན་དུས་ཀྱི་སྦྱོར་སྡེབ་བྱ་ཡུལ་ནས་དུས་རབས་མང་པོ་རྒྱུན་འཛིན་བྱས་པའི་བར་ཐག་སྤྱི་ལེ་བརྒྱ་ཕྲག་ཁ་ཤས་ཀྱི་གཙོད་ཕྲུག་སྐྱེ་སར་གནས་སྤོ་གི་ཡོད།
     གཙོད་ཕྲུག་སྐྱེས་ནས་ཉིན་གསུམ་ཙམ་རིང་གཙོད་ཨ་མ་གཟུགས་པོ་ཧ་ཅང་སྐྱོ་བས་སྤྱང་ཀིའི་འཇབ་རྒོལ་ཕོག་ཉེན་ཆེ། གཙོད་ཕྲུག་སྲུང་སྐྱོབ་བྱ་ཆེད། གཙོད་མོས་རྟག་ཏུ་སྤྱང་ཀི་ཁ་ཕྱོགས་གཞན་ལ་འཁྲིད་ཀྱི་ཡོད། དེར་བརྟེན་གཙོད་མོ་མང་པོ་ཞིག་རང་སྲོག་ཤོར་གྱི་ཡོད།
    སྐྱེས་ནས་ཉིན་གསུམ་སོང་རྗེས་གཙོད་ཕྲུག་གིས་རྒྱུག་ཤར་གློད་ཐུབ་པས་ཁོང་ཚོས་ཨ་མ་དང་མཉམ་དུ་རྒྱང་ཐག་རིང་བའི་འཚོ་སྡོད་བྱ་ཡུལ་དུ་ལོག་གི་ཡོད། ལམ་བར་དུ་གངས་ཆར་གྱི་ཉམས་སད་ཐེབས་པ་དང་། སྤྱང་ཁྱུའི་འཇབ་རྒོལ་ཕོག་པ། གཙང་ཆུའི་འགོག་རྐྱེན་འཕྲད་པ་སོགས་ཀྱི་རྐྱེན་པས་སྤྱིར་ན་གཙོད་ཕྲུག་གསོན་ཚད་བཅུ་ཆ་གསུམ་ཡས་མས་ལས་ཟིན་གྱི་མེད། དུས་ཡུན་རིང་ལ་དཀའ་ཚེགས་ཆེ་བའི་འགྲུལ་བཞུད་བྱེད་རིང་གཙོད་ཨ་མའི་བྱམས་སེམས་ཀྱིས་མགོ་ནས་མཇུག་བར་གཙོད་ཕྲུག་སྲུང་བར་བྱེད་ཀྱི་ཡོད།
     ཁྲུང་ཁྲུང་མཇིང་ནག ཕྲུ་གུ་སྐྱོང་བར་མཁས་པ།
     ཁྲུང་ཁྲུང་མཇིང་ནག་གཏན་གྲོགས་གཉིས་པོས་ཕ་རོལ་པོར་ལྷག་བསམ་རྣམ་དག་བྱེད་ལ་བྱ་ཕྲུག་ལ་བྱམས་བརྩེ་ཆེ། སྒོ་ང་བཏང་རྗེས་རོགས་ཟླ་གཉིས་པོས་མཉམ་དུ་ཚེ་སྲོག་གསར་པ་སྦྲུམ་གྱི་ཡོད། ཉིན་30ནས་33བར་སོང་རྗེས་བྱ་ཕྲུག་སྒོ་ང་ལས་ཐོན་ཞིང་། བྱ་ཕྲུག་རྣམས་ཀྱིས་སྒོ་ང་ནས་ཐོན་པའི་ཉིན་དེ་རང་ནས་ཆུ་རྐྱལ་རྒྱག་ཤེས་པ་དང་། དེ་རྗེས་ཕ་མའི་སྲུང་སྐྱོང་འོག་གོམ་པ་སྤོ་སྟངས་སྦྱངས་ནས་ཟླ་3སོང་རྗེས་གཤོག་ཟུང་བརྐྱངས་ནས་གནམ་འཕང་གཅོད་ཐུབ།
     འབྲལ་མི་ཕོད་པ་ཇི་ཙམ་ཡོད་ཀྱང་། སྒོ་ང་རྗེས་མ་དེ་མ་བཏང་གོང་ཁྲུང་ཁྲུང་མཇིང་ནག་གིས་ནར་སོན་པའི་བྱ་ཕྲུག་ས་ཆ་གཞན་དུ་འབུད་ཀྱི་ཡོད། ལག་ཟུང་གློད་ནས་བུ་ཕྲུག་འཚར་ལོངས་བྱེད་དུ་འཇུག་པ་དེའང་བྱམས་བརྩེ་ལྷད་མེད་ཅིག་ཅི་ལ་མིན། 【1】  【2】  【3】  【4】  【5】