འཚོལ་བཤེར།   
藏文频道
2017ལོའི་ཟླ་8ཚེས་14ཉིན།
  • མི་དམངས་དྲ་བ།

    ༄༅།།སི་ཁྲོན་སེལ་ཤུལ་རྫོང་ནས་མིང་རྒྱལ་རབས་སྐབས་ཀྱི་ལྡེབས་རིས་དང་སྐུ་བརྙན་རྙེད་པ།

    གསར་འགྱུར་སྤེལ་དུས།  【2017ལོའི་ཟླ་ 08ཚེས་14ཉིན། 10:04】   (རྩོམ་སྒྲིག་འགན་འཁུར་པ། སྙིང་ལྕགས།)

     
            མི་དམངས་དྲ་བའི་འཕྲིན། གནའ་བོའི་ཕོ་བྲང་རྟེན་རྫས་བཤམས་མཛོད་ཁང་བོད་བརྒྱུད་ནང་བསྟན་རིག་དངོས་ཞིབ་འཇུག་སུའོ་ཡི་སུའོ་ཀྲང་ཞིབ་འཇུག་པ་ལུའོ་ཝུན་ཧྭས་སྣེ་ཁྲིད་པའི་ཚོགས་པས། ཉིན་ཤས་གོང་སི་ཁྲོན་ཞིང་ཆེན་དཀར་མཛེས་ཀྲོའུ་སེར་ཤུལ་རྫོང་བཙན་མདའ་ཤང་འབའ་ཟླ་གྲོང་ཚོའི་འབའ་ཟླ་དགོན་པའི་སྒོ་ཡུན་རིང་བསྡམས་པའི་མགོན་ཁང་ཞིག་ནས་མིང་རྒྱལ་རབས་སྐབས་ཀྱི་ཤིན་ཏུ་ཆ་ཚང་བའི་ལྡེབས་རིས་དང་སྐུ་བརྙན་རྙེད་ཅིང་། དེ་ནི་སེལ་ཤུལ་རྫོང་ནས་མིང་རྒྱལ་རབས་སྐབས་ཀྱི་བོད་བརྒྱུད་ནང་བསྟན་གྱི་མཆོད་ཁང་རྙེད་ཐེངས་དང་པོ་རེད།
          སྤྱི་ལོ་1269ལོར་བཞེངས་པའི་འབའ་ཟླ་དགོན་ནི་དང་ཐོག་ས་སྐྱའི་ལུགས་ཡིན་ཞིང་། སྤྱི་ལོ་1440ལོར་དགེ་ལུགས་པར་བསྒྱུར་པ་རེད། རིགས་གཅིག་མཁས་ཅན་གྱིས། དེ་ནས་རྙེད་པའི་ལྡེབས་རིས་ལ་དགེ་ལུགས་པའི་ལྡེབས་རིས་ཀྱི་ནང་དོན་མངོན་གསལ་དོད་པོ་ཡོད་ཅིང་། སྒྱུ་རྩལ་གྱི་ཁྱད་ཆོས་དང་ཟུང་འབྲེལ་བྱས་ན་ལྡེབས་རིས་དེ་ནི་དུས་རབས་བཅུ་དྲུག་པའི་སྔ་རྗེས་སུ་བཞེངས་པ་གཏན་འཁེལ་བྱེད་ཐུབ་ཅེས་བརྗོད།
          ལུའོ་ཝུན་ཧྭས། ད་རེས་རྙེད་པའི་ལྡེབས་རིས་དང་སྐུ་བརྙན་གྱིས་བོད་བརྒྱུད་ནང་བསྟན་ལ་ཞིབ་འཇུག་བྱེད་པའི་ཐད་སྟོང་ཆ་མང་པོ་ཞིག་བསྐངས་ཡོད། དེ་སྔོན་དཀར་མཛེས་ཀྲོའུ་ནས་རྙེད་པའི་མིང་རྒྱལ་རབས་སྐབས་ཀྱི་བོད་བརྒྱུད་ནང་བསྟན་གྱི་རི་མོ་དོན་ས་ནི་དགོན་སྡེ་མ་ཡིན་པར་མཁར་རྫོང་འབའ་ཞིག་ཡིན་པས་ལོ་རྒྱུས་ཀྱི་རྒྱབ་ལྗོངས་དང་ཆོས་ལུགས་ཀྱི་ཕན་ནུས་གསལ་པོ་མེད། འབའ་ཟླ་དགོན་པའི་མགོན་ཁང་ནི་དགོན་པ་དེའི་ཆ་ཤས་ཤིག་ཡིན་ལ། དེའི་ཆོས་ལུགས་ཀྱི་དོན་སྙིང་དང་ལོ་རྒྱུས་ཀྱི་རྒྱབ་ལྗོངས་ལ་ཁྱད་པར་ཧ་ཅང་ཆེ་བས་ཞིབ་འཇུག་གི་རིན་ཐང་ཤིན་ཏུ་ཆེ་ཞེས་ངོ་སྤྲོད་བྱས་བྱུང་།
          ཤེས་རྟོགས་བྱུང་བར་གཞིགས་ན། བོད་བརྒྱུད་ནང་བསྟན་གྱི་དགོན་པའི་ནང་དུ་མིང་རྒྱལ་རབས་སྐབས་ཀྱི་ལྡེབས་རིས་དང་སྐུ་བརྙན་གཉིས་ཀ་སྲུང་སྐྱོང་ཡག་པོ་ཐུབ་མཁན་ཧ་ཅང་དཀོན་པ་དང་། ལྷག་པར་དུ་སྐུ་བརྙན་ཆེ་གྲས་མང་ཆེ་བ་སོ་མ་བཏང་བའི་འཇིམ་བརྙན་སྐྱ་བོའི་རིགས་ཡིན་པས་ཆག་སྐྱོན་ཡོང་ཧ་ཅང་སླ། ཡིན་ན་ཡང་འབའ་ཟླ་དགོན་པའི་མགོན་ཁང་གི་ལྡེབས་རིས་དང་སྐུ་བརྙན་ཉར་ཚགས་ཡག་པོ་ཐུབ་ནས་ཆ་ཚང་པོ་ཡོད་པ་རེད།
          རྒྱ་ཁྱོན་སྨི་ངོས་གྲུ་31ཙམ་ཟིན་ཅིང་ཚོན་མདངས་གསལ་ལ་རང་ཡུལ་གྱི་ཁྱད་ཆོས་ལྡན་པའི་ལྡེབས་རིས་ཀྱིས་བོད་ཤར་རྒྱུད་ཀྱི་སྒྱུ་རྩལ་འགྱུར་ལྡོག་དུས་སྐབས་ཀྱི་ཁྱད་ཆོས་མཚོན་ཡོད་པས་དེ་ནི་མིག་སྔར་བོད་ཤར་རྒྱུད་ཀྱི་དུས་འགོའི་སྒྱུ་རྩལ་ཁྱད་ཆོས་ལ་ཞིབ་འཇུག་བྱེད་པའི་བརྩམས་ཆོས་གལ་ཆེན་ཞིག་རེད།
           མགོན་ཁང་དུ་ནོར་བདག་ཛམ་བྷ་ལ་དང་། མགོན་པོ་ཞལ་བཞི། མགོན་པོ་ཕྱག་དྲུག དཔལ་རྡོ་རྗེ་འཇིགས་བྱེད། དཔལ་ལྡན་ལྷ་མོ་བཅས་ཉར་ཚགས་ཡག་པོ་ཐུབ་པའི་སྐུ་བརྙན་ལྔ་ཡོད་པ་ལས། རྡོ་རྗེ་འཇིགས་བྱེད་དང་དཔལ་ལྡན་ལྷ་མོ་གཉིས་ཀྱི་སྐུ་བརྙན་ནི་མི་ཚད་དང་ཧ་ལམ་མཉམ་པ་དང་། དེ་དག་ནི་དུས་རབས་བཅུ་དྲུག་པའི་སྐབས་ཀྱི་མཐོང་དཀོན་པའི་བོད་བརྒྱུད་ནང་བསྟན་གྱི་བརྩམས་ཆོས་རྩེ་གྲ་རེད།
      

    ཕྱོགས་བསྡུས་གསར་འགྱུར།