༄༅།།མཚོ་སྔོན་ཞིང་ཆེན་གྱི་གྲངས་ཉུང་མི་རིགས་ལུས་རྩལ་འགྲན་ཚོགས་སྐབས་དྲུག་པ་ཟླ་8ཚེས་
14ཉིན་ནས་ཚེས་19ཉིན་བར་ཆབ་ཆ་རྫོང་དུ་སྤེལ་རྒྱུ་ཡིན་པ།

      མི་དམངས་དྲ་བའི་འཕྲིན། ཉེ་སྔོན། གསར་འགོད་པས་མཚོ་སྔོན་ཞིང་ཆེན་སྲིད་གཞུང་གི་གསར་འགྱུར་གཞུང་ལས་ཁང་གིས་སྤེལ་བའི་གསར་འགྱུར་ཁྱབ་བསྒྲགས་ཚོགས་འདུ་ནས་ཤེས་རྟོགས་བྱུང་གསལ་དུ། ཞིང་ཆེན་ཡོངས་ཀྱི་གྲངས་ཉུང་མི་རིགས་ཀྱི་ལུས་རྩལ་འགྲན་ཚོགས་སྐབས་དྲུག་པ་ཟླ་8ཚེས་14ཉིན་ནས་ཚེས་19ཉིན་བར་མཚོ་ལྷོ་བོད་རིགས་རང་སྐྱོང་ཁུལ་གྱི་ཆབ་ཆ་རྫོང་དུ་སྤེལ་རྒྱུ་ཡིན་ལ། ཚོགས་རྟགས་དང་བཀྲ་ཤིས་གཡང་ནོར། ཚོགས་གླུ་བཅས་དུས་མཚུངས་སུ་བསྟན་པ་རེད།
       ལོ་བཞི་རེར་ཐེངས་རེ་སྤེལ་བའི་ཞིང་ཆེན་ཡོངས་ཀྱི་གྲངས་ཉུང་མི་རིགས་ཀྱི་ལུས་རྩལ་འགྲན་ཚོགས་ནི་མཚོ་སྔོན་ཞིང་ཆེན་གྱི་ཕྱོགས་བསྡུར་རང་བཞིན་གྱི་གྲངས་ཉུང་མི་རིགས་ཀྱི་ལུས་རྩལ་བྱེད་སྒོ་རིམ་པ་མཐོ་ཤོས་དང་རྒྱ་ཁྱོན་ཆེ་ཤོས་ཤིག་ཡིན་ལ། དེ་ནི་མི་རིགས་ཀྱི་སྲོལ་རྒྱུན་རིག་གནས་རྒྱུན་འཛིན་དར་སྤེལ་བྱས་ཏེ་གྲངས་ཉུང་མི་རིགས་དང་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་སྟོན་པའི་བྱེད་སྒོ་གལ་ཆེན་ཞིག་ཡིན་པ་དང་། དེ་ནི་ཆབ་སྲིད་འགན་གལ་ཆེན་མཚོན་པའི་དམིགས་བསལ་ལུས་རྩལ་འགྲན་བསྡུར་ཞིག་ཡོད་པས། སྤྱི་ཚོགས་ཀྱི་ལས་རིགས་ཁག་གིས་དོ་སྣང་ཆེན་པོ་བྱེད་པ་རེད།
      ཤེས་རྟོགས་བྱུང་གསལ་དུ། ཐེངས་འདིའི་གྲངས་ཉུང་མི་རིགས་ཀྱི་ལུས་རྩལ་འགྲན་ཚོགས་ཀྱིས"མཐུན་སྒྲིལ་དང་། ཞི་མཐུན། འབད་བརྩོན། དཔའ་སྐྱེད"ཅེས་པ་བརྗོད་དོན་དུ་བྱས་ཡོད་ལ། ཞིང་ཆེན་མི་རིགས་ཆོས་ལུགས་ཨུ་ལྷན་དང་། ཞིང་ཆེན་ལུས་རྩལ་ཅུད་གཉིས་ཀྱིས་མཉམ་འབྲེལ་ཐོག་གཙོ་གཉེར་དང་། མཚོ་ལྷོ་ཁུལ་མི་དམངས་སྲིད་གཞུང་གིས་འགན་སྒྲུབ་བླངས་ཡོད། སྐབས་ཐོག་ཏུ་ཟི་ལིང་གྲོང་ཁྱེར་དང་། མཚོ་ཤར་གྲོང་ཁྱེར། རང་སྐྱོང་ཁུལ་དྲུག རང་སྐྱོང་རྫོང་བདུན། དྲག་ཆས་ཉེན་རྟོག་མཚོ་སྔོན་སྤྱི་ཁྱབ་རུ་ཁག མཚོ་སྔོན་སློབ་ཆེན། མཚོ་སྔོན་མི་རིགས་སློབ་ཆེན། མཚོ་སྔོན་དགེ་འོས་སློབ་ཆེན་བཅས་ཁྱོན་བསྡོམས་འཐུས་ཚབ་ཚོགས་པ་19འགྲན་ཚོགས་སུ་ཞུགས་ཡོད་ལ། མིང་ཐོ་བཀོད་པའི་གནས་ཚུལ་ལ་གཞིགས་ན། ཐེངས་འདིའི་གྲངས་ཉུང་མི་རིགས་ཀྱི་ལུས་རྩལ་འགྲན་ཚོགས་སུ་ཁྱོན་བསྡོམས་མི་གྲངས་1500ཞུགས་ཡོད་པས། ཐེངས་སྔོན་མ་ལས་མི་300ལྷག་ཙམ་མང་དུ་ཕྱིན་ཡོད་པ་རེད། འགྲན་ཚན་བཀོད་སྒྲིག་ལ། གཟེབ་གྲུག་དང་། རྐང་རྩེད་སྤོ་ལོ། དྲག་རྩལ། གླང་ཆེན་ས་བཤགས། ཐག་འཐེན། ས་སྒྱེ་འདེགས་པ། གྲངས་ཉུང་མི་རིགས་ཀྱི་མདའ་འཕེན་པ། གྲངས་ཉུང་མི་རིགས་ཀྱི་སྦེ་ག རྟ་རྩལ། གཡག་རྒྱུག་བཅས་འགྲན་ཚན་རྣམ་གྲངས་བཅུ་དང་གྲངས་ཉུང་མི་རིགས་ཀྱི་ལུས་རྩལ་འཁྲབ་སྟོན་འགྲན་ཚན་གཅིག་བཅས་ཡོད་པ་རེད། ད་ཐེངས་ཀྱི་འགྲན་ཚོགས་འདི་སྔོན་ཆད་ཀྱི་འགྲན་ཚོགས་དང་བསྡུར་ན་མི་འདྲ་བ་ཞིག་ཡོད་པ་ནི། འགྲན་ཚན་དུ་སྐྱེས་པའི་རྐང་རྩེད་སྤོ་ལོ་དང་བུད་མེད་ཀྱི་མདའ་འཕེན་འགྲན་བསྡུར་གཉིས་ཐོག་མར་གསར་དུ་བསྣན་ཡོད་པ་མ་ཟད། མི་རིགས་མདའ་འཕེན་འགྲན་ཚན་དེ་སྔོན་ཆད་ཀྱི་གཅིག་ནས་གསུམ་དུ་སྤར་ཡོད་པས། འདི་ནི་སྐབས་འདིའི་འགྲན་ཚོགས་ཀྱི་ཁྱད་ཆོས་ཤིག་དང་བཀྲག་མདངས་འཚེར་ས་ཞིག་ཀྱང་རེད།
      གསལ་པོར་བསྟན་པའི་ཚོགས་རྟགས་ནི་རླུང་གཡོའི་ཁ་བཏགས་དང་། གར་གཟུགས་ཀྱི་ཚོན་རས། མུ་བྲལ་མཐོ་སྒང་། སྔོ་བསངས་ཀྱི་མཚོ་སྔོན་པོ། མཆོང་སྐྱོད་ཀྱི་ལུས་རྩལ་པ་བཅས་རྒྱུ་ཆར་བྱས་ཏེ་མཚོ་སྔོན་དང་མཚོ་ལྷོའི་རྒྱ་ཡིག་གི"མཚོ"ཞེས་པ་དང་། ཆབ་ཆ་རྫོང་གི་རྒྱ་ཡིག་གི་སྒྲ་སྦྱོར་ཡི་གེ་ཐོག་མ"G"ཡོད་པ་མ་ཟད། གྲངས་ཉུང་མི་རིགས་ཀྱི་ལུས་རྩལ་འགྲན་ཚོགས་སྐབས་དྲུག་པའི་གྲངས་ཀ"6"བཅས་ཇུས་འགོད་གཞིར་བྱས་ནས་བོད་ཀྱི་སྲོལ་རྒྱུན་རྒྱན་གོས་བསྣབས་ལ་དཔའ་སྐྱེད་འབད་བརྩོན་དང་ཞུམ་མེད་ཡར་ཐོན་གྱི་ལུས་རྩལ་བུ་རྒོད་ཅིག་གི་སྣང་བརྙན་བསྐྲུན་ཡོད་པ་རེད། ཚོགས་གླུ་ནི་ཆབ་འགག་རྡོ་རྗེ་ཚེ་རིང་གིས་གླུ་ཚིག་བྲིས་པ་དང་། ཉི་མ་ཚེ་རིང་གིས་དབྱངས་བརྩམས་པའི་《སྐུ་ཉིད་མཚོ་ལྷོ་རུ་ཕེབས་པར་དགའ་བསུ་ཞུ་》ཞེས་པ་ཡིན་པ་རེད། བཀྲ་ཤིས་གཡང་ནོར"སྐྱིད་སྐྱིད"ནི་མཚོ་ལྷོ་ཁུལ་གྱི"མཚོ་སྐོར་གཡང་ཟོག"ཞེས་པ་མ་དབྱིབས་སུ་བཏང་ནས་ཏང་གི་ཚོགས་ཆེན་བཅུ་དགུ་པར་སྔུན་བསུའི"དགའ་སྐྱིད་འཁོལ་བ"དང"དགའ་སྐྱིད་མཉམ་འཛོམས"ཀྱི་ནང་དོན་མཚོན་ཡོད་པ་རེད། "སྐྱིད་སྐྱིད"ཀྱི་ལུས་ཧྲིལ་པོར"མཚོ་སྔོན་གྱི་ལྗང་མདོག"མངོན་ཡོད་ལ། ལུས་སུ་བོད་ཀྱི་སྔོ་མདོག་གཟབ་མཆོར་ལེགས་པར་སྤྲས་ཡོད་པ་དང་། ཞབས་སོར་ནི་མཚོ་སྔོན་པོའི་སྤྲིན་བཟང་ཟེགས་མར་སྤེལ་ཡོད་པ་དེ་ལས"མཛེས་པའི་མཚོ་སྔོན་པོ། སྐྱིད་པའི་མཚོ་ལྷོ་ཁུལ"ཞེས་པ་མཚོན་ཡོད་པ་རེད།