༄༅།།བོད་ལྗོངས་མཁའ་འགྲུལ་ཁྲེན་ཏུའུ་ནས་ཀ་ཏ་མན་རྡུ་རུ་འཕུར་བའི་ཚོད་ལྟ་
ལེགས་འགྲུབ་བྱུང་བ།

     མི་དམངས་དྲ་བའི་འཕྲིན། ཟླ་6ཚེས་19ཉིན་གྱི་ཆུ་ཚོད་19:40ཐོག དར་ཚོན་སྣ་ལྔའི་དར་ལྕོག་བཏགས་ཡོད་པའི་མཁའ་འགྲུལ་A319ལྷིང་འཇགས་ངང་ཀ་ཏ་མན་རྡུའི་ཐེ་ལི་པུའུ་ཝང་རྒྱལ་སྤྱིའི་གནམ་གྲུ་ཐང་དུ་བབས་པ་རེད། འདིས་བོད་ལྗོངས་མཁའ་འགྲུལ་ཁྲེན་ཏུའུ་ནས་ཀ་ཏ་མན་རྡུ་རུ་ཕྱིར་འཕུར་བའི་ཚོད་ལྟ་བདེ་བླགས་ངང་ལེགས་འགྲུབ་བྱུང་བ་མཚོན་པ་རེད། ཐེངས་འདིའི་ཚོད་ལྟའི་དམིགས་ཡུལ་གཙོ་བོ་ནི་བོད་ལྗོངས་མཁའ་འགྲུལ་དེ་མཁའ་ལམ་འདི་ནས་བདེ་འཇགས་ངང་འཕུར་བསྐྱོད་ཐུབ་པ་དང་འབྲེལ་ཡོད་ལས་ཁུངས་ཀྱི་འགན་སྲུང་ནུས་པར་ར་སྤྲོད་པའི་ཆེད་དུ་ཡིན་པ་རེད།
     ངོ་སྤྲོད་བྱས་པར་གཞིགས་ན། ཁྲེན་ཏུའུ་ནས་ཀ་ཏ་མན་རྡུ་བར་གྱི་མཁའ་ལམ་ནི་སྔོན་དུ་ཚོད་ལྟའི་ངང་འཕུར་རྒྱུའི་རེ་བ་ཞུས་ཡོད་པ་དང་། ཀྲུང་གོ་དང་བལ་ཡུལ་རྒྱལ་ཁབ་གཉིས་ཀྱིས་དམངས་སྤྱོད་མཁའ་འགྲུལ་དོ་དམ་གཙོ་བོའི་སྡེ་ཁག་གིས་ཐེངས་མང་སྙོམས་སྒྲིག་བྱས་པ་བརྒྱུད། རྒྱལ་ཁབ་གཉིས་ཀྱི་དམངས་སྤྱོད་མཁའ་འགྲུལ་སྡེ་ཁག་ནས་ཆོག་མཆན་ཐོབ་པ་དང་། བདེ་བླག་ངང་འཕུར་བའི་ཚོད་ལྟ་ལེགས་འགྲུབ་བྱུང་བ་རེད། གོང་གི་པར་རིས་ནི་དར་ཚོན་སྣ་ལྔའི་དར་ལྕོག་བཏགས་པའི་མཁའ་འགྲུལ་A319ལྷིང་འཇགས་ངང་ཀ་ཏ་མན་རྡུའི་ཐེ་ལི་པུའུ་ཝང་རྒྱལ་སྤྱིའི་གནམ་གྲུ་ཐང་དུ་བབས་པ།