འཚོལ་བཤེར།   
藏文频道
2015ལོའི་ཟླ་5ཚེས་12ཉིན།
  • མི་དམངས་དྲ་བ།

    ༄༅།།ཀོང་ཀྲོའུ་རྒྱལ་མཚམས་འགག་སྒོ་ནས་ཕྱིར་གཏོང་ཐང་ཀ་28ལ་སྔོག་བཤེར་བྱས་པ།

    གསར་འགྱུར་སྤེལ་དུས།  【2015ལོའི་ཟླ་ 05ཚེས་12ཉིན། 09:09】   (རྩོམ་སྒྲིག་འགན་འཁུར་པ། སྙིང་ལྕགས།)

     
    ༄༅།།ཀོང་ཀྲོའུ་རྒྱལ་མཚམས་འགག་སྒོ་ནས་ཕྱིར་གཏོང་ཐང་ཀ་28ལ་སྔོག་བཤེར་བྱས་པ།
         མི་དམངས་དྲ་བའི་འཕྲིན། ཟླ་5ཚེས་7ཉིན་ཀྲུང་དབྱང་གསར་འགྱུར་དྲ་བའི་ཀོང་ཀྲོའུ་རྒྱལ་མཚམས་འགག་སྒོ་ནས་ཐོན་པའི་གསར་འགྱུར་ལྟར་ན། ཀོང་ཀྲོའུ་རྒྱལ་མཚམས་འགག་སྒོའི་ཐེ་གཏོགས་ཧྥོ་ཧྲན་དོན་གཅོད་ཁང་གིས་ཕྱིར་གཏོང་ཚོང་སྒྲོམ་ལས་རྒྱལ་ཁབ་ཀྱིས་ཕྱིར་གཏོང་བྱས་མི་ཆོག་པའི་ཐང་ཀ་སོགས་རིག་དངོས་28ལ་སྔོག་བཤེར་བྱས།
         ཡུལ་དངོས་ཀྱི་རྒྱལ་འགག་ཞིབ་བཤེར་པས་ངོ་སྤྲོད་བྱས་པ་ལྟར་ན། རྒྱལ་མཚམས་འགག་སྒོའི་ལས་བྱེད་པས“འཐེན་སྒྲོག”ཅེས་པའི་མིང་བྱང་བཀོད་ཡོད་པའི་ཚོང་སྒྲོམ་དུ་གྲ་དག་པོར་སྒྲིག་མེད་པའི་དངོས་རྫས་ཀྱིས་ཁེངས་ཡོད་ལ། འཐེན་སྒྲོག་བཅུག་ཡོད་པའི་ཤོག་སྒམ་འགའ་ལས་གཞན་ད་དུང་ཤིང་སྒམ་ཆེན་པོ་འགའ་ཡོད་པ་དེ་དག་ནི་ལས་བྱེད་པས་དོགས་པའི་གནས་སུ་གྱུར།
         ཤིང་སྒམ་གྱི་ཁ་ཕྱེ་སྟེ་བལྟ་དུས་ནང་དུ་སྣོད་དང་འབག་སྐུ་བརྐོས་བརྙན་ཆུང་ངུ་སོགས་ལག་ཤེས་ཐོན་རྫས་འབོར་ཆེན་བཞག་ཡོད་པར་མ་ཟད། དེ་ལས་ཤིང་སྒམ་ཞིག་གི་ནང་དུ་ལྷ་སྐུ་བཞེངས་ཡོད་པའི་མི་རབས་འགའ་བརྒྱུད་པའི་ཐང་ཀ་སྤུས་ལེགས་བཅུ་ཕྲག་འགའ་བཅུག་ཡོད། ཐང་ཀ་ཁ་ཤས་ནི་ཅུང་ཟད་རྙིང་ལ་ཁ་དོག་ཉམས་ཡོད་མོད། རི་མོའི་ཚོན་མདངས་ནི་རྣམ་པར་བཀྲ་ལ། སྐུའི་བཟོ་བཀོད་མཛེས་ལ་ཐིག་རིས་ཞིབ་ཅིང་ལེགས།
         ཐང་ཀ་ནི་བོད་ཀྱི་རིག་གནས་ལས་ཐུན་མོང་མ་ཡིན་པའི་རི་མོའི་སྒྱུ་རྩལ་གྱི་རྣམ་པ་ཞིག་ཡིན་ལ། དེ་ནི་རྒྱུན་པར་ཆོས་ལུགས་བརྗོད་བྱར་བྱས་ཏེ་གསེར་དང་དངུལ། རང་བྱུང་གཏེར་རྫས། རིན་ཐང་ཅན་གྱི་སྐྱེ་དངོས་སོགས་ཚོན་དུ་བྱས་ཏེ་བྲིས་པ་ཞིག་ཡིན། ལོ་ཟླ་ག་ཚོད་འགོར་ཡང་དེའི་ཁ་དོག་མཛེས་ཤིང་བལྟ་ན་སྡུག་ལ། དེ་ནི་ཀྲུང་ཧྭ་མི་རིགས་ཀྱི་དམངས་ཁྲོད་སྒྱུ་རྩལ་ཁྲོད་ཀྱི་རིན་ཐང་ཅན་གྱི་གཟུགས་འདས་ཤུལ་བཞག་རིག་གནས་སུ་གྱུར་ཡོད།
         རྒྱལ་མཚམས་འགག་སྒོའི་འབྲེལ་ཡོད་སྡེ་ཁག་གིས་ངོ་སྤྲོད་ལྟར་ན། <<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རིག་དངོས་སྲུང་སྐྱོབ་ཀྱི་ཁྲིམས་>>ལས་ལེའུ་དྲུག་པའི་དོན་ཚན་དྲུག་ཅུ་བར་བཀོད་པ་ལྟར་ན། མི་རབས་འགར་བརྒྱུད་པའི་ཐང་ཀ་ནི་རྒྱལ་ཁབ་ཀྱིས་གཏན་ལ་ཕབ་ཡོད་པའི་ཕྱིར་འདྲེན་བྱས་མི་ཆོག་པའི་རིག་དངོས་ཀྱི་ཁོངས་གཏོགས་ཡིན། ༼ ཀྲུང་གོའི་བོད་ལྗོངས་དྲ་བ་ལས་དྲངས། ༽
      

    ཕྱོགས་བསྡུས་གསར་འགྱུར།