༄༅།།བོད་རིགས་བུ་མོ་ཆོས་སྐྱིད་སྒྲོལ་མས་ཡ་གླིང་གི་མཆོང་རྒྱུག་འགྲན་བསྡུར་ཁྲོད་ཨང་གཉིས་པ་བླངས་པ།

     མི་དམངས་དྲ་བའི་འཕྲིན། ཟླ་5ཚེས་9ཉིན་གསར་འགོད་པས་མཚོ་སྔོན་ཞིང་ཆེན་ལུས་རྩལ་ཅུས་ནས་རྒྱུས་ལོན་བྱུང་བ་ལྟར་ན། ས་གནས་དེ་གའི་ཆུ་ཚོད་ཟླ་5ཚེས་9ཉིན་གྱི་སྔ་དྲོར་སྐབས་དང་པོའི་ཡ་གླིང་གི་ན་གཞོན་མཆོང་རྒྱུག་འགྲན་བསྡུར་ཁཱ་ཐར་རྒྱལ་ཁབ་ཏུ་འཚོགས་ཤིང་། མཚོ་སྔོན་གྱི་ཞིངཆེན་ལུས་རྩལ་སློབ་གྲྭའི་སློབ་མ་ཆོས་སྐྱིད་སྒྲོལ་མས་སྨི་5000ཅན་གྱི་མཆོང་རྒྱུག་འགྲན་བསྡུར་ཁྲོད་སྐར་གྲངས་24'05"ཡི་ཐོག་ནས་ཨང་གཉིས་པ་བླངས་པ་རེད།
     ཆོས་སྐྱིད་སྒྲོལ་མ་ནི་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་རྟ་བོར་གྲོང་རྡལ་གྱི་བོད་རིགས་བུ་མོ་ཞིག་ཡིན་ཞིང་། 2012ལོའི་ཟླ་9བར་མཚོ་སྔོན་ཞིང་ཆེན་ལུས་རྩལ་སློབ་གྲྭའི་འདུར་རྒྱུག་རུ་ཁག་ཏུ་ཞུགས། ལོ་17ལ་སོན་པའི་ཁོ་མོས་ཐེངས་གང་མང་ལ་འགྲན་བསྡུར་སྣ་ཚོགས་སུ་ཞུགས་ཏེ་གྲུབ་འབྲས་ལེགས་པོ་བླངས་པས་འདུར་རྒྱུག་ཁྱབ་ཁོངས་སུ་ཚང་མའི་མིག་དཔེར་གྱུར་ཡོད། འདྲ་པར་ཁྲོད་ཀྱི་ཨང་གྲངས་149པ་ནི་ཆོས་སྐྱིད་སྒྲོལ་མ་ཡིན། ༼ མཚོ་སྔོན་པོ་ལས་དྲངས། ༽