༄༅།།དཀར་མཛེས་ཁུལ་མི་དམངས་སྨན་ཁང་གིས་སྡེ་རོང་རྫོང་གི་སྐྱ་འགྲིབ་ཕོག་པའི་
ནད་པར་བསྐྱར་མཐོང་གཤག་བཅོས་བྱས་པ།

     མི་དམངས་དྲ་བའི་འཕྲིན། སི་ཁྲོན་སྡེ་རོང་རྫོང་གི་མི་སེར་སྡོད་ཡུལ་གྱི་ས་བབ་མཐོ་བ་དང་སྨུག་ཕྱིའི་འོད་ཟེར་ཤུགས་ཆེ་བས་མིག་ནད་ཕོག་མཁན་མང་པོ་ཡོད་པ་དེའི་ནང་སྐྱ་འགྲིབ་ཕོག་པའི་རྐྱེན་གྱིས་ལོང་བར་གྱུར་ནས་རྒྱ་ཆེའི་ཞིང་འབྲོག་པའི་རྒྱུན་གཏན་གྱི་ཐོན་སྐྱེད་དང་འཚོ་བར་ཤུགས་རྐྱེན་ཚབས་ཆེན་བཟོ་གི་ཡོད། རྒྱ་ཆེའི་མིག་ནད་ཕོག་པའི་ནད་པར་ཞབས་ཞུ་དེ་བས་ལེགས་པ་ཞུ་ཆེད། སྡེ་རོང་རྫོང་ཨུད་དང་རྫོང་མི་དམངས་སྲིད་གཞུང་གི་འགོ་ཁྲིད་ཀྱི་ཚད་མཐོའི་མཐོང་ཆེན་དང་དཀར་མཛེས་ཁུལ་མི་དམངས་སྨན་ཁང་གི་ཤུགས་ཆེའི་རྒྱབ་སྐྱོར་འོག་ཟླ་༡༠པ་ནས་བཟུང་དཀར་མཛེས་ཁུལ་མི་དམངས་སྨན་ཁང་གིས་སྔ་རྗེས་སུ་སྨན་བཅོས་རུ་ཁག་༢ཀྱི་མི་༡༡སྡེ་རོང་རྫོང་གི་ཤང་གྲོང་༥རུ་འདེམས་སྒྲུག་ཞིབ་བཤེར་བྱེད་པར་བཏང་ནས་ཁྱོན་མིག་ནད་ཕོག་པའི་ནད་པ་༣༩༥ཞིབ་བཤེར་ཐུབ་ནས་སྐྱ་འགྲིབ་ཕོག་པའི་ནད་པ་༨༧ཡོད་པ་དེའི་ནང་ནད་པ་༡༥ཡི་མིག་གཉིས་ཀར་སྐྱ་འགྲིབ་ཕོག་ཡོད་པ་རེད།
     ཟླ་༡༢ཚེས་༡༠ཉིན་དཀར་མཛེས་ཁུལ་མི་དམངས་སྨན་ཁང་གི་ཡོན་ཀྲང་རྡོ་རྗེ་དང་བཅས་པ་མི་༨སྡེ་རོང་དུ་སླེབས་འཕྲལ་ལས་དོན་སྤེལ་འགོ་བཙུགས་པ་དང་། སྡེ་རོང་འཕྲོད་བསྟེན་སྒྲིག་གཞིའི་གཞོགས་འདེགས་དམ་ཟབ་འོག་དུས་ཡུན་ཉིན་གསུམ་གྱི་ཛ་དྲག་ཆེ་བའི་ལས་དོན་སྤེལ་རིང་ནད་པ་༨༧ལ་རིན་མེད་ངང་བསྐྱར་མཐོང་གཤག་བཅོས་བྱས་པ་རེད།
     དཀར་མཛེས་ཁུལ་མི་དམངས་སྨན་ཁང་གི་ཡོན་ཀྲང་རྡོ་རྗེ་དང་བཅས་པའི་རིགས་གཅིག་མཁས་ཅན་རྣམས་ཀྱིས་བྱ་སྤྱོད་དངོས་ཀྱི་ཐོག་ནས་སྡེ་རོང་རྫོང་གི་སྐྱ་འགྲིབ་ཕོག་པའི་ནད་པར་ཏང་དང་སྲིད་གཞུང་གི་ཐུགས་ཁུར་ཚོར་བར་བྱས་པ་དང་ནད་པས་ཁྱིམ་གྱི་སྒོ་ཁར་རིན་མེད་ངང་མིག་ནད་གཤག་བཅོས་དང་ལེན་ཞུས་པ་མ་ཟད་ད་དུང་འགྲོ་གྲོན་འབོར་ཆེན་ཞིག་གྲོན་ཆུང་ཐུབ་པ་རེད། སྐྱ་འགྲིབ་ཕོག་པའི་ནད་པས་བསྐྱར་མཐོང་རེ་འདོད་ཆེན་པོ་བྱེད་ལ་བསྐྱར་དུ་མཐོང་རྗེས་ཀྱི་དགའ་སྣང་ལས་སྨན་བཅོས་རིགས་གཅིག་མཁས་ཅན་ཚོར་སེམས་འགུལ་ཟབ་མོ་ཐེབས་ཡོད་པ་རེད།