༄༅།།རྗེ་རིན་པོ་ཆེའི་རྣམ་ཐར་ཚིགས་བཅད་བཅོ་བརྒྱད་མ།

                                                        དང་པོར་རྒྱ་ཆེན་ཐོས་པ་མང་དུ་བཙལ། །
                                                        བར་དུ་གཞུང་ལགས་ཐམས་ཅད་གདམས་པར་ཤར། །
                                                        མཐའ་མར་ཉིན་མཚན་ཀུན་དུ་ཉམས་སུ་བླངས། །
                                                        བློ་བཟང་གྲགས་པའི་ཞབས་ལ་ཕྱག་འཚལ་ལོ།།
 
                                                        རབ་བྱུང་དྲུག་པའི་མེ་མོ་བྱ་ཡི་ལོར།།
                                                        གངས་ཅན་ཤར་ཕྱོགས་མདོ་སྨད་ཙོང་ཁ་རུ། །
                                                        ལུང་བསྟན་བཞིན་དུ་ཀླུ་འབུམ་དགེ་བ་དང༌།།
                                                        ཤིང་བཟའ་ཨ་ཆོས་གཉིས་ཀྱི་སྲས་སུ་འཁྲུངས།།
 
                                                        དགུང་ལོ་གསུམ་པར་གྲུབ་དབང་ཀརྨ་པས། །
                                                        དགེ་བསྙེན་བསྒྲུབས་ཏེ་ཀུན་དགའ་སྙིང་བོ་དང༌།།
                                                        དགུང་ལོ་བདུན་པར་དོན་གྲུབ་རིན་ཆེན་ལས།།
                                                        རབ་ཏུ་བྱུང་ནས་བློ་བཟང་གྲགས་པར་གསོལ།།
 
                                                       བཅུ་དྲུག་བར་དུ་མདོ་སྨད་བྱ་ཁྱུང་དུ། །
                                                       རིག་པའི་དཔའ་བོ་དོན་གྲུབ་རིན་ཆེན་ལས།།
                                                       དབང་ལུང་མན་ངག་གཞུང་སོགས་གང་འདོད་དུ།།
                                                       གསན་ཏེ་བསྙེན་སྒྲུབ་སོགས་ལ་བརྩོན་པར་མཛད།།
 
                                                       བཅུ་བདུན་བཞེས་ཚེ་མཁན་པོའི་གསུང་བཞིན་དུ།།
                                                      དབུས་སུ་བྱོན་ནས་སྙེ་ཐང་ས་སྐྱ་སོགས།།
                                                      ཆོས་སྡེ་མང་བོར་བཤེས་གཉེན་དུ་མའི་མདུན།།
                                                      རྒྱ་བོད་མཁས་པའི་གཞུང་ལུགས་ཐམས་ཅད་སྦྱངས།།
 
                                                      བཅུ་དགུར་གསང་ཕུ་སོགས་སུ་གྲྭ་སྐོར་གྱིས།།
                                                     མཁས་པའི་གྲགས་པ་དབུས་གཙང་ཡུལ་དུ་ཁྱབ། །
                                                     གཞོན་ནུ་བློ་གྲོས་སོགས་ལས་དབུ་ཚད་ཀྱི། །
                                                     ན་ཆད་མེད་པའི་རིགས་པ་དུ་མ་རྙེད། །
 
                                                      ཉེར་བཞིར་བཀའ་བཞི་ཚུལ་ཁྲིམས་རིན་ཆེན་ལས། །
                                                      བསྙེན་པར་རྫོགས་ཤིང་གུང་ཐང་ཆོས་ཀྱི་སྡེར། །
                                                     བཀའ་བསྟན་གཟིགས་པས་སྔོན་མེད་བློ་རྒྱས་ཏེ། །
                                                     བསྟན་བཅོས་བློ་གསལ་བགྲོད་པའི་ཐེམ་སྐས་བརྩམས།།
 
                                                    ཉེར་ལྔར་རྒྱ་བོད་གཞུང་བརྒྱ་ཐང་མ་རུ། །
                                                    བརྡལ་བའི་ལེགས་བཤད་གསེར་གྱི་ཕྲེང་བ་མཆོག།
                                                    རྩོམ་པའི་དབུ་ཚུགས་དགུང་ལོ་སོ་གཅིག་ལ། །
                                                    སྔོན་ཆད་མེད་པའི་བསྟན་བཅོས་དེ་ཉིད་གྲུབ། །
 
                                                   སོ་གཉིས་མོན་མཁར་བཀྲ་ཤིས་གདོང་གི་སར། །
                                                   ཉིན་རེར་ཆོས་ཐུན་བཅོ་ལྔ་ཆགས་མེད་དུ། །
                                                   རྒྱ་གཞུང་བསྟན་བཅོས་བཅོ་ལྔ་དུས་གཅིག་ཏུ། །
                                                   ཐུགས་ནས་འཆད་ཅིང་དགག་སྒྲུབ་གཏན་ལ་ཕབ། །
 
                                                   སོ་དྲུག་བཞེས་དུས་ལྷ་ཡིས་ལུང་བསྟན་བཞིན། །
                                                   འཁོར་གྱི་དག་པ་བརྒྱད་དང་ལྷན་ཅིག་ཏུ།།
                                                   རྫིང་ཕྱི་བྱམས་པ་ཞིག་གསོ་མཛད་པ་དང༌། །
                                                   འོལ་ཁ་ཆོས་ལུང་དགོན་པར་ཐུགས་དམ་མཛད།།
 
                                                  ཞེ་གཅིག་གཉལ་སྨད་སེང་གེ་རྫོང་དུ་ཕེབས། །
                                                  གསེར་ཕྱེ་འབུམ་པར་གཞི་གསོ་མཆོད་འབུལ་མཛད།།
                                                  འོ་དེ་གུང་རྒྱལ་ཞོལ་དུ་ལྟ་བ་ལ།།
                                                  སྒྲོ་འདོགས་བཅད་དེ་རྟེན་འབྲེལ་བསྟོད་པ་གསུངས།།
 
                                                  ཞེ་དྲུག་བཞེས་དུས་ཨར་གྱི་གདན་ས་མཆོག།
                                                  གནམ་རྩེ་ལྡིང་དུ་བླ་མ་རེད་མདའ་སོགས། །
                                                  ལྷན་དུ་འཛོམས་ནས་འདུལ་བའི་ཕྱག་ལེན་དག །
                                                  རྨང་ནས་གསོས་ཏེ་ཆོས་ཀྱི་འཁོར་ལོ་བསྐོར།།
 
                                                   ལོ་དེར་རྭ་སྒྲེང་སེང་གེ་བྲག་ཞོལ་དུ།།
                                                  དབེན་གནས་བཏབ་ནས་ལམ་རིམ་ཆེན་མོ་དང༌།།
                                                  དགུང་ལོ་ཞེ་དགུར་འོལ་ཁའི་བྱམས་གླིང་དུ། །
                                                  གསང་ཆེན་སྔགས་ཀྱི་ལམ་རིམ་ཆེན་མོ་བརྩམས།།
 
                                                  ང་གཅིག་བཞེས་དུས་སེ་ར་ཆོས་སྡིངས་སུ། །
                                                  སྲས་ཀྱི་ཐུ་བོ་དགེ་ལེགས་དཔལ་བཟང་དང༌། །
                                                 མཇལ་ཞིང་དྲང་ངེས་རྩ་ཤེའི་ཊིཀ་ཆེན་སོགས།།
                                                  སྲིད་ན་དཀོན་པའི་ལེགས་བཤད་དེ་དག་བརྩམས།།
 
                                                  ང་གསུམ་ལྷ་སར་དགེ་འདུན་བརྒྱད་སྟོང་གིས།།
                                                  མཆོད་པ་ཕུལ་པས་སྨོན་ལམ་ཆེན་མོ་བཙུགས།།
                                                  དགེ་ལྡན་རྣམ་པར་རྒྱལ་བའི་གླིང་བཏབ་ནས། །
                                                  རྒྱུད་སྡེ་འཆད་ཉན་དགའ་ལྡན་སྒྲུབ་མཆོད་སྤེལ། །
 
                                                  རེ་གསུམ་ཆོས་རྗེ་དར་མ་རིན་ཆེན་དང༌། །
                                                 གྲུབ་དབང་ཤེར་སེང་སོགས་ལ་བསྟན་པ་གཏད། །
                                                 ཧོར་ཟླ་བཅུ་བའི་མར་ངོའི་ཚེས་བཅུ་ལ། །
                                                 ངོ་མཚར་དང་བཅས་དགའ་ལྡན་གནས་སུ་གཤེགས།
 
                                                 ཕྱི་རུ་ཉན་ཐོས་སྤྱོད་པས་ཞི་ཞིང་དུལ། །
                                                 ནང་དུ་རིམ་གཉིས་རྣལ་འབྱོར་གདེང་དང་ལྡན། །
                                                 མདོ་སྔགས་ལམ་བཟང་འགལ་མེད་གྲོགས་སུ་འཁྱེར། །
                                                བློ་བཟང་གྲགས་པའི་ཞབས་ལ་གུས་པས་བདུད།།
 
                                                ལྷད་དང་འདྲེས་པའི་བསྟན་པར་དག་ཐེར་བྱས། །
                                                སྒྱུ་ལུས་འོད་གསལ་མ་འདྲེས་གསལ་བོར་བཤད། །
                                                སྟོང་བ་རྟེན་འབྲེལ་དོན་དུ་གསུངས་པ་ཡི། །
                                                གངས་ཅན་མཁས་པའི་གཙུག་རྒྱན་ཙོང་ཁ་བ།།
 
                                                 ང་ཡི་བླ་མ་བློ་བཟང་གྲགས་པ་དེ། །
                                                 ཁ་བ་ཅན་དང་དགའ་ལྡན་གནས་ལ་སོགས། །
                                                 དག་པའི་ཞིང་མཆོག་གང་དུ་གནས་ཀྱང་རུང༌། །
                                                བདག་སོགས་འཁོར་གྱི་ཐོག་མར་སྐྱེ་བར་ཤོག །
     ཅེས་པ་འདི་ནིའཇམ་དཔལ་དབྱངས་མི་ཡི་རྣམ་པར་རོལ་པ༧རྒྱལ་བ་གཉིས་པ་བློ་བཟང་གྲགས་པའི་ཞབས་ལ་མི་ཕྱེད་པའི་དད་པ་ཐོབ་པ་བཙུན་གཟུགས་ཤེས་རབ་བསྟན་དར་གྱིས་དགའ་ལྡན་ལྔ་མཆོད་ཆེན་མོར་སྔོན་བྲིས་པ་ལ་ཞུ་དག་ཅུང་བྱས་ཏེ་གྲུབ་པར་བྱས་སོ།།